‏ Job 40

1Sonnan keyin, Jaratqan Iye quyın ishinen Ayupqa bılay dedi:

2– Erkek kibi belińdi bekkem buw,
Men sorayman, sen juwap ber.
3Sen Meni ádalatsızlıqta ayıplamaqshımısań?
Ózińdi aqlaw ushın meni qaralamaqshımısań?
4Sende Qudaydıń, yaǵnıy Meniń qúdiretimdey qúdiret bar ma?
Dawısıń Meniki sıyaqlı gúrkirey ala ma?
5Eger solay bolsa, onda ózińdi dańq hám bálent mártebe menen beze,
Ullılıq hám saltanatqa bólen.
6Ǵázebińdi tógip, shash,
Tákabbirlerge kóz salıp, olardı boysındır.
7Tákabbirlerge názer salıp, olardı diz shóktir.
Jawızlardı turǵan jerinde mıljalap tasla.
8Olardıń hámmesin birge topıraqqa kóm,
Júzin kepinge orap, qarańǵı dúnyaǵa baylap qoy.
9Sonda oń qolıńnıń seni qutqarǵanın,
Men de moynıma alayın.

10Mına begemotqa qara,
Seni jaratqanım sıyaqlı, onı da Men jarattım.
Ol ógiz sıyaqlı shóp jeydi.
11Onıń belinde ne degen kúshi bar,
Qarnındaǵı bulshıq etleri qanday bekkem!
12Onıń quyrıǵı kedr aǵashı sıyaqlı mıqlı,
Jambasındaǵı sińirleri órim-órim.
13Súyekleri qola bórenelerge,
Qabırǵaları temir baqanlarǵa uqsaydı.
14Begemot Meniń jaratqanlarım ishindegi eń ájayıbı,
Jaratqannıń Ózi ǵana oǵan qılısh kótere aladı.
15Tawlar oǵan azıq beredi,
Ol jerde barlıq jabayı haywanlar oynaqlap júredi.
16Begemot lotos japıraǵı astında,
Batpaqlıqta ósken qamıslar arasında jatadı.
17Lotos japıraqları oǵan kóleńke túsirip,
Dárya boyındaǵı tallar onı orap turadı.
18Dárya burqasınlap aqsa da, ol qorqpaydı,
Iordan tasıp, awzına kelse de, oǵan tásir etpeydi.
19Kim onı kózine túspey, tuta aladı?
Kim onıń murnınan ilmek ótkere aladı?

20Al Liwyatandı ▼

▼ Liwyatan – teńizde jasaytuǵın úlken maqluq.

she, balıq uslaytuǵın qarmaq penen uslap,
Tilin jip penen baylay alasań ba?
21Onıń murnınan jip ótkizip,
Jaǵına qarmaq ildire alasań ba?
22Ol saǵan qayta-qayta jalınıp-jalbarınıp,
Seniń menen jıllı sóyleser me eken?
23Saǵan máńgige qul bolıw ushın,
Seniń menen kelisim dúzer me eken?
24Qus penen oynaǵan sıyaqlı, onıń menen oynay alasań ba?
Yamasa ermek qılıwı ushın, qızlarıńa onı baylap bere alasań ba?
25Balıqshılar onıń ushın sawdalasa ma?
Sawdagerler onı óz ara bólisip ala ma?
26Onıń terisin nayza menen,
Basın balıqshınıń shanıshqısı menen tese alasań ba?
27Qolıńdı oǵan tiygizip kór,
Ekinshi márte tiygizbeytuǵın bolasań,
Bul sawashtı da hesh qashan umıtpaytuǵın bolasań.