Job 35 | KaaIBT22L | STEP | Elihu sózin bılay dawam etti:

‏ Job 35

Elihudıń úshinshi sózi

1 Elihu sózin bılay dawam etti:

2 – Ayup, siz: «Qudaydıń aldında haqpan», – deysiz.
Usı durıs dep oylaysız ba?
3 Jáne de: «Mende qanday artıqmashlıq bar?
Gúna islemew arqalı men nege eristim?» – dep soraysız.
4 Men sizge hám doslarıńızǵa juwap beremen.

5 Kóklerge kóz jiberip, qarańlar,
Bultlarǵa kóz jiberiń, olar sizlerden biyik.
6 Eger gúna isleseńiz, bunnan Qudayǵa qanday zıyan keledi?
Eger qılmısıńız kóbeyse, Oǵan qanday tásiri bar?
7 Eger ádil bolsańız, bunnan Qudayǵa ne payda?
Yamasa Ol sizlerdiń qolıńızdan ne aladı?
8 Jawızlıǵıńız ózlerińizge uqsaǵan adamlarǵa zıyan keltiredi.
Al ádilligińiz bolsa, tek adam balası ushın tásir etedi.

9 Eziwshiliktiń hádden tıs kópliginen adamlar páriyad etedi,
Kúshlilerdiń qolınan qutqarıwdı sorap, jalbarınadı.
10 Biraq hesh kim: «Túnde qosıqlar inam etken,
Meniń Jaratıwshım – Quday qayda eken?
11 Ol bizlerge jer betindegi haywanlarǵa qaraǵanda kóbirek úyretken,
Bizlerdi kóktegi quslardan aqıllıraq etip jaratqan», – demeydi.
12 Jawız adamlardıń menmenligi sebepli,
Adamlar páriyad etedi, biraq Quday juwap bermeydi.
13 Awa, Quday bos sózlerge qulaq salmaydı,
Qúdireti kúshli Quday onı itibarǵa almaydı.
14 Ayup, siz: «Onı kórip turǵan joqpan», – deysiz,
Biraq dawa-arzıńız Onıń aldında. Onı kúte turıń!
15 Endi siz: «Ol qáhárlenip, jaza bermedi,
Qılmıs iske de kewil bólmeydi», – deysiz.
16 Usılayınsha, siz mıljıń gáplerdi aytasız,
Hesh nárse bilmey turıp, gápti kóbeytip atırsız.