‏ Job 7

Ayuptıń ómirden nalıwı

1Adamnıń jerdegi turmısı awır miynetten ibarat emes pe?
Onıń kúnleri kúnlikshiniń kúnine uqsamay ma?
2Adam keshki kóleńkeni ańsaǵan qulǵa,
Miynet haqısın kútken kúnlikshige uqsaydı.
3Sol sıyaqlı, úles etip mánissiz aylar berildi,
Payıma azaplı kesheler tiydi.
4Jatqanımda: «Qashan turar ekenmen?» – dep aytaman,
Biraq tún uzaqqa sozılıp,
Tań atqansha, órden-ıqqa awnap shıǵaman.
5Denemdi qurt penen jara basqan,
Terim tesilip, iriń aqpaqta.
6Kúnlerim toqıwshınıń mákisinen de tezirek ótpekte,
Biraq úmitsiz juwmaqlanbaqta.

7Quday, ómirimniń bir dem sıyaqlı ekenin umıtpa,
Kózim endi qaytıp jaqsılıqtı kórmeydi.
8Meni kórip turǵan kózleriń keyin meni kórmeydi,
Kózleriń meni izleydi, biraq men joq bolaman.
9Bulttıń serpilip, joq bolıp ketkenindey,
Óliler mákanına ketken adam da qaytıp kelmeydi.
10Ol úyine qaytıp kelmeydi,
Jasaǵan jeri de endi onı eske almaydı.

11Sonıń ushın awzıma erk beremen,
Óz dártimdi bayan etemen.
Janımnıń azabı ishinde shaǵım etemen.
12Qudayım, Sen maǵan saqshı qoyatuǵınday,
Men ne, teńiz yamasa teńiz aydarhası ma edim?
13Tósegim maǵan táselle berer,
Jatsam, dártim jeńilleser, dep oylasam,
14Meni túsler arqalı qorqıtıp,
Ayanlar arqalı zárremdi ushırasań.
15Bul denede jasaǵannan góre,
Buwılıp, ólgenim jaqsı edi.
16Men jasawdan toydım, máńgi jasawdı qálemeymen,
Meni tınısh qoy, ómirim ózi bir demdey ǵana.

17Insan kim ózi, onı sonsha qádirlep,
Oǵan dıqqat qoyasań,
18Hár tańda onı tekserip,
Hár sátte onı sınaysań?
19Qashanǵa shekem mennen kóz úzbeyseń?
Túkirigimdi jutıp alǵansha da, meni tınısh qoymaqshı emespiseń?
20Eger gúna islegen bolsam, Saǵan ne tásiri bar, adamzattıń Baqlawshısı?
Ne ushın meni Ózińe nıshan qılıp qoydıń?
Men Saǵan sonshelli júk boldım ba?
21Ne ushın qılmıslarımdı keshirip,
Gúnalarımdı mennen alıp taslamaysań?
Sebebi tez arada topıraqqa qaytaman.
Meni izleyseń, biraq men joq bolaman.