Job 28
Danalıq haqqında jır
1Mine, gúmis qazıp alınatuǵın kánler, Altındı tazartatuǵın orınlar bar.2Temir jerden qazıp alınadı,
Mıs ta tastan balqıtıp alınadı.
3Kánshi qarańǵılıqqa shek qoyadı,
Jer astınıń uzaq shetine barıp,
Túnek hám qoyıw qarańǵılıqtan qazılma izleydi.
4Ol adam jasaytuǵın jerlerden uzaqta,
Adam ayaq baspaytuǵın jerlerde qudıq qazıp,
Hámmeden uzaqta jipke asılıp, terbelip turadı.
5Jer betine kelsek, onnan azıq-awqat ónip shıǵadı,
Al jer astı bolsa, jandırılǵanday astan-kesten bolıp atır.
6Onıń tasları lazurittiń mákanı,
Topıraǵında altın bar.
7Jırtqısh qus kánge baratuǵın jollardı bilmeydi,
Suńqardıń kózi oǵan túspeydi.
8Jabayı haywanlar ol jerlerge ayaq baspaǵan,
Arıslan da ol jerlerden júrmegen.
9Adam jartaslardı sındırıp,
Tawlardı túp-tamırı menen qoparıp taslaydı.
10Ol jartaslar arasınan jol ashadı,
Kózleri hár bir bahalı nárseni kóredi,
11Adam dáryalardıń saǵasın tabadı ▼
▼ dáryalardıń saǵasın tabadı – Áyyemgi grekshe hám latınsha awdarmalardan. Evreyshe qoljazbalarda «dáryalardı bógetleydi».
,Jasırın bolǵanlardı jaqtılıqqa shıǵaradı.
12Biraq danalıqtı qayaqtan tabıwǵa boladı?
Aqıldıń mákanı qay jerde eken?
13Adamzat onıń qádirin bilmes,
Tiriler áleminen onı taba almas.
14Tereń suwlar: «Ol mende emes», – der,
Teńiz de: «Ol meniń janımda da emes», – der.
15Onı sap altınǵa da satıp ala almaysań,
Qunın gúmis penen de tóley almaysań.
16Danalıq Ofir altını menen de,
Qımbatbaha oniks hám lazurit penen de bahalanbas.
17Ol altın menen de, kristall menen de salıstırılmas,
Sap altın buyımǵa da almastırılmas.
18Marjan hám yashmanı aytpay-aq qoyayıq,
Danalıq yaqıttan da qımbat turadı.
19Xabashstan xrizoliti de oǵan salıstırılmas,
Sap altın menen de onıń qunı ólshenbes.
20Danalıq qaydan keledi?
Aqıldıń mákanı qay jerde eken?
21Ol barlıq tiri janlardıń kózinen jasırılǵan,
Kóktegi quslardan da sır saqlanǵan.
22Nabıt bolıw mákanı hám ólim:
«Biz ol haqqında tek mısh-mısh esittik», – deydi.
23Danalıqqa baratuǵın jol Qudayǵa ayan,
Onıń mákanın tek Ol biledi.
24Ol jerdiń shetlerine deyin kóz saladı,
Kóklerdiń astındaǵılardıń hámmesin kóredi.
25Ol samalǵa kúsh berip,
Suwlardıń ólshemin belgilep bergende,
26Ol jawın ushın qarar shıǵarıp,
Jıldırım ushın jol belgilegende,
27Ol danalıqtı kórip, onı bahaladı,
Onı tekserip, tastıyıqladı.
28Sońınan adamǵa:
«Haqıyqattan da, Iyeden qorqıw – bul danalıq,
Jawızlıqtan awlaq bolıw – bul aqıllılıq», – dedi.
Copyright information for
KaaIBT22L