Job 42 | KaaIBT22L | STEP | Sonda Ayup Jaratqan Iyege bılay dep juwap berdi:

‏ Job 42

Ayuptıń táwbe etiwi

1 Sonda Ayup Jaratqan Iyege bılay dep juwap berdi:

2 – Men bilemen, Seniń qolıńnan hámme nárse keledi,
Niyetińe kesent etiw de múmkin emes.
3 Sen: «Bilimsizlik penen Meniń qararımdı qaralap atırǵan,
Mına adam kim ózi?» – dep soraǵan ediń.
Awa, men ózim túsinbegen nárseler haqqında,
Hasla túsiniwge aqılım jetpeytuǵın ullı isler haqqında sóyledim.
4 Sen jáne: «Sen dıqqat penen tıńla, Men sóyleyin,
Men sorayın, sen juwap ber», – degen ediń.
5 Burın men Sen tuwralı tek qulaqlarım menen esitken edim,
Al házir Seni óz kózlerim menen kórip turman.
6 Sonlıqtan burınǵı aytqanlarıma ókinip,
Táwbe qılıp, topıraq penen kúlde otırman.

Jaratqan Iyeniń qararı

7 Jaratqan Iye Ayup penen sóylesip bolǵannan soń, temanlı Elifazǵa til qatıp, bılay dedi:

– Meniń saǵan hám seniń eki dostıńa qáhárim keldi. Sizler Men tuwralı qulım Ayup sıyaqlı durıs sóylemedińler. 8 Endi jeti buǵa hám jeti qoshqar alıp, qulım Ayupqa barıńlar hám ózlerińiz ushın jandırılatuǵın qurbanlıq usınıńlar. Qulım Ayup sizler ushın duwa etedi. Men onıń duwasın qabıl etemen hám aqmaqlıǵıńız ushın sizlerdi jazalamayman. Sizler Men tuwralı qulım Ayup sıyaqlı durıs sóylemedińler.

9 Solay etip, temanlı Elifaz, shuwaxlı Bildad hám naamalı Sofar Jaratqan Iyeniń aytqanların orınladı. Jaratqan Iye de Ayuptıń duwasın qabıl etti.

Qudaydıń Ayuptı qayta jarılqawı

10 Ayup dosları ushın duwa etkennen soń, Jaratqan Iye onıń hal-jaǵdayın burınǵı abadanshılıǵına qaytarıp, burın bolǵan nárseleriniń hámmesin eki ese qılıp qaytarıp berdi. 11 Ayuptıń aǵa-inileri, apa-qarındasları hám onı burın tanıǵannıń hámmesi onıń úyine kelip, Ayup penen birge awqatlandı. Olar Jaratqan Iyeniń basına salǵan barlıq sınaqları ushın Ayupqa kewil ayttı hám táselle berdi. Olardıń hár biri Ayupqa bir kesita ^{▼▼ Kesita – qanday da bir ólshem birlik, onıń awırlıǵı belgisiz.} gúmis hám bir altın sırǵadan sıyǵa berdi.

12 Jaratqan Iye Ayuptıń sońǵı kúnlerin burınǵısınan da beter jarılqadı. Endi onda on tórt mıń qoy, altı mıń túye, bir mıń jup ógiz hám mıń urǵashı eshek boldı. 13 Jáne de, Ayuptıń jeti ul hám úsh qızı boldı. 14 Ol birinshi qızına Emima, ekinshisine Kesia, úshinshisine Keren-Happux dep at qoydı. 15 Úlkeniń hesh bir jerinde Ayuptıń qızlarınday sulıw qızlar bolmadı. Ákesi Ayup qızlarına aǵa-inileri menen birdey miyras ajıratıp, enshige berdi.

16 Bunnan keyin, Ayup jáne bir júz qırıq jıl jasap, tórt áwlad kórdi. 17 Solay etip, Ayup uzaq hám mazmunlı ómir súrip, dúnyadan kóz jumdı.