‏ Job 41

1Liwyatandı tutıwǵa úmit etiw paydasız,
Onıń qarası kóriniwden-aq, qorqınıshtan adamnıń júregi jarıladı.
2Onı qozǵawǵa hesh kimniń batılı barmaydı.
Solay eken, onda kim Meniń aldımda tura aladı?
3Oǵan qarızdar bolıp qalatuǵınday, kim Maǵan bir nárse berdi eken?
Aspan astındaǵı hámme nárse – Meniki.

4Men Liwyatannıń dene aǵzaları,
Ullı kúshi hám ájayıp denesi haqqında aytıp bereyin.
5Kim onıń terisin sılıp ala aladı?
Kim onıń eki qabat sawıtın tesip zaqımlay aladı?
6Kim onıń awzın ashıp kóre aladı?
Onıń awzındaǵı tisleri qorqınıshlı.
7Arqası qatar-qatar qalqannan islengen,
Olar mór basılǵanday etip, bir-birine tıǵız bekkemlengen.
8Olardıń bir-birine jaqın jaylasqanı sonshelli,
Arasınan hawa da ótpeydi.
9Olar bir-birine tıǵızlanıp, jabıstırılǵan,
Olardı ajıratıw múmkin emes.
10Liwyatan túshkirgende, ot shashadı,
Onıń kózleri tań nurı sıyaqlı jaynap turadı.
11Awzınan jalın lawlap,
Ot ushqınları shashıraydı.
12Murnınan shıqqan tútin,
Janıp turǵan qamıs ústinde qaynap turǵan qazannıń puwına uqsaydı.
13Demi kómirdi alıstıradı,
Awzınan jalın shashadı.
14Onıń kúshi moynında,
Onıń aldında qorqınısh oyınǵa túsedi.
15Etiniń qabatları bir-birine bekkem jabısqan,
Quymaǵa uqsaydı, hesh terbelmeydi.
16Júregi tastay,
Digirmannıń astınǵı tasınday qattı.
17Ol ornınan turǵanda, kúshlilerdiń de húreyi ushadı,
Qorqınıshtan artqa sheginedi.
18Onı qılısh ta kespeydi,
Oǵan nayza da, qanjar da, oq ta ótpeydi.
19Temir oǵan saban kibi,
Qola shirigen terek kibi kórinedi.
20Atılǵan oqlar onı qashıwǵa májbúrley almaydı,
Saqpannan atılǵan tas ol ushın qawıqtay nárse.
21Shoqmar menen urǵan oǵan saban menen urǵanday,
Ózine ılaqtırılǵan semserlerdiń sestine kúledi.
22Denesiniń astınǵı teńgeleri gúzeniń ótkir sınıqlarına uqsaydı,
Ílaydıń ústinde jatsa, túyek aydalǵanday iz qaldıradı.
23Túpsiz tereń iyirimdi ol qazan kibi qaynatadı,
Teńizdi qaynap turǵan may kibi tastıradı.
24Ol izinde nurlı iz qaldıradı,
Kórgenler teńizdiń aq shashı bar dep oylaydı.
25Jer betinde onıń teńi-tayı joq,
Ol qorqınıshtı bilmeytuǵın etip jaratılǵan.
26Ol barlıq tákabbirlerge pás názer menen qaraydı,
Hám barlıq menmenlerdiń patshası.