‏ Job 3

Ayuptıń tilge kiriwi

1Aqırı Ayup tilge kirip, óziniń dúnyaǵa kelgen kúnin náletledi. 2Ol bılay dedi:

3– Joq bolsın men tuwılǵan kún,
«Boyına bala pitti» degen tún!
4Sol kún túnekke aylanıp qalsın!
Aspandaǵı Quday da ol kúndi eslemesin,
Jarıq ta sol kúnge sáwle shashpasın.
5Sol kúndi tas túnek qarańǵılıq iyelep alsın,
Júzin qara bultlar qaplap alsın,
Qarańǵılıq sol kúnniń húreyin ushırsın.
6Awa, sol túndi tas túnek qarańǵılıq jutıp jibersin,
Ol jıl kúnleri arasında sanalmasın,
Aylardıń birewine de kirmesin.
7Sol tún qısır bolsın,
Onda hesh bir shadlıq hawazı esitilmesin.
8Kúnlerdi náletleytuǵınlar,
Liwyatandı ▼

▼ Liwyatan – teńizde jasaytuǵın úlken maqluq.

oyata alatuǵınlar,
Sol túndi ǵarǵasın.
9Onıń tań juldızları sónip qalsın.
Jarıqlıqtı kútsin, biraq ol kelmesin,
Tań shuǵlasın kórmesin.
10Óytkeni usı azaptı kózlerim kórmewi ushın,
Sol tún anamnıń qursaǵın jappadı.

11Ne ushın tuwılıp atırıp, ólmedim eken?
Yamasa tuwıla sala, demim tawısılmadı eken?
12Meni nege dizesine alıp otırdı?
Nege meni emizdi eken?
13Solar bolmaǵanda, házir tınısh jatqan bolar edim,
Uyıqlap tınım tapqan bolar edim.
14Qarabaqanalardı ózlerine qayta tiklep alǵan,
Dúnya patshaları hám keńesgóyleri menen birge bolar edim.
15Yamasa úylerin gúmiske toltırǵan,
Altınǵa bay húkimdarlar menen birge bolar edim.
16Yamasa ne ushın óli tuwılǵan bópe sıyaqlı,
Kún nurın kórmegen náreste sıyaqlı kómilmedim?
17Ol dúnyada zalımlar jamanlıq qılıwdı toqtatadı,
Harıqqanlar da tınım tabadı.
18Ol jerde tutqınlar da tınıshlıqtan ráhát aladı,
Qadaǵalawshılardıń baqırısların esitpeydi.
19Ullı da, kishi de bardur ol jerde,
Qul bolsa, xojayınınan azat.

20Ne ushın azap shegip júrgenge nur,
Al qayǵıǵa batqanǵa ómir beriledi eken?
21Olar ólimin kútedi, biraq ol kelmes,
Ájelin kómilgen ǵáziyneden de beter izler.
22Eger ájelin tapsa,
Olar quwanıshqa bólenip, shadlanar edi.
23Jolın kóre almaytuǵın adamǵa,
Quday aynala dógeregin qarańǵılıq penen qorshaǵan adamǵa,
Ne ushın ómir beriler eken?
24Nan jewdiń ornına gúrsinemen,
Ahıw-nalam suw kibi aqpaqta.
25Neden qorqqan bolsam, sol júz berdi,
Neden qáweterlengen bolsam, sol basıma tústi.
26Maǵan tınıshlıq ta, tınım da, ráhát te joq,
Basıma ǵawasatlı kún tuwdı.