‏ Job 9

Ayuptıń juwabı

1Sonda Ayup bılay dep juwap berdi:

2– Awa, ıras, bunıń sonday ekenin men de bilemen,
Biraq insan Qudaydıń aldında qalay aqlana aladı?
3Eger adam Quday menen tartıspaqshı bolsa da,
Ol bergen mıń sorawdan birewine de juwap bere almas edi.
4Qudaydıń danalıǵı tereń, qúdireti kúshli,
Onıń menen qasarısıp, Kim aman qala aldı?
5Aldın ala eskertpey-aq, Ol tawlardı jıljıtar,
Ǵázeplengende, olardı awdarıp taslar.
6Ol jerdi ornınan qozǵap, silkiter,
Onıń tireklerin titireter.
7Ol quyashqa buyrıq berse, quyash uyasınan shıqpay qoyar,
Juldızlardı da qulıplap qoyar.
8Onıń jalǵız Ózi kóklerdi jayǵan,
Ol teńiz tolqınları ústinde júrer.
9Ol Jeti qaraqshını, Oriondı,
Úrkerdi hám qubladaǵı juldızlardıń hámmesin jarattı.
10Ol aqılǵa sıymaytuǵın, ullı islerdi islep,
Sansız káramatlar kórseter.
11Eger Ol qasımnan ótip ketse de, men Onı kórmeymen,
Jaqınlap ótip ketse de, men Onı bayqamayman.
12Eger Ol alıp qoysa, Onı kim toqtata aladı?
Kim Oǵan: «Sen ne qılıp atırsań?» – dep ayta aladı?
13Quday Óz ǵázebin tutıp turmaydı,
Rahabtıń ▼

▼ Rahab – Liwyatannıń (3:8) basqa atı.

járdemshileri de Onıń ayaǵına jıǵıladı.

14Solay eken, men qalay Oǵan juwap bere alaman?
Oǵan aytıw ushın sózlerdi qaydan tabaman?
15Ayıpsız bolsam da, Oǵan juwap bere almas edim,
Men tek Qazımnan rehim etiwin ǵana sorap jalbarınar edim.
16Eger Onı dawıslap shaqırsam, Ol da maǵan juwap berse edi.
Biraq, meniń dawısıma qulaq salatuǵınına isenbeymen.
17Ol meni dúbeley menen soqqılap, azap bermekte,
Ayıpsızdan ayıpsız jaralarımdı kóbeytpekte.
18Ol dem alıwǵa da jol qoymaydı,
Júregimdi qayǵıǵa toltırıp atır.
19Eger kúsh sınalsa, Ol kúshli!
Eger ádalat soralsa, Onı kim qazıxanaǵa alıp kele aladı?
20Ayıpsız bolsam da, óz awzım meni ayıplı eter,
Eger, hátte, minsiz bolsam da, Ol meni nahaqqa shıǵarar.

21Men minsizben, biraq endi maǵan bári bir,
Óz ómirimnen túńilip turman.
22Awa, bári bir eken. Sonlıqtan men bılay deymen:
«Quday ayıpsızdı da, ayıplını da nabıt qıladı».
23Baxıtsızlıq tosattan ólim keltirse,
Ol ayıpsızlardıń basına túsken apatqa kúledi.
24Jer júzi zalımlardıń qolına berilgen,
Ol onıń qazılarınıń kózin jawıp qoyǵan.
Eger bunı Ol islemegen bolsa, onda basqa kim eken?

25Kúnlerim juwırıwshıdan da tez juwırıp ótpekte,
Olar jaqsılıq kórmey-aq, ótip ketpekte.
26Olar qamıs qayıq sıyaqlı,
Oljaǵa taslanǵan búrkit sıyaqlı, tez kózden ǵayıp boladı.
27Eger men: «Shaǵımımdı umıtayın,
Qayǵılı túrimdi ózgertip, kúlimsireyin», – desem de,
28Bári bir kóretuǵın azabımnan qorqar edim.
Bilemen, Sen meni ayıpsız dep sanamaysań.
29Eger ayıplı dep tabılǵan ekenmen,
Onda bostan-bosqa gúresip ne qılaman?
30Hátte, qar suwına juwınsam da,
Qollarımdı sabın menen juwsam da,
31Bári bir Sen meni ılay shuqırǵa taslaysań,
Hátte, kiyimlerim de mennen jerkenedi.

32Quday men sıyaqlı insan bolmaǵanlıqtan,
Men Oǵan juwap bere almayman,
Onıń menen birge qazıxanaǵa da bara almayman.
33Qolın ekewimizdiń ústimizge qoyıp, jarastıratuǵın,
Aramızda bir dáldalshı bolsa edi!
34Hasasın ústimnen alıp taslasa edi Quday,
Qorqınıshı da meni qorqıtıwdı toqtatsa edi!
35Sonda men Onnan qorqpastan, Onıń menen sóyleser edim,
Biraq bul awhalda hesh nárse qıla almayman.