‏ Job 27

1Ayup sózin dawam etip, bılay dedi:

2– Huqıqımnan mahrum etken tiri Quday haqı,
Janımdı hásiretke toltırǵan Qúdireti kúshli Quday haqı ant ishemen:
3Gewdemde janım bar eken,
Quday bergen dem murnımda eken,
4Awzımnan nahaq sóz shıqpaydı,
Tilim jalǵan sóz aytpaydı.
5Sizlerdi hesh qashan haq dep tán almayman,
Ólgenimshe, pákligimnen bas tartpayman.
6Ádilligimde bekkem turıp, onnan hasla júz burmayman,
Tiri ekenmen, hújdanım meni ayıplamas.

7Dushpanımnıń basına zalımnıń kúni,
Qarsılasımnıń basına nahaqtıń kúni tússin.
8Quday qudaysızdıń janın alıp, onı joq qılǵanda,
Onda qanday úmit qaladı?
9Qudaysızdıń basına apatshılıq túskende,
Quday onıń dad salıp jılaǵanın esite me?
10Ol qúdireti kúshli Qudaydan zawıq ala ma?
Bárqulla Qudaydı shaqıra ala ma?
11Qudaydıń qúdireti haqqında sizlerge úyretemen,
Qúdireti kúshli Qudaydıń niyetin sizlerden jasırmayman.
12Haslında, bulardıń hámmesin ózlerińiz kórdińiz,
Onda nege hámmeńiz mánissiz sózlerdi sóyley beresiz?

13Zalım adamnıń Qudaydan alatuǵın úlesi,
Qısım kórsetiwshiniń Qúdireti kúshli Qudaydan alatuǵın miyrası mınaw:
14Onıń balaları qanshelli kóp bolsa da,
Olar qılıshtan qırılıp ketedi,
Urpaqlarınıń jetkilikli tamaǵı bolmaydı.
15Tiri qalǵanları kesellikten ólip, kómiledi,
Jesir qalǵan hayalları joqlaw aytıp, jılamaydı.
16Jawız adam jerdiń shańınday mol gúmis jıynasa da,
Ílayday mol kiyim-kenshek toplasa da,
17Onıń toplaǵanların ádiller kiyedi,
Ayıpsızlar gúmislerdi bólisip aladı.
18Jawızdıń salǵan úyi órmekshiniń awınday,
Qarawıldıń shertegindey hálsiz boladı.
19Ol bay bolıp, uyqıǵa ketedi, biraq artıq onday bolmaydı.
Kózin ashqanda, baylıǵı joq bolıp shıǵadı.
20Qorqınısh onı sel kibi basadı,
Túnde dúbeley ushırıp ketedi.
21Shıǵıs samalı onı ushırıp alıp ketip,
Ol kózden ǵayıp boladı.
Onı óz ornınan sıpırıp taslaydı.
22Samal ayawsız oǵan taslanar,
Ol samaldıń kúshinen qashıwǵa urınadı.
23Samal onıń ústinen kúlip, qolların shappatlap,
Óz ornınan onıń izinen ısqıradı.