‏ Job 32

Elihudıń birinshi sózi

1Ayup óz názerinde haq bolǵanlıqtan, úsh dostısı onıń menen tartısıwdı toqtattı. 2Biraq Ayup ózin aqlap, Qudaydı ayıplaǵanı ushın, Ram áwladınan, Buz tiyresinen bolǵan Baraxel ulı Elihudıń Ayupqa ashıwı keldi. 3Sonday-aq, Ayuptı ayıplaǵanı menen, oǵan jónli juwap qaytara almaǵanı ushın, onıń úsh dostısına da ashıwı keldi. 4Elihu Ayup penen sóylesiw ushın óziniń gezegin kútti. Óytkeni basqalardıń jası onnan úlkenirek edi. 5Biraq sol úsh adamnıń basqa gápi joqlıǵın kórgende, Elihu ashıwǵa mindi.

6Solay etip, Buz tiyresinen bolǵan Baraxel ulı Elihu sózin baslap, bılay dedi:

– Meniń jasım kishi, sizler bolsańız jası úlkensizler,
Sonlıqtan batına almadım, óz bilgenimdi sizlerge aytıwǵa qorqtım.
7Jası úlkenler sóylesin,
Kóp jasaǵanlar danalıqtan sabaq bersin, dedim.
8Biraq adamǵa ishindegi ruwx,
Qúdireti kúshli Qudaydıń demi aqıl beredi.
9Sonlıqtan tek jası úlkenler dana bolmaydı,
Tek kóp jasaǵanlar ǵana neniń durıs ekenin túsine bermeydi.

10Sonlıqtan bılay deymen:
Meni tıńlań, men de óz bilgenimdi bayan eteyin.
11Sizler sóylegenińizde, men kúttim,
Sizler ne aytıwdı izlep atırǵanıńızda,
Aqıllı sózlerińizge qulaq túrdim.
12Sizlerdi bar dıqqatım menen tıńladım.
Biraq hesh birińiz Ayuptıń nahaqlıǵın dálilley almadıńız,
Hesh birińiz onıń sózlerine juwap bermedińiz.
13«Bizler dana joldı taptıq:
Ayuptı adam emes, al Qudaydıń Ózi jeńsin», – demeńler.
14Ayup maǵan qarata sóylemedi,
Eger sóylegende de, oǵan sizlerdiń sózlerińiz benen juwap bermegen bolar edim.

15Sizler irenjip, sóz tappay otırsızlar,
Aytatuǵın sózińiz de qalmadı.
16Sizler úndemey, juwap bermey tura berseńiz,
Men de kútip tura beriwim kerek pe?
17Meniń de aytar sózim bar,
Men de óz bilgenimdi bayan etpekshimen.
18Ishim sózlerge tolǵan,
Ishimdegi ruwx meni zorlamaqta.
19Júregim ashılmaǵan sharap kibi,
Jańa sharap quyılǵan mes kibi, jarılıp keteyin dep tur.
20Sóyleyin, janım jay tapsın,
Awız ashıp, juwap bereyin.
21Men hesh kimniń bet-júzine qaramayman,
Hesh kimge jaǵımpazlıq qılmayman.
22Men jaǵımpazlıq qılıwdı bilmeymen,
Bolmasa, Jaratıwshım meni dárriw joq qılǵan bolar edi.