‏ Job 6

Ayuptıń juwabı

1Sonda Ayup bılay dep juwap berdi:

2– Ah, eger meniń shegip atırǵan qayǵım ólshenip,
Men kórgen apatshılıq tárezige tartılsa edi!
3Olar teńiz qumınan da awır bolar edi.
Sonlıqtan oylanbay sóyledim.
4Qúdireti kúshli Qudaydıń oqları deneme qadaldı,
Ruwxım olardıń záhárin ishpekte,
Quday jibergen qorqınısh maǵan qarsı sapqa dizilgen.
5Qulannıń jaylawda otı mol bolsa, ańqırar ma edi?
Yamasa ógiz aqırınıń basında móńirer me edi?
6Awqattıń duzsız dámi bola ma?
Yamasa máyektiń aq uwızında dám bar ma?
7Bunday awqatlardan dám tatqım kelmeydi,
Onday awqatlardan júregim aynıydı.

8Eger tilegim orınlanıp,
Quday ármanıma jetkizse edi!
9Quday meni ezip taslasa edi,
Qolın sozıp janımdı alsa edi!
10Sonda men jubanısh tabar edim,
Qattı awırıp atırsam da, quwanar edim.
Sebebi men muxaddes Qudaydıń sózlerinen júz burmadım.
11Kúshti qaydan tabaman kútetuǵınday?
Aqıbetim ne bolar sabır qılatuǵınday?
12Meniń kúshim tastan ba edi?
Yamasa denem temirden be edi?
13Ózime ózim járdem bergendey kúshim qaldı ma?
Tabıs ta meni tárk etti.

14Dostına miyrim kórsetiwden bas tartqan adam,
Qúdireti kúshli Qudaydan qorqıwdan waz keshken adam boladı.
15Doslarım, sizler de qurıp qalǵan say kibi turaqsızsız,
Aǵıp ketetuǵın say suwlarına uqsaysız.
16Olar muz erigende ılaylanıp tasıp,
Qar suwlarına tolıp ketedi.
17Biraq qurǵaq máwsimde olardıń suwları tartılıp,
Íssıda joq bolıp ketedi.
18Kárwanlar suw izlep, baǵıtın ózgerter,
Shólge kirip ketip, nabıt bolar.
19Tema jurtınıń kárwanları suw izler,
Sheba jurtınıń sawdagerleri úmit penen qarar.
20Olar óz úmitine aldanar,
Sol jerge kelip, albırap qalar.
21Sizler de men ushın sol saylar sıyaqlısız,
Meniń qorqınıshlı awhalımdı kórip, húreyińiz ushıp ketti.
22Men sizlerden sawǵa sorap pa edim?
Yamasa men ushın baylıǵıńızdan tólem tóleń dedim be?
23Meni dushpan qolınan qutqarıń dep jalındım ba?
Yamasa qaraqshılardıń qolınan meni satıp alıń dedim be?

24Maǵan úyretiń, úndemey turayın,
Kórsetińler, men nede aljastım?
25Tuwrı sóz qanday ashshı!
Biraq sizlerdiń ayıplawlarıńız neni dálilleydi?
26Sizler meniń sózlerimdi dúzetpekshimisiz?
Ezilgen adamnıń sózlerin itibarǵa ılayıqsız dep sanaysızlar ma?
27Sizler, hátte, jetimler ushın shek taslawdan,
Doslarıńızdı sawdaǵa salıp, satıwdan tayınbas edińiz.
28Endi ótinemen, maǵan qarańlar,
Betińizge qarap, ótirik sóylemeymen ǵoy.
29Raydan qaytıń, endi ádalatsız bolmańlar,
Raydan qaytıń, men haqpan!
30Yamasa awzımnan ádalatsız sózler shıqqan ba edi?
Yaki tilim apatshılıqtıń dámin ayıra almay ma?