‏ Job 4

Elifazdıń birinshi sózi

1Sonda temanlı Elifaz Ayupqa bılay dedi:

2– Eger birew saǵan sóz aytpaqshı bolsa,
Saǵan awır batpay ma?
Aqırı, kim sóylewden ózin tıyıp tura aladı?
3Eslep kór, sen kóplerge tálim berer,
Hálsizlerdi jigerlendirip, kúsh berer ediń.
4Seniń sózleriń jıǵılǵanǵa tirek bolıp,
Dizeleri qaltırap, hálsiregenlerge kúsh beretuǵın edi.
5Al endi sol nárseler óz basıńa túskende,
Túskinlikke túsip qalıpsań,
Óziń baxıtsızlıqqa ushıraǵanda,
Ruwxıń túsip ketipti.
6Qudaydan qorqıwıń – isenimińniń,
Minsiz jasawıń – úmitińniń belgisi emes pe?

7Oylap kórshi: qashan ayıpsız adam nabıt bolıp,
Ádil adam joq qılınǵan edi?
8Meniń kórgenim mınaw: kim jawızlıqtı shúdigarlap,
Ǵam-qayǵı tuqımın ekse, sonı orıp aladı.
9Olar Qudaydıń úplegen deminen nabıt boladı,
Onıń ǵázebiniń dawılınan joq boladı.
10Arıslanlar aqırıp, ırıldassın,
Biraq Quday jırtqısh arıslanlardıń tislerin sındıradı.
11Sonda arıslan oljasız ólip ketedi,
Jetim qalǵan balaları tarap ketedi.

12Maǵan jasırınsha bir sóz keldi,
Sıbırlısı qulaǵıma shalındı.
13Túngi táshiwishli tústen tuwǵan oylar ishinde,
Adamlar qattı uyqıǵa shúmgen waqıtta,
14Meni qorqıw biylep alıp, qaltıratpa bastı,
Pútkil denem lárzege keldi.
15Samal betimdi sıypap ótti,
Sonda tóbe shashım tik turdı.
16Bir súlder turǵanday boldı,
Biraq men onıń ne ekenin túsinbedim.
Kóz aldımda bir tulǵa payda boldı,
Tınıshlıq húkim súrdi hám men ólpeń dawıstı esittim:
17«Adamzat Qudaydıń aldında ádil bola ala ma?
Adam óz Jaratıwshısınıń aldında pák bola ala ma?
18Quday, hátte, Óziniń aspandaǵı xızmetshilerine de isenbeydi,
Hátte, perishtelerinen de kemshilik tabadı.
19Sonda tiykarı topıraqtan bolǵan,
Ílaydan jaratılǵan,
Jánliktey ańsat jenshilip qalatuǵınlarǵa ne boladı?
20Olar kún shıqqannan ımırt jabılǵanǵa shekemgi aralıqta nabıt boladı,
Olardıń máńgige joq bolǵanın bayqamay da qalasań.
21Olardıń shatırlarınıń ishindegi jipleri úzilgen,
Danalıqtan xabarsız ólip ketedi».