Jos 1 | KaaIBT22L | STEP | Jaratqan Iye Óz qulı Muwsanıń óliminen soń, onıń járdemshisi Nun ulı Eshuaǵa bılay dedi:

‏ Joshua 1

Jaratqan Iyeniń Eshuaǵa bergen buyrıǵı

1 Jaratqan Iye Óz qulı Muwsanıń óliminen soń, onıń járdemshisi Nun ulı Eshuaǵa bılay dedi:

2 – Meniń qulım Muwsa óldi. Qánekey, endi sen pútkil xalıq penen birge Iordan dáryasın kesip ótip, Men sizlerge, yaǵnıy Izrail xalqına beretuǵın elge kirińler. 3 Muwsaǵa aytqanımday, ayaǵıńız tiygen barlıq jerlerdi sizlerge beremen. 4 Sizlerdiń jer shegarańız qubladaǵı shólden arqadaǵı Lebanonǵa deyin, shıǵıstaǵı ullı Evfrat dáryasınan pútkil xetlerdiń eli arqalı batıstaǵı Jer Orta teńizine deyin sozılǵan boladı. 5 Ómiriń boyı hesh kim saǵan qarsı tura almaydı. Muwsa menen birge bolǵanım sıyaqlı, Men seniń menen de birge bolaman. Seni hesh qashan qaldırmayman hám taslap ketpeymen.

6 Kúshli hám márt bol. Sebebi Men ata-babalarına beremen dep ant ishken jerdi bul xalıq iyelewi ushın, sol jerdi olarǵa sen alıp bereseń. 7 Tek kúshli hám júdá márt bolıp, qulım Muwsanıń saǵan buyırǵan pútkil Nızamın muqıyatlı túrde orınla. Qay jerge barsań da, tabısqa iye bolıwıń ushın, bul Nızamnan uzaqlama hám onnan ya ońǵa, ya solǵa awıp ketpe. 8 Nızam kitabında jazılǵan sózlerdi awzıńnan túsirme. Onda jazılǵanlardıń barlıǵın tolıq orınlaw ushın, ol haqqında kúni-túni oy juwırtıp júr. Sonda sen tabısqa iye bolıp, maqsetińe eriseseń. 9 Saǵan kúshli hám márt bol demegen be edim? Qorqpa hám ruwxıńdı túsirme. Óytkeni Qudayıń Jaratqan Iye sen baratuǵın hár bir jerde seniń menen birge boladı.

Eshuanıń xalıqqa bergen buyrıǵı

10 Solay etip, Eshua xalıq qadaǵalawshılarına bılay dep buyırdı:

11 – Ordanı aralap shıǵıp, xalıqqa mına buyrıqtı berińler: «Ózlerińizge azıq-awqat tayarlańlar. Sebebi Qudayıńız Jaratqan Iyeniń sizlerge beretuǵın jerine kirip, onı menshik etip iyelewińiz ushın, úsh kúnnen soń, Iordan dáryasın kesip ótesizler».

12 Al Eshua Ruben hám Gad urıwları menen Menashshe urıwınıń yarımına bılay dedi:

13 – Jaratqan Iyeniń qulı Muwsanıń: «Qudayıńız Jaratqan Iye bul jerdi sizlerge berip, sizlerdi tınıshlıqqa eristiredi», – degen sózlerin eske túsirińler. 14 Sizlerdiń hayallarıńız, balalarıńız hám mallarıńız usı jerde, yaǵnıy Iordan dáryasınıń shıǵısında, Muwsanıń sizlerge bergen jerinde qalsın. Biraq sizler, yaǵnıy pútkil jawıngerler qurallanıp, tuwısqanlarıńızdan aldın dáryanı kesip ótińler hám olarǵa járdem berińler. 15 Jaratqan Iye sizlerdi tınıshlıqqa eristirgeni sıyaqlı, olardı da tınıshlıqqa eristiredi. Olar Qudayıńız Jaratqan Iyeniń beretuǵın jerin múlik etip alǵannan soń, sizler de múlik etip alǵan jerińizge, Jaratqan Iyeniń qulı Muwsanıń Iordan dáryasınıń shıǵısındaǵı sizlerge bergen jerine qaytıp, usı jerge ornalasıńlar.

16 Olar Eshuaǵa bılay dep juwap berdi:

– Bizlerge buyırǵanlarıńnıń hámmesin orınlaymız. Qay jerge jiberseń de, baramız. 17 Hár bir nársede Muwsanıń sózine boysınǵanımız sıyaqlı, seniń sózińe de boysınamız. Muwsa menen birge bolǵan Qudayıń Jaratqan Iye seniń menen de birge bolsın. 18 Sózińe qarsı shıqqan hám qanday da bir buyrıǵıńa boysınbaǵan adamǵa ólim jazası beriledi. Tek sen kúshli hám márt bol.