‏ Job 39

1Sen taw eshkisiniń qashan tuwatuǵının bileseń be?
Yamasa suwınnıń balalaǵanına qarap turǵanbısań?
2Olardıń qansha ay buwaz bolıp júretuǵının bileseń be?
Olardıń balalaytuǵın waqtın she?
3Olar tolǵatqanda, júresine otırıp,
Balasın dúnyaǵa keltiredi.
4Olardıń balaları ashıq jaylawlarda ósip, kúshke toladı,
Keyin ketip, qaytıp kelmeydi.

5Qulanǵa erkinlik bergen kim?
Jabayı eshektiń arqanın sheship taslaǵan kim?
6Men shól dalanı oǵan úy,
Shorlı jerlerdi mákan qılıp berdim.
7Ol qaladaǵı shawqım-súren ústinen kúledi,
Mal aydawshınıń baqırısın esitpeydi.
8Ol otlaw ushın tawlardı sharlap,
Ózine kók jaylaw izleydi.

9Jabayı buǵa saǵan xızmet etiwge ırazı bolıp,
Seniń qorańdaǵı aqırıńnıń janında túner me eken?
10Jerińdi aydatıw ushın,
Onı júwenlep, gúndege qosa alasań ba?
11Kúshli dep, oǵan isene alasań ba?
Awır islerińdi oǵan tapsıra alasań ba?
12Jabayı ógizdiń eginińdi tasıp,
Qırmanıńa alıp keletuǵınına iseneseń be?

13Túyequs qanatların gárdiyip qaqsa da,
Ol láylektiń qanat hám párine jetpeydi.
14Túyequs máyeklerin jerge qaldırıp ketedi,
Al qum olardı jılıtadı.
15Máyekler ayaq astında qalıp, eziledi,
Jabayı haywan olardı basıp ketpey me, bunı hesh oylamaydı.
16Túyequs óz balalarına basqaniki sıyaqlı qatal,
Miynetiniń kúyip ketiwinen qáweterlenbeydi.
17Óytkeni Men onı danalıqtan mahrum etkenmen,
Oǵan aqıl da bermegenmen.
18Biraq túyequs qanat jayıp juwırǵanda,
At hám shabandozdı izde qaldırıp, ústinen kúledi.

19Atqa kúsh bergen,
Onıń jelkesine jal ósirgen,
20Onı shegirtke kibi sekiretuǵın qılǵan sen be ediń?
Onıń pısqırıp kisnegeniniń ózi qorqınıshlı.
21At tuyaqları menen jer tepsinip, óz kúshine quwanıp,
Dushpannıń ústine qaray shabadı.
22Ol qorqınısh ústinen kúlip qarap, hesh nárseden seskenbeydi,
Qılıshtan da qaymıqpaydı.
23Oq salınǵan qap ústinde shıńǵırlaydı,
Nayza hám semser jaltıldaydı.
24Ǵázep penen rehimsiz jerdi tepkilep,
Kárnay sestin esitkende, bir jerde turmaydı,
25Kárnay shertilgen sayın kisnep,
Sawashtıń iyisin alıstan sezedi,
Sárkárdalardıń shawqım-súrenlerin esitedi.

26Qarshıǵanıń qublaǵa qaray qanat jayıp,
Biyiklep ushatuǵını seniń danalıǵıńnıń arqası ma?
27Búrkit seniń buyrıǵıń menen kóterilip ushıp,
Biyiklikke uya sala ma?
28Ol jartaslar ústine mákan basıp, sol jerde jasaydı,
Jartastıń usha bası – onıń qorǵanı.
29Ol sol jerde turıp, ań awlaydı,
Onıń kózleri oljasın uzaqtan kóredi.
30Palapanları qan sorıydı,
Ólik qay jerde bolsa, ol da sol jerde boladı.

31Jaratqan Iye sózin dawam etip, Ayupqa bılay dedi:

32– Qúdireti kúshli Quday menen tartısıp atırǵan adam,
Endi Onı jolǵa salmaqshı ma?
Qudaydı ayıplap atırǵan adam juwap bersin.

33Sonda Ayup Jaratqan Iyege bılay dep juwap berdi:

34– Men sanda joq bir adamman,
Saǵan ne dep juwap bereyin?
Endi awzıma bek bolaman.
35Bir ret sóyledim, biraq juwap bere almadım,
Ekinshi ret sóyledim, biraq endi sóylemeymen.