‏ Job 30

Ayuptıń óziniń xorlanıp atırǵanı haqqında aytıwı

1Mine endi, ózimnen jası kishi bolǵanlar ústimnen kúlip otır.
Olardıń ákelerin súriwimdi qorıytuǵın iytlerdiń janına qoyıwǵa da ılayıq kórmes edim.
2Olardıń qollarındaǵı kúshten maǵan ne payda?
Olar kúsh-quwattan ayırılǵan.
3Joqshılıq penen ashlıqtan qurıǵan,
Olar túnde shólde hám elsiz jerlerde shóp tamırın kemiredi.
4Putalardıń túbinen ashshı shópler teredi,
Terektiń tamırı – olardıń awqatı.
5Olar xalıq arasınan quwıp jiberilgen,
Urılarǵa baqırǵanday, olardıń izinen baqıradı.
6Olar saylardıń jıralarında,
Jerdegi shuqırlarda hám jartaslardaǵı úńgirlerde jasawǵa májbúr.
7Olar putalar arasında ulısıp,
Shatlı putalar astında toplanadı.
8Olar aqmaq, ata tegi belgisiz adamlardıń ulları,
Olardı elden qamshılap quwıp shıqqan.

9Endi bolsa, men olardıń balalarınıń qosıǵına aylandım,
Olar ushın kúlki boldım.
10Olar mennen tiksinip, janıma jolamaydı,
Betime túkiriwden de tartınbaydı.
11Quday meniń oq jayımnıń jibin bosatıp jiberip,
Meni jerge urǵanı ushın,
Olar meniń aldımda ózlerin jılawlay almaytuǵın boldı.
12Bul gázzaplar meniń oń qaptalımnan hújim qılıp,
Ayaqlarımnan shalıp,
Ózleriniń nabıt qılatuǵın jolın maǵan qarsı tayarlaydı.
13Olar jolımdı tosıp,
Basıma túsetuǵın apatshılıqtı tezletedi,
Olardı toqtatatuǵın hesh kim joq.
14Olar omırılǵan úlken tesikten japırılıp kirip,
Topan suwınday ústime bastıradı.
15Meni qorqınısh basqan,
Abırayım samalǵa suwırılǵanday ushıp ketti,
Dáwletim de bult kibi ótip ketti.

16Endi janım meni tárk etpekte,
Qayǵılı kúnler meni qorshap aldı.
17Túni menen súyeklerim sırqırap,
Azarı tınımsız janımdı jeydi.
18Quday qáhár menen kiyimimnen uslap,
Shapanımnıń jaǵası sıyaqlı meni qılqındıradı.
19Quday meni ılayǵa ılaqtırdı,
Men shań hám kúlge aylandım.

20Quday, Saǵan jalbarınaman, maǵan juwap bermeyseń,
Ayaqqa tursam, maǵan tek qarap turasań.
21Maǵan rehimsiz bolıp kettiń,
Óz kúsh-quwatıń menen meni quwǵın qılıp atırsań.
22Quyın menen meni kóterip alıp, ılaqtırıp,
Dawıldıń ishinde anda-mında zıńǵıtasań.
23Awa, meni ólimge,
Barlıq tiri jan ushın tayınlanǵan úyge alıp barajaǵıńdı bilemen.

24Azap shegip, járdem sorap, páriyad etkenge,
Hesh kim qarsı qol kótermes!
25Kúni awır bolǵanlar ushın men jılamadım ba?
Jarlılar ushın janım ashımadı ma?
26Biraq men jaqsılıqtan úmit qılsam, jamanlıq keldi,
Jaqtılıqtı kútsem, túnek keldi.
27Júregim astan-kesten, tınım bilmeydi,
Basıma qayǵılı kúnler túsken.
28Qarayıp kettim, biraq quyashtan emes,
Jıyın arasında turıp, járdem sorap, páriyad etemen.
29Men saǵallardıń tuwısqanı,
Úkilerdiń joldası boldım.
30Terim qarayıp, túlep túspekte,
Súyeklerim ıssılıqtan kúymekte.
31Liramnıń dawısı joqlaw aytqanlardıń,
Sıbızǵımnıń dawısı jılaǵanlardıń dawısına aylandı.