Jos 12 | KaaIBT22L | STEP | Izraillılar Iordan dáryasınıń shıǵısın, Iordan tegisliginiń pútkil shıǵıs tárepi menen Arnon dáryasınan Xermon tawına shekem bolǵan jerlerdi qolǵa kirgizip, mına patshalardı jeńiliske ushıratqan edi:

‏ Joshua 12

Muwsa tárepinen jeńiliske ushıraǵan patshalar

1 Izraillılar Iordan dáryasınıń shıǵısın, Iordan tegisliginiń pútkil shıǵıs tárepi menen Arnon dáryasınan Xermon tawına shekem bolǵan jerlerdi qolǵa kirgizip, mına patshalardı jeńiliske ushıratqan edi: 2 olardıń biri Xeshbonda jasaǵan amorlardıń patshası Sixon bolıp, onıń patshalıǵı Arnon dáryasınıń jaǵasındaǵı Aroer qalasın hám sol dáryanıń ortasınan baslanatuǵın ammon xalqınıń shegarası bolǵan Yabboq dáryasına deyingi jerlerdi, yaǵnıy Giladtıń yarımın óz ishine alatuǵın edi. 3 Iordan tegisliginiń shıǵıs tárepi de oǵan tiyisli edi. Bul jer Kinneret kólinen Iordan tegisligindegi teńizge, yaǵnıy Óli teńizge deyin sozılǵan jerlerdi, jáne de, Beyt-Eshimotqa hám qubladaǵı Pisga tawınıń janbawırlarına deyingi jerlerdi óz ishine alatuǵın edi. 4 Ekinshisi Bashan patshası Og bolıp, ol eń sońǵı refalardıń biri edi hám Ashtarot penen Edreyde húkimdarlıq etti. 5 Ol Xermon tawına, Salkaǵa, geshurlılar menen maaxalılardıń shegaralarına deyin sozılǵan pútkil Bashanǵa hám Xeshbon patshası Sixonnıń shegarasına deyin sozılǵan Giladtıń yarımına húkimdarlıq etetuǵın edi.

6 Jaratqan Iyeniń qulı Muwsa hám izraillılar usı patshalardı jeńiliske ushırattı. Sonda Jaratqan Iyeniń qulı Muwsa olardıń jerlerin Ruben hám Gad urıwları menen Menashshe urıwınıń yarımına múlik qılıp berdi.

Eshua tárepinen jeńiliske ushıraǵan patshalar

7 Lebanon oypatlıǵındaǵı Baal-Gadtan Seirge jaqın Xalaq tawına shekemgi Iordan dáryasınıń batısındaǵı jerlerde jasaǵan patshalardı Eshua hám izraillılar jeńiliske ushırattı. Olardıń jerlerin Eshua Izrail urıwlarına múlik qılıp bólip berdi. 8 Yaǵnıy, Eshua tawlı jerlerdi, batıstaǵı taw eteklerin, Iordan tegisligin, taw janbawırlarındaǵı jerlerdi, shóldi hám Negebti Izrail urıwları arasında múlik qılıp bólistirdi. Bul jerlerde xet, amor, qanan, periz, xiw hám ebus xalıqları jasaytuǵın edi. Izrail jeńiliske ushıratqan patshalar mınalar edi: 9 Erixo patshası, Beyt-Elge jaqın jerdegi Ay qalasınıń patshası, 10 Erusalim patshası, Xebron patshası, 11 Yarmut patshası, Laxish patshası, 12 Eglon patshası, Gezer patshası, 13 Debir patshası, Geder patshası, 14 Xorma patshası, Arad patshası, 15 Libna patshası, Adullam patshası, 16 Makkeda patshası, Beyt-El patshası, 17 Tappuax patshası, Xefer patshası, 18 Afek patshası, Lashsharon patshası, 19 Madon patshası, Xasor patshası, 20 Shimron-Meron patshası, Axshaf patshası, 21 Taanax patshası, Megiddo patshası, 22 Kedesh patshası, Karmeldegi Ioqneam patshası, 23 Tóbeshikli Dor eliniń patshası, Galiladaǵı Goyım patshası, 24 hám Tirsa patshası. Barlıǵı bolıp otız bir patsha.