Jos 11 | KaaIBT22L | STEP | Bolıp ótken waqıyalar haqqında Xasor patshası Yabin esitkende, Madon patshası Iobabqa, Shimron hám Axshaf patshalarına,

‏ Joshua 11

Arqa táreptegi patshalardıń jeńiliske ushırawı

1 Bolıp ótken waqıyalar haqqında Xasor patshası Yabin esitkende, Madon patshası Iobabqa, Shimron hám Axshaf patshalarına, 2 arqadaǵı tawlı úlkelerdegi, Kinneret kóliniń qublasındaǵı tegisliklerdegi, batıstaǵı taw eteklerindegi hám batıstaǵı Dor tóbeshiklerindegi patshalarǵa, 3 shıǵıs hám batıs úlkelerdegi qananlılarǵa, tawlı úlkedegi amor, xet, periz hám ebus xalıqlarına, Xermon tawınıń etegindegi Mispa úlkesinde jasaytuǵın xiwlerge xabar jiberdi. 4 Bul patshalar pútkil láshkerleri, yaǵnıy teńiz jaǵasındaǵı qum sıyaqlı esap-sansız áskerleri, júdá kóp at hám urıs arbaları menen jolǵa shıqtı. 5 Usı barlıq patshalar izraillılarǵa qarsı urısıw ushın birlesip, Merom suwları jaǵasına keldi de, hámmesi birge orda qurdı.

6 Sonda Jaratqan Iye Eshuaǵa bılay dedi:

– Olardan qorqpa. Erteń usınday waqıtta olardıń hámmesin ólimge tapsırıp, Izrailǵa táslim etemen. Sen olardıń atlarınıń tirseklerin kesip, sawash arbaların otqa jandırıp jiber.

7 Solay etip, Eshua pútkil áskerleri menen birge Merom suwları jaǵasındaǵı patshalarǵa tosattan hújim jasadı. 8 Jaratqan Iye olardı izraillılarǵa táslim etti. Izraillılar olardı jeńiliske ushırattı hám qashqanlardı ullı Sidonǵa, Misrefot-Mayımǵa hám shıǵıstaǵı Mispe oypatlıǵına shekem quwıp barıp, olardı óltirdi. Olar hesh kimdi aman qaldırmadı. 9 Eshua Jaratqan Iyeniń ózine buyırǵanınday isledi: olardıń atlarınıń tirseklerin kesti hám sawash arbaların otqa jandırıp jiberdi.

10 Bunnan soń, Eshua izge qayttı hám Xasor qalasın qolǵa kirgizip, onıń patshasın qılıshtan ótkerdi. Sebebi Xasor burın usı barlıq patshalıqlardıń bası edi. 11 Izraillılar qaladaǵı barlıq adamlardı qılıshtan ótkizip, olardı qırıp tasladı. Olar birde bir tiri jan qaldırmadı. Keyin Eshua Xasor qalasın jaǵıp jiberdi. 12 Solay etip, Eshua bul qalalardı hám olardıń patshaların qolǵa túsirdi hám Jaratqan Iyeniń qulı Muwsanıń buyırǵanınday, hámmesin qılıshtan ótkizip, qırıp tasladı. 13 Izraillılar Eshuanıń jaǵıp jibergen qalası Xasordan basqa, tóbeshiklerde qurılǵan qalalardıń hesh birine ot bermedi. 14 Olar bul qalalardaǵı hámme nárseni hám mallardı olja qıldı, al adamlarınıń hámmesin qılıshtan ótkizdi. Olar birde bir tiri jan qaldırmadı. 15 Jaratqan Iyeniń qulı Muwsa Jaratqan Iyeden alǵan buyrıqların Eshuaǵa tapsırǵan edi. Eshua olardı tıńlap, Jaratqan Iyeniń Muwsaǵa buyırǵanlarınıń hámmesin tolıq orınladı.

Eshua qolǵa kirgizgen jerler

16 Solay etip, Eshua usı pútkil eldi: tawlı jerlerdi, pútkil Negeb hám Goshen jerlerin, batıstaǵı taw eteklerin, Iordan tegisligin hám Izrail tawları menen olardıń eteklerin, 17 Seirge jaqın Xalaq tawınan baslap, Xermon tawınıń janındaǵı Lebanon oypatlıǵındaǵı Baal-Gadqa deyingi jerlerdi basıp aldı. Al olardıń patshaların qolǵa alıp, óltirdi. 18 Eshua bul patshalar menen uzaq waqıt urısıp kelgen edi. 19 Gibonda jasaytuǵın xiwlerden basqa hesh bir qala xalqı izraillılar menen paraxatshılıq kelisimin dúzgen joq. Izraillılar basqa qalalardıń hámmesin urıs penen aldı. 20 Óytkeni Izrailǵa qarsı urısıw ushın olardıń júreklerin qatal qılǵan Jaratqan Iyeniń Ózi edi. Solay etip, Jaratqan Iyeniń Muwsaǵa buyırǵanınday, izraillılar olardı ayawsız óltirip, tolıq qırıp tasladı.

21 Sol waqıtta Eshua barıp, tawlı Xebronda, Debirde hám Anabta, Yahuda hám Izraildıń barlıq tawlı úlkelerinde jasaytuǵın anaq xalqın qalaları menen qosa pútkilley qırıp tasladı. 22 Izraillılardıń elinde anaqlardan birde bir adam aman qalmadı. Tek Gaza, Gat hám Ashdodta aman qalǵanlar boldı. 23 Solay etip, Jaratqan Iyeniń Muwsaǵa aytqanınday, Eshua pútkil eldi qolǵa kirgizdi hám onı Izrail urıwları arasında múlik qılıp bólistirdi. Solay etip, urıs toqtap, el tınıshlıqqa eristi.