‏ Joel 1

1Petuel ulı Ioelge Jaratqan Iyeden sóz tústi:

Shegirtkelerdiń jerdi qaplap alıwı

2Háy, aqsaqallar, tıńlańlar,
Elde jasap atırǵan hár bir adam, qulaq salıńlar,
Siziń zamanıńızda yamasa ata-babalarıńızdıń dáwirinde,
Júz bergen be edi usınday apat?
3Aytıp beriń bul haqqında balalarıńızǵa,
Balalarıńız bayanlap bersin balalarına,
Olardıń balaları jetkizsin keyingi áwladına.
4Sheksheklerden qalǵanın shegirtkeler jedi,
Olardan awısqanın qońızlar jedi,
Qońızlardan awısqanın qurtlar jedi.

5Háy, máskúnemler oyanıń hám jılań!
Háy, sharap ishiwshiler, sharabıńız ushın dad salıń!
Óytkeni taza sharabıńız awzıńızdan tartıp alındı.
6Bastırıp keldi jerime kúshli hám sansız bir xalıq,
Tisleri arıslan tislerine uqsar,
Arıslandikindey gúrek tisleri de bar.
7Wayran qıldı júzim aǵashlarımdı,
Jalańashlap tasladı ánjir aǵashlarımdı,
Shaqalarınıń qabıqların sılıp tasladı,
Hámmesi appaq talday bolıp qaldı.

8Kúyewinen ayırılıp, aza kiyim kiygen,
Jas kelinshektey dad salıń.
9Jaratqan Iyeniń Úyinde toqtadı ǵálle hám ishimlik sadaqası,
Jaratqan Iyeniń xızmetindegi ruwxaniyler aza tutıp atır.
10Egislik maydanlar bosap qaldı, dad salmaqta dalalar,
Óytkeni joq etildi biydaylar,
Tawısıldı jańa sharap, záytún mayı da aqpay, toqtap qaldı.
11Biyday hám arpa ushın qayǵırıń, háy, diyxanlar!
Dad salıń, háy, baǵmanlar,
Sebebi atızıńızdıń ónimleri joq boldı.
12Júzim shaqaları quwradı, ánjir aǵashları solıdı,
Anar, palma, alma aǵashları,
Barlıq miywe aǵashları quwradı.
Adamzattıń quwanıshı joq boldı.

Táwbege shaqırılıw

13Ruwxaniyler, aza kiyim kiyip, jas tógiń,
Qurbanlıq orındaǵı xızmettegiler, dad salıń,
Háy, Qudayımnıń xızmetinde júrgenler,
Ibadatxanaǵa kelip, túndi aza kiyim menen ótkeriń.
Óytkeni Qudayıńızdıń Úyinde,
Ǵálle hám ishimlik sadaqası qalmadı.
14Oraza ushın kún belgileń,
Saltanatlı jıynalıs járiyalań.
Aqsaqallardı hám bul jerde jasaytuǵınlardıń hámmesin,
Qudayıńız Jaratqan Iyeniń Úyine jıynań,
Jaratqan Iyege hámmeńiz jalbarınıń!

15Sol kún, yaǵnıy Jaratqan Iyeniń kúni jaqındur,
Qúdireti kúshli Qudaydıń jiberetuǵın apatı sıyaqlı keledi sol kún.
16Azıq-awqatımız joq etildi kóz aldımızda,
Qudayımızdıń Úyinde quwanısh hám shadlıq tamam bolǵan joq pa?
17Tuqımlar shirip ketti kesekler astında,
Ǵálle ónimleri quwrap qalǵanlıǵı sebepli,
Ǵállexanalar bosap, telekler buzıldı.
18Íńırsıp atır mallar!
Gezip júripti padalar,
Óytkeni quwrap qalǵan jaylawdaǵı otlar,
Qoy súriwleri de qıynalıp qalǵan.
19Jaratqan Iye, Saǵan jalbarınaman.
Óytkeni jalın jalmadı jaylawlardı,
Ot órtedi daladaǵı barlıq aǵashlardı.
20Hátteki, jabayı haywanlar da Saǵan jalbarınıp atır,
Sebebi say hám bulaqlar qurıp qaldı,
Ot jalmadı daladaǵı jaylawlardı.