‏ Job 38

Jaratqan Iyeniń Ayup penen sóylesiw ushın keliwi

1Sonnan keyin, Jaratqan Iye quyın ishinen Ayupqa bılay dedi:

2– Bilimsiz sózleriń menen,
Danalıq sheshimlerime gúman keltiretuǵınday, sen kim bolıpsań?
3Erkek kibi belińdi bekkem buw,
Men sorayman, sen juwap ber.

4Men jerdiń negizin ornatqanda, sen qay jerde ediń?
Biletuǵın bolsań, maǵan ayt.
5Onıń ólshemin belgilegen kim?
Onıń ústinen jip tartqan kim? Sen onı bileseń-ǵo!
6Jerdiń tiykarları neniń ústine qoyılǵan?
Onıń irgetasın qoyǵan kim?
7Sol waqıtta tań juldızları shadlanıp baqırısıp,
Iláhiy barlıqlar quwanısh penen qıshqırısqan edi.

8Teńiz jer túbinen atılıp shıqqanda,
Oǵan qapılar qoyıp, bóget basqan kim edi?
9Men oǵan bultlardı kiyim,
Qara túnekti jórgek qıldım.
10Shegaralar belgilep,
Teńizge támbilengen qapılar qoydım.
11Sońınan oǵan: «Mına jerge deyin keleseń, onnan ótpeyseń,
Seniń órkókirek tolqınlarıń usı jerde toqtaydı», – dedim.

12Sen ómirińde bir márte bolsa da, tańǵa buyrıq berdiń be?
Yamasa tań shuǵlasına ornın belgilep berdiń be?
13Oǵan jerdiń túp-túpkirlerine jetip barıp,
Zalımlardı jasırınǵan jerinen silkip shıǵarıwdı buyırdıń ba?
14Jer júzi ılayǵa mór basılǵanday bolıp, ózgeredi,
Kiyim kiygendey bolıp bezenedi.
15Zalımlar kún nurınan mahrum etiledi,
Kóterilgen qolları sındırıladı.

16Sen teńizdiń suw kózlerine túsip kórdiń be?
Yamasa teńiz túbin izertlep kórdiń be?
17Saǵan óliler mákanınıń dárwazaları kórsetilip pe edi?
Yamasa qara túnektiń dárwazaların kórip pe ediń?
18Jer keńisligin túsindiń be?
Eger bulardıń hámmesin bilgen bolsań, onda túsindir!

19Nurdıń mákanına alıp baratuǵın jol qayda?
Al qarańǵılıqtıń mákanı qay jerde?
20Olardı óz ornına qaytara alasań ba?
Olardıń úyine baratuǵın joldı bileseń be?
21Awa, sen bileseń! Sen olardan burın tuwılǵansań!
Júdá uzaq ómir kórip atırsań!

22Sen qar saqlanatuǵın jerge kirdiń be?
Yamasa burshaq saqlanatuǵın jerdi kórdiń be?
23Men olardı apat kúnleri ushın,
Urıs hám sawash kúnleri ushın saqlap qoyıppan.
24Jaqtılıqtıń qay jerden kelip,
Shıǵıs samalınıń qay jerden baslanatuǵının bileseń be?
25Kim nóser jawın ushın arna,
Jıldırım ushın jol ashtı?
26Adam jasamaytuǵın jerlerge,
Bos qalǵan shóllerge jawın jawdıratuǵın kim?
27Kereksiz quw shóldi suwǵa qandırıp,
Ol jerlerge shópler ósiretuǵın kim?
28Jawınnıń ákesi bar ma?
Shıq tamshıların dúnyaǵa keltirgen kim?
29Muz kimniń qursaǵınan shıqtı?
Aspannan túsken qırawdı kim tuwdı?
30Suwlar tastay bolıp qatıp qaladı,
Teńizdiń beti muzlap qaladı.

31Úrkerdiń shınjırların baylay alasań ba?
Yamasa Orionnıń jiplerin sheshe alasań ba?
32Juldızlar toparın óz waqtında shıǵara alasań ba?
Yamasa Jeti qaraqshını balaları menen birge jeteley alasań ba?
33Sen aspanǵa tiyisli qaǵıydalardı bileseń be?
Yamasa sol nızamlardı jer betinde ornata alasań ba?

34Ústime nóser jawın jawsın dep,
Bultlarǵa baqırıp, buyrıq bere alasań ba?
35Shaqmaqlarǵa shaǵıwdı buyıra alasań ba?
Olar saǵan: «Bizler seniń xızmetińdemiz», – der me eken?
36Júrekke danalıq,
Aqılǵa túsinik bergen kim?
37Bultlardı sanawǵa kimniń danalıǵı jetedi?
Kim aspandaǵı suw meslerin awdarıp taslay aladı?
38Sonda shań ılayǵa aylanıp,
Kesekler bir-birine jabısadı.

39– 40Jas arıslanlar uyasında jasırınıp,
Urǵashı arıslan olja ańlıp, puta astında jatırǵanda,
Sen urǵashı arıslanǵa olja tutıp bere alasań ba?
Yamasa jas arıslanlardıń qarnın toydıra alasań ba?
41Ǵarǵanıń balaları ashlıqtan qańǵıp júrip,
Qudayǵa jalınǵanda,
Olardı azıq penen támiyinleytuǵın kim?