‏ Job 5

Elifaz sózin dawam etedi

1– Al endi, Ayup, shaqırǵıń kelse, shaqır! Saǵan juwap bergendey, birew bar ma eken?
Perishtelerdiń qaysısınan járdem soramaqshısań?
2Ashıw-ǵázep aqmaqtı nabıt qılar,
Kúnshillik sadanı óltirer,
3Men aqmaqtıń tamır jayǵanın kórdim,
Biraq tosattan onıń úy-ishi ǵarǵısqa ushıradı.
4Onıń balaları amanlıqtan awlaq bolar,
Húkim waqtında eziler,
Biraq olardı jaqlaytuǵın hesh kim bolmas.
5Onıń zúráátin ashlar jep qoyar,
Hátte, tikenler arasında óskenlerin de.
Ashkózler mal-múlkin de alıp keter.
6Jawızlıq jerden ósip shıqpaydı,
Ǵam-qayǵı da atızda óspeydi.
7Degen menen, ot ushqınınıń joqarı qarap ushqanı sıyaqlı,
Azap shegiw ushın tuwılar insan.

8Biraq men Qudaydı izlegen,
Dawa-arzımdı Oǵan tapsırǵan bolar edim.
9Ol aqılǵa sıymaytuǵın, ullı islerdi islep,
Sansız káramatlar kórseter.
10Ol jer betine jawın jawdırıp,
Atızlardı suwǵarar.
11Ol tómen awhaldaǵılardı joqarı kóterip,
Qayǵıǵa batqanlardı qáwipsizlikke shıǵarar.
12Ol hiylekerlerdiń niyetlerine tosqınlıq jasap,
Olardı tabıstan mahrum eter.
13Ol danalardı ózleriniń mákkarlıǵı arqalı qolǵa túsirip,
Hiylekerlerdiń oyların pushqa shıǵarar.
14Kúndiz olar qarańǵılıqqa tap bolar,
Tal túste de túndegidey sıypalanıp júrer.
15Quday jarlını jamanlardıń ashshı sózlerinen,
Kúshlilerdiń qolınan qutqarar.
16Solay eken, kámbaǵallarda úmit bar,
Nahaqlardıń awzı jabılar.

17Quday eskertip, dúzetetuǵın adam qanday baxıtlı!
Sonlıqtan Qúdireti kúshli Qudaydıń úgit-násiyatın pisent etpey júrme.
18Ol jaralaydı hám Ózi onı tańadı,
Ol zıyan keltiredi, biraq Óz qolı menen shıpalaydı.
19Ol seni altı baxıtsızlıqtan qutqaradı,
Jetinshi apat ta saǵan zıyan keltire almaydı.
20Asharshılıqta ólimnen,
Urısta qılıshtan saqlaydı.
21Ol seni til bálesinen qorǵaydı,
Apat kelgende qorqpaytuǵın bolasań.
22Wayranshılıq hám ashlıq ústinen kúletuǵın bolasań,
Jabayı haywanlardan da qorqpaytuǵın bolasań.
23Daladaǵı taslar menen til tabısasań,
Jabayı haywanlar da seniń menen tatıw boladı.
24Sen úyińniń qáwipsizlik ishinde ekenin bileseń,
Súriw hám padalarıńdı kózden ótkergenińde,
Hesh nárseńniń joǵalmaǵanın kóreseń.
25Seniń sansız balalarıń boladı,
Urpaǵıń jer betindegi shóp sıyaqlı mol boladı.
26Óz waqtında buwılǵan biyday bawı kibi,
Jasarıńdı jasap, qábirińe kireseń.

27Mine, bizler bunı izertledik, hámmesi haqıyqat eken,
Usılardı tıńlap, qabıl qıl.