‏ Job 29

Ayuptıń ótken ómirin ańsawı

1Ayup sózin dawam etip bılay dedi:

2– Qáne endi, ótken aylar,
Quday meni qorǵap-saqlaǵan kúnler qaytıp kelse edi!
3Sol waqıtları Onıń shırası tóbemde jarqırap,
Onıń nurı menen qarańǵılıqtı qáwipsiz kesip óter edim!
4Awa, ónip-ósken kúnlerim,
Qudaydıń doslıǵı shatırımdı qorǵap turǵan kúnler qaytıp kelse edi!
5Sol kúnleri Qúdireti kúshli Quday ele meniń menen birge bolıp,
Balalarım da átirapımda edi.
6Úyimde aǵarǵanım mol bolıp,
Jartas men ushın záytún mayın dárya qılıp aǵızar edi.

7Qala dárwazası aldına barıp,
Maydandaǵı ornıma otırmaqshı bolǵanımda,
8Jaslar meni kórip jol berer,
Jası úlkenler de ornınan turar edi.
9Basshılar da sóylewin toqtatıp,
Qolları menen awızların basar edi.
10Aqsúyeklerdiń de dawısı sónip,
Tilleri tańlayına jabısıp qalar edi.
11Meni tıńlaǵanlar maǵan raxmet aytar edi,
Meni kórgenler meni maqtar edi.
12Men nala shekken jarlını da,
Járdemge mútáj jetimdi de qutqarar edim.
13Ólim tóseginde jatırǵanlar maǵan pátiyasın berer edi,
Jesir hayallardıń júregi de men bergen járdemnen quwanıshqa tolar edi.
14Ádillikti kiyim kibi kiyip aldım,
Ádalatlıq shapanım hám sállemdey edi.
15Soqırǵa kóz,
Mayıpqa ayaq boldım.
16Jarlılarǵa ákelik qıldım,
Ózim tanımaǵan adamnıń dawın da ádillik penen sheship berdim.
17Nahaqlardıń jaqların sındırıp,
Oljasın awzınan tartıp alar edim.

18Sonlıqtan men bılay oylar edim: «Kúnlerim qum kibi kóp boladı,
Men óz oshaǵımnıń basında jan beremen,
19Men tamırı suwǵa tiyip turǵan,
Shaqalarına tún boyı shıq túsip turatuǵın terek yańlıman.
20Ataq-abırayım óse beredi,
Qolımdaǵı oq jay jańalana beredi».

21Adamlar maǵan sabırlılıq penen qulaq salıp,
Keńeslerimdi únsiz tıńlar edi.
22Meniń sózlerimnen keyin hesh kim gáp qospas edi,
Sózlerim olarǵa mayday jaǵar edi.
23Olar meni jawındı kútkendey kúter edi,
Sózlerimdi báhárdegi jawındı simirgen jer sıyaqlı simirer edi.
24Olarǵa kúlip qarasam, kózlerine isenbes edi,
Júzimdegi nurdan olar jigerlener edi.
25Olarǵa bas bolıp, jol kórsetip otırar edim,
Láshkerleri arasındaǵı patsha sıyaqlı,
Jılaǵanlardı jubatatuǵın adam bolıp jasadım.