Job 8 | KaaIBT22L | STEP | Sonda shuwaxlı Bildad Ayupqa bılay dedi:

‏ Job 8

Bildadtıń birinshi sózi

1 Sonda shuwaxlı Bildad Ayupqa bılay dedi:

2 – Qashanǵa deyin usı sózlerińdi dawam eteseń?
Awzıńnan shıqqan sózleriń dawılǵa uqsaydı.
3 Quday ádillikti burmalay ma?
Qúdireti kúshli Quday haqıyqattı burmalay ma?
4 Balalarıń Oǵan qarsı gúna isledi.
Sonlıqtan Quday da olardı gúnaları ushın jazalaǵan.
5 Biraq, sen eger Qudaydı shaqırıp,
Qúdireti kúshli Qudayǵa jalbarınsań,
6 Eger sen pák hám ádil bolsań,
Onda Ol saǵan járdemge kelip,
Seni ılayıqlı orınǵa qaytaradı.
7 Sonda baslanıwı kishkene bolsa da,
Keleshegiń ullı boladı.

8 Ótinemen, ótken áwladlardan sorap kór,
Olardıń ata-babalarınıń nelerdi izlep bilgenin qarap kór.
9 Bizler keshe tuwıldıq, hesh nárse bilmeymiz,
Bizlerdiń jer betindegi kúnlerimiz kóleńkedey ótkinshi.
10 Olar saǵan úyretip, násiyat beredi,
Júreklerindegi sózlerin sóylep beredi.

11 Batpaqlıq joq jerde papirus ^{▼▼ Papirus – batpaqlıq jerlerde ósetuǵın qamısqa uqsaǵan ósimlik.} óse me?
Suwsız jerde qamıs boy soza ma?
12 Hátte, olar kógerip turıp, ele orılmay atırıp-aq,
Hámme shóplerden burın quwrap qaladı.
13 Qudaydı umıtqanlar da keleshekte sol kúyge túsedi,
Qudaysızlardıń úmiti de solay qurıydı.
14 Olardıń isengeni mort,
Súyengeni órmekshiniń awınday.
15 Sonday adam óz úyine súyense, úy tura almaydı,
Bekkem uslasa da, ol shıdam bere almaydı.
16 Qudaysız adam quyash astında suwı mol jerde,
Ósip turǵan ósimlikke uqsaydı,
Onıń shaqaları baǵ ústinde jayılıp turadı.
17 Tamırları tas úyindilerin orap alıp,
Taslardıń arasına ornalasıp aladı.
18 Al eger ósimlik sol jerden julıp taslansa,
Sol jerdiń ózi onnan tanıp: «Seni hesh qashan kórmedim», – deydi.
19 Onıń ómiriniń quwanıshı mine, usılay ayaqlanadı!
Al topıraqtan bolsa, basqa ósimlikler ósip shıǵadı.

20 Quday minsiz adamdı tárk etpeydi,
Jawızlıq islegenlerdi de qollamaydı.
21 Ol jáne, seniń awzıńdı kúlkige,
Erinlerińdi shadlıq hawazına toltıradı.
22 Sonda dushpanlarıń uyatqa qaladı,
Zalımlardıń shatırı wayran boladı.