‏ Job 34

Elihudıń ekinshi sózi

1Elihu sózin dawam etip, bılay dedi:

2– Sózlerimdi tıńlań, háy danıshpanlar!
Maǵan qulaq salıń, háy bilimpazlar!
3Awızdıń awqattıń dámin ajıratqanınday,
Qulaq ta sózlerdiń mánisin ayıradı.
4Kelińler, durıs nárseni tańlap,
Jaqsı nárseni birgelikte anıqlap alayıq.

5Mine, Ayup: «Men ayıpsızban,
Biraq Quday meni huqıqımnan mahrum etti.
6Meniki durıs bolsa da, jalǵanshı sanaldım,
Men jazıqsız bolsam da, dártime em joq», – dedi.
7Ayupqa uqsaǵan adam bar ma?
Ol ushın mazaq qılıw suw ishkendey nárse!
8Ol jamanlıq islewshiler menen dos tutınıp,
Jawızlar menen júredi.
9Ol bılay deydi: «Qudayǵa unaytuǵın islerdi islew,
Adamǵa hesh qanday payda keltirmeydi».

10Háy, sanalı adamlar, meni tıńlańlar!
Quday jawızlıq islewden awlaq,
Qúdireti kúshli Quday nahaqlıq islewden awlaq!
11Ol adamnıń isine say tólem tóleydi,
Júrgen jolına say qaytaradı.
12Haqıyqattan da, Quday jamanlıq qılmaydı,
Qúdireti kúshli Quday ádillikti burmalamaydı.
13Jer ústinen húkimdarlıq qılıwdı Oǵan kim berdi?
Kim Onı pútkil dúnyaǵa húkimdar qılıp qoydı?
14Eger Quday Óz ruwxın,
Demin qaytarıp alıwdı qarar qılsa,
15Pútkil tiri janlar birge nabıt bolar,
Adamzat jáne topıraqqa qaytqan bolar edi.

16Aqılıńız bolsa, mınanı tıńlań,
Sózlerime qulaq salıń.
17Ádalattı jek kóretuǵın adam húkimdar bola ala ma?
Ádil hám qúdiretli Qudaydı ayıplamaqshımısız?
18Ol patshaǵa: «Sen jaramassań», – dep,
Aqsúyeklerge: «Sizler zalımsızlar», – deydi.
19Ol basshılarǵa jaramsaqlanbaydı,
Baydı jarlıdan artıq kórmeydi.
Olardıń hámmesin Óz qolları menen jaratqan.
20Olar tún ortasında kózdi ashıp-jumǵansha ólip ketedi,
Qaltıratpa tiyedi de, jan beredi.
Kúshliler de adam qolı tiymey-aq, joq qılınadı.

21Qudaydıń kózleri adamnıń jolın gúzetip turadı,
Ol adam basqan hár bir adımdı kóredi.
22Jawızlıq islewshiler jasırınıw ushın,
Qarańǵılıq ta, túnek te joq.
23Hár qanday adamdı húkim qılıw ushın,
Quday waqıt belgilewi shárt emes.
24Ol teksermey-aq, kúshlilerdi maydalap taslaydı,
Olardıń ornına basqalardı qoyadı.
25Quday olardıń islerin biledi,
Sonlıqtan túnde olardı awdarıp taslaydı, olar joq boladı.
26Olardı zalımlıǵı ushın,
Hámmeniń kóz aldında jazalaydı.
27Olar Qudaydıń izine ermedi,
Onıń jolların itibarǵa almadı.
28Olar sebepli jarlılardıń nalası Oǵan jetip keldi,
Ol azap shekkenlerdiń páriyadın esitti.
29Eger Quday úndemese, kim Onı ayıplay aladı?
Eger Ol júzin jasırsa, kim Onı kóre aladı?
Quday hár bir millet ushın da, hár bir adam ushın da birdey.
30Ol, qudaysızlardıń húkimdarlıq qılıp,
Xalıqqa duzaq qurıwınan saqlaydı.

31Qudayǵa: «Men jazamdı aldım,
Endi jamanlıq qılmayman.
32Kórmegenimdi maǵan úyret,
Nahaqlıq qılǵan bolsam, endi islemeymen», – deytuǵınıńız bar ma?
33Sózlerimnen júz burǵanıńız ushın,
Quday sizdi sıylıqlawı kerek pe?
Men emes, siz tańlawıńız kerek,
Ne bilesiz, aytıń.
34Sanalı adamlar,
Meni tıńlap turǵan danalar maǵan:
35«Ayup bilmegenlikten, solay sóylep tur,
Onıń gápleriniń mánisi joq», – deydi.
36Jawız adam sıyaqlı sóylegeni ushın,
Ayup, siz aqırına deyin sınalsańız edi!
37Siz gúnańızǵa qozǵalańdı da qostıńız,
Aramızda qol shappatlap,
Qudayǵa qarsı gápti balalattıńız.