‏ Job 36

Elihudıń eń keyingi sózi

1Elihu sózin dawam etip, jáne bılay dedi:

2– Biraz sabır qılıńlar, men sizlerge kórseteyin,
Ele Quday ushın aytatuǵın sózlerim bar.
3Men bilimimdi túrli dereklerden topladım,
Jaratıwshımnıń ádilligin dálillep bereyin.
4Shınında, sózlerim de jalǵan emes,
Qarsıńızda bilimi jetik bir adam tur.

5Álbette, Quday qúdiretli,
Biraq Ol hesh kimdi pás kórmeydi,
Onıń qúdireti de, danalıǵı da sheksiz.
6Ol zalımlardıń jasay beriwine jol qoymaydı,
Al jarlılarǵa ádalatlıq qıladı.
7Ol ádillerden kózlerin ayırmaydı,
Olardı patshalar sıyaqlı taxtqa otırǵızıp,
Máńgige mártebeli qıladı.
8Eger ádiller shınjır menen baylanǵan,
Azap duzaǵına túsirilgen bolsa,
9Onda Quday olardıń gúnaların,
Menmensip islegen qılmısların ózlerine kórsetedi.
10Tálim alsın dep, olardıń qulaqların ashadı,
Hám jawızlıqtan bas tartıwdı buyıradı.
11Eger olar Qudayǵa boysınıp, Oǵan xızmet etse,
Onda olardıń qalǵan kúnleri baxıtqa,
Jılları shadlıqqa tolı boladı.
12Al eger olar Qudayǵa boysınbasa, qılıshtan ótkerilip,
Bilim almastan, ólip ketedi.

13Qudaysızlardıń ishi ǵázepke tolı boladı,
Quday olardı kisenlese de, járdem soramaydı.
14Olar jaslay óledi,
Ómiri shermendelik penen ayaqlanadı.
15Quday qıynalǵanlardı shekken azapları arqalı qutqaradı,
Mashqalalarǵa duwshar etiw arqalı Ózin tıńlaytuǵın qıladı.

16Ol sizdi de dártten azat etip,
Qáwipsiz, sheklenbegen keńislikke alıp shıǵar,
Dasturxanıńızdı lázzetli taǵamlarǵa toltırar edi.
17Biraq siz ayıplılar alatuǵın jazanı tolıq alǵansız,
Húkim hám ádalat jaǵańızǵa asılıp alǵan.
18Ǵázepleniwden saqlanıń, baylıq sizdi azǵırmasın,
Mol para da sizdi joldan urmasın.
19Baylıǵıńız, kúsh-qúdiretińiz,
Sizdi dártten qutqara ala ma?
20Sonlıqtan xalıqlar óz ornınan,
Joq qılınatuǵın túndi ańsamań.
21Jawızlıqqa júz burıwdan saq bolıń,
Siz apattan góre, gúnanı tańlaǵan kórinesiz.

Elihudıń Ayupqa Qudaydıń qúdiretin esletiwi

22– Bilip qoyıńız, Qudaydıń qúdireti ullı,
Ol kibi tálim beretuǵın ustaz bar ma?
23Kim Oǵan júretuǵın jolın belgilep beredi?
Yamasa kim Oǵan: «Mına isiń nadurıs», – dep ayta aladı?
24Qudaydıń islerin alǵıslawdı umıtpańız,
Adamlar sol haqqında táriyiplew qosıqların aytadı.
25Barlıq adamlar Onıń islerine tań qalıp,
Hár bir adam olarǵa uzaqtan qaraydı.
26Awa, Quday ullı, bizler Onı túsine almaymız,
Onıń ómir jıllarınıń sanı da aqılǵa sıymaydı.

27Ol suw puwların kóterip alıp,
Olardı jawın tamshılarına aylandıradı.
28Bultlar suw tamshıların tógedi,
Ol adamlardıń ústine nóser bolıp quyadı.
29Bultlardıń qalay jayılatuǵının,
Onıń shatırınan shıqqan gúldirmamanıń qalay gúrkireytuǵının kim túsine aladı?
30Quday kókte shaqmaǵın shaqtırǵanda,
Onı teńizdiń túbinen kóriwge boladı.
31Quday xalıqlarǵa usılay biylik júrgizip,
Mol azıq-awqat beredi.
32Ol shaqmaqtı Óz qollarında saqlap,
Nıshanǵa barıp tiyiwge buyrıq beredi.
33Gúrkirew dawıldan xabar beredi,
Hátte, mallar da dawıldıń bolatuǵının sezedi.