‏ Job 31

Ayuptıń sońǵı ret óz ayıpsızlıǵın aytıwı

1Qızlarǵa qumarlanıp qaramaw ushın,
Kózlerim menen kelisim dúzdim.
2Aspandaǵı Qudaydan alatuǵın payım ne boladı?
Joqarıdaǵı Qúdireti kúshli Qudaydan berilgen miyrasım ne boladı?
3Ol ádalatsızlardıń basına apat,
Jawızlıq qılǵanlardıń basına bále jawdırmay ma?
4Ol meniń jollarımdı kórip,
Hár bir adımımdı sanamay ma?

5Eger men jalǵan joldan júrip,
Ayaǵım hiylege asıqsa,
6Quday meni tuwrı tárezige tartsın,
Hám Ol meniń pákligimdi bilsin.
7Eger ayaqlarım tuwrı joldan tayǵan,
Júregim kózlerime boysınǵan,
Yamasa qollarım haramlanǵan bolsa,
8Onda ekken eginimniń ónimin basqalar jesin,
Eginlerim tamırı menen suwırılıp qalsın.

9Eger bir hayal arqalı júregim azǵırılsa,
Qońsımnıń qapısı aldında onıń hayalın ańlıǵan bolsam,
10Onda meniń hayalım basqanıń biydayın tartsın,
Basqa erkekler onıń menen jatsın.
11Aqırı, bul uyatsız is,
Húkim qılınatuǵın gúna.
12Sonday isler nabıt bolıw mákanına deyin jandırıp baratuǵın ot bolıp,
Pútkil eginimdi tamırı menen kúydirip jiberer edi.

13Eger qul hám shorılarım maǵan arız qılǵanda,
Men olarǵa ádalatsızlıq qılǵan bolsam,
14Onda Quday ornınan turǵanda, men ne qılaman?
Ol esap soraǵanda, Oǵan ne dep juwap beremen?
15Meni anamnıń qursaǵında jaratqan, olardı da jaratpadı ma?
Bizlerge qursaqta pishim bergen bir Quday emes pe?

16Eger men jarlılardıń tilegin orınlamaǵan,
Jesirlerdiń úmitin pushqa shıǵarǵan bolsam,
17Yamasa nanımdı bir ózim jep,
Jetimler menen bólispegen bolsam,
18Jaslıǵımnan jetimlerge ákelik qılıp keldim,
Ómir boyı jesirlerge ǵamxorlıq qıldım.
19Eger kiyimi bolmaǵanı ushın jan berip atırǵandı,
Yamasa jamılatuǵın nársesiz qalǵan jarlını kórip,
20Olarǵa qoylarımnıń júninen kiyim kiygizbegen bolsam,
Olar da júrekten maǵan alǵıs aytpaǵan bolsa,
21Qazıxanada sózimniń ótetuǵınına kózim jetip,
Jetimge qol kótergen bolsam,
22Onda qollarım iynimnen julınıp túsip,
Buwınlarınan bólinip qalsın.
23Men Qudaydan keletuǵın apattan qorqatuǵın edim,
Qudaydıń ullılıǵın bile tura, onday is qıla almas edim.

24Eger altınǵa úmit baylaǵan bolsam,
Yamasa sap altınǵa: «Sen – meniń úmitimseń», – degen bolsam,
25Baylıǵımnıń mollıǵına,
Kóp nársege qol jetkizgenime maqtanǵan bolsam,
26Jarqırap turǵan quyashqa qarap,
Jımıńlaǵan aydıń júrgenine qarap,
27Júregim jasırın azǵırılıp,
Qollarımdı súyip, olarǵa qaray jayıp tabınǵan bolsam,
28Bul da húkimge ılayıqlı gúna bolar edi.
Sebebi men kóktegi Qudayǵa opasızlıq qılǵan bolar edim.

29Eger dushpanımnıń jıǵılǵanın kórip, súyingen,
Apatshılıqqa duwshar bolǵanın kórip, quwanǵan bolsam,
30Olardı ǵarǵaw arqalı,
Awzıma gúna islewge jol qoymadım.
31Eger shatırımdaǵılar: «Ayup bergen góshten jep,
Qarnın toyǵızbaǵan bar ma?» – dep soramaǵan bolsa,
32Hesh bir jolawshı kóshede túnemes edi,
Qapım olar ushın bárqulla ashıq edi.
33Eger basqalarǵa uqsap, qılmısımdı jasırǵan,
Ayıplarımdı sır saqlaǵan bolsam,
34Onda men alamannan qorqqanım ushın,
Urıwlaslarımnıń qıynawınan qorqqanım ushın,
Úndemey, qapıdan sırtqa shıqpaǵan bolar edim.

35Qáne, meni tıńlaytuǵın birew bolsa edi!
Mine, men aytqanlarımdı tastıyıqlap, mórledim.
Qúdireti kúshli Quday maǵan juwap bersin!
Qáne endi, dushpanım ayıplawın jazıp, qolıma berse edi!
36Sózsiz, onı iynimde kóterip,
Basıma tajday etip, kiyip júrer edim!
37Men Qudayǵa atqan hár bir adımımnıń esabın berer edim,
Xanzada kibi Oǵan jaqınlasar edim.

38Jerim maǵan qarsı páriyad etken bolsa,
Onıń qarıqları da birge nala qılǵan bolsa,
39Pulın tólemey zúráátin alǵan bolsam,
Onıń iyeleriniń ólimine sebepshi bolǵan bolsam,
40Onda biyday ornına tiken,
Arpa ornına jabayı shópler ósip shıqsın.

Solay etip, Ayuptıń sózi aqırına jetti.