‏ Job 37

1Bunnan júregim dirildep,
Qanasınan shıǵıp keteyin deydi.
2Tıńlańlar! Onıń gúrkiregen dawısına,
Awzınan shıqqan sestine qulaq túrińler!
3Ol pútkil aspan astı boylap shaqmaq shaqtıradı,
Shaqmaqtıń jaltıldısı jerdiń tórt tárepine jetip baradı.
4Bunnan keyin, Qudaydıń dawısı gúrkirep shıǵadı,
Ol ájayıp dawısı menen gúrkireydi,
Onıń dawısı esitilgende, úzliksiz shaqmaq shaǵadı.
5Qudaydıń dawısı ájayıp tárizde gúrkireydi,
Ol bizlerdiń aqılımız jetpeytuǵın ullı islerdi isleydi.
6Ol qarǵa: «Jerge jaw!» – deydi.
Al nóser jawınǵa: «Nóser bolıp quy!» – deydi.
7Sonda hár bir adam isin toqtatadı,
Barlıq adamlar bulardıń Onıń isi ekenin biledi.
8Jabayı haywanlar óz inlerine kirip,
Uyaların panalaydı.
9Dawıl óz mákanınan shıǵıp,
Kúshli samal ayaz alıp keledi.
10Qudaydıń deminen muz payda boladı,
Sheksiz suwlar muzlap qaladı.
11Qoyıw bultlardı ıǵal menen toydıradı,
Olar arqalı shaqmaǵın shaqtıradı.
12Bultlar Onıń basqarıwında aylanıp júredi,
Pútkil jer betin aylanadı,
Bulardıń hámmesin Quday ózlerine buyırǵanı ushın isleydi.
13Ol geyde adamlardı jazalaw ushın,
Al geyde jer júzin suwǵarıp,
Súyispenshiligin kórsetiw ushın jawın jawdıradı.

14Ayup, mınalardı tıńlań,
Toqtap, Qudaydıń ullı isleri haqqında oylap kóriń.
15Qudaydıń bultlardı qalay basqaratuǵının,
Óz bultlarınan shaqmaqtı qalay shaqtıratuǵının bilesiz be?
16Bultlardıń aspanda qalay qalqıp júretuǵının,
Bilimi jetik Qudaydıń káramatlı islerin bilesiz be?
17Qubla samalı esip, jer beti quwrap qalǵanda,
Kiyimlerińiz sizdi terletkende,
18Qola ayna sıyaqlı qattı aspandı,
Siz de Quday sıyaqlı jayıp jibere alasız ba?

19Qudayǵa ne aytıwımız kerekligin bizlerge úyretiń,
Qarańǵılıqta bolǵanlıǵımız sebepli, biz isimizdi qorǵay almaymız.
20Meniń sóylespekshi bolǵanım tuwralı Oǵan birew xabarlay ma?
Kim óziniń nabıt bolıwın qáleydi?
21Samal esip, aspandaǵı bultlardı serpip taslaǵanda,
Jarqıraǵan kún nurına hesh kim qaray almaydı.
22Quday arqadan altın nur taratıp kelmekte,
Ol ájayıp saltanatqa bólengen.
23Bizler Qúdireti kúshli Qudayǵa jete almaymız,
Onıń qúdireti hám ádilligi ullı,
Ádalatlıǵı sheksiz, Ol hesh nahaqlıq qılmaydı.
24Sonlıqtan, háy adamlar! Onnan qorqıńlar!
Ózin dana dep bilgenlerge Ol itibar bermeydi.