‏ Job 33

1Endi Ayup, aytajaǵımdı tıńlap,
Barlıq sózlerime qulaq salıń!
2Mine, awzımdı ashtım,
Sózlerim tilimniń ushında dizilip tur.
3Sózlerim pák júregimnen shıǵadı,
Tilim bilgenin ashıq aytadı.
4Qudaydıń Ruwxı meni jarattı,
Qúdireti kúshli Qudaydıń demi maǵan ómir berdi.
5Qolıńızdan kelse, maǵan juwap beriń,
Aldımda turıp, dáliller keltiriń.
6Qudaydıń aldında men de sizdeymen,
Men de ılay bóleginen jasalǵanman.
7Sonlıqtan mennen qorqpasańız da boladı,
Qısqıǵa alıwım sizge awır batpasın.

8Gáplerińizdi óz qulaqlarım menen esittim,
Olar ele qulaqlarımda jańlap tur.
9Siz bılay dedińiz: «Men pákpen hám gúnasızban,
Minsiz hám ayıpsızban.
10Sonda da, Quday maǵan qarsı sebep izlep atır,
Meni Óz dushpanı dep sanamaqta.
11Ol ayaqlarıma buǵaw salıp,
Jollarımdı gúzetpekte».

12Biraq sizge aytayın: bul jerde siz nahaqsız,
Quday adamzattan ullı.
13«Hesh bir sózime juwap bermedi», – dep turıp,
Nege Onıń menen tartısıp atırsız?
14Quday hár qıylı jol menen sóyleydi,
Al bunı adamlar ańlamaydı da.
15Adamlar tereń uyqıǵa shúmgende,
Tóseklerinde qalǵıp ketkende,
Túslerinde, kórgen ayanlarında,
16Quday olardıń qulaqların ashıp,
Eskertiwleri menen olardı qorqıtadı.
17Usılayınsha, Ol adamdı jaman islerinen qaytaradı,
Menmenlikten saqlaydı.
18Janın qábirden,
Ómirin qılıshtan qutqaradı.
19Yamasa adam tósek tartıp jatqarılıp,
Súyekleri tınımsız sırqıraw menen jazalanadı.
20Sonda ol nanǵa da qaray almaytuǵın bolıp qaladı,
Hátte, eń mazalı taǵamlarǵa da ishteyi bolmaydı.
21Azıp-tozıp, tek súlderi qaladı,
Kórinbegen súyekleri endi anıq kózge taslanadı.
22Onıń janı qábirge,
Ómiri jan alıwshı perishtelerge jaqınlasadı.

23Al eger mıń perishteniń ishinde adamdı jaqlaytuǵın,
Oǵan ózi ushın neniń tuwrı ekenin bildiretuǵın bir perishte bar bolsa,
24Onıń miyrimi túsip: «Onı qábirge túsiwden aman saqlap qala gór!
Men onıń qunın óteytuǵın tólem taptım», – dese,
25Sonda adamnıń denesi jas balanikindey bolıp,
Onıń jaslıq shaǵı qaytıp keledi.
26Sońınan adam Qudayǵa duwa etedi hám Quday onı qabıl etedi.
Ol quwanısh penen Qudaydıń dárgayına keledi,
Quday onıń ádilligin tikleydi.
27Sonda adam adamlar aldında qosıq aytıp, bılay deydi:
«Men gúna islep, haqıyqattı burmaladım,
Biraq onıń jazasın tartpadım.
28Ol janımdı qábirden qutqardı,
Men jaqtı dúnyanı kórip turman».

29Mine, Quday bul nárselerdiń hámmesin,
Eki emes, úsh emes, qayta-qayta tákirarlaydı.
30Bunı adamnıń janın qábirden qaytarıw,
Oǵan ómirdiń nurın kórsetiw ushın solay isleydi.

31Dıqqat qılıń, Ayup, meni tıńlań,
Úndemeń, men sóyleyin.
32Eger aytatuǵın gápińiz bolsa, aytıń,
Men siziń aqlanıwıńızdı qáleymen.
33Eger bolmasa, onda meni tıńlań,
Úndemeń, men sizge danalıqtı úyreteyin.