Jos 13 | KaaIBT22L | STEP | Eshua qartayıp, biraz jasqa barıp qalǵan waqtında, Jaratqan Iye oǵan bılay dedi: – Sen qartayıp, biraz jasqa barıp qaldıń. Biraq basıp alınatuǵın jerler ele júdá kóp.

‏ Joshua 13

Basıp alınatuǵın jerler

1 Eshua qartayıp, biraz jasqa barıp qalǵan waqtında, Jaratqan Iye oǵan bılay dedi:

– Sen qartayıp, biraz jasqa barıp qaldıń. Biraq basıp alınatuǵın jerler ele júdá kóp.

2 Sol qalǵan jerler mınalar: pútkil filist hám geshur xalıqları jasaytuǵın aymaqlar, 3 yaǵnıy qananlılarǵa tiyisli bolıp esaplanǵan Mısırdıń shıǵıs tárepindegi Shixor dáryasınan arqadaǵı Ekron shegaralarına shekem sozılǵan jerler – bular filist xalqınıń bes húkimdarına tiyisli Gaza, Ashdod, Ashkelon, Gat hám Ekron qalaları hám qublada aw xalqınıń jerleri. 4 Jáne de, sidonlılarǵa tiyisli Ara degen jerden baslap, Afekke, yaǵnıy Amor shegarasına shekemgi pútkil Qanan jerleri. 5 Taǵı geballılardıń jerleri hám Xermon tawı etegindegi Baal-Gadtan Lebo-Xamatqa shekem sozılǵan shıǵıs táreptegi pútkil Lebanon jerleri. 6 Lebanonnan Misrefot-Mayımǵa shekem sozılǵan tawlı jerde jasaytuǵınlardı, yaǵnıy barlıq sidonlılardı izraillılardıń aldınan quwıp shıǵaraman. Saǵan buyırǵanımday, bul jerlerdi izraillılarǵa úlestireseń.

7 Endi bul jerlerdi toǵız urıwǵa hám Menashshe urıwınıń yarımına múlik etip bólistirip ber.

Iordan dáryasınıń shıǵısındaǵı jerler

8 Menashshe urıwınıń basqa yarımı menen Ruben hám Gad urıwları Iordan dáryasınıń shıǵısındaǵı jerlerdi úles etip aldı. Olarǵa bul jerlerdi Jaratqan Iyeniń qulı Muwsa bergen edi.

9 Sol jerler Arnon dáryasınıń jaǵasındaǵı Aroerden hám oypatlıqtıń ortasındaǵı qaladan baslanıp, Dibonǵa deyin sozılǵan pútkil Medeba tegisligin óz ishine aladı. 10 Jáne de, onıń ishine Xeshbonda húkimdarlıq etken amorlardıń patshası Sixonnıń ammon xalqınıń shegarasına deyin sozılǵan pútkil qalaları, 11 Gilad úlkesi hám geshurlılar menen maaxalılardıń jerleri, pútkil Xermon tawı hám Salkaǵa deyingi pútkil Bashan jerleri kiredi. 12 Jáne de, eń sońǵı refalardıń biri bolǵan, Ashtarot hám Edreyde húkimdarlıq etken Bashan patshası Ogtıń qalǵan jerleriniń barlıǵı da kiredi. Muwsa refa xalqın jeńiliske ushıratıp, olardı quwıp jibergen edi. 13 Izraillılar geshurlılar menen maaxalılardı quwıp jibermedi. Olar búgin de izraillılardıń arasında jasap kelmekte.

14 Muwsa tek Lebiy urıwına ǵana jerden úles bermedi. Jaratqan Iyeniń Muwsaǵa bergen buyrıǵı boyınsha, Izraildıń Qudayı Jaratqan Iyege berilgen qurbanlıqlardıń bir bólegi lebiylilerdiń úlesi boladı.

Ruben urıwına berilgen jerler

15 Tiyre sanına qaray, Muwsanıń Ruben urıwına bergen jerleri mınalar: 16 Arnon dáryasınıń jaǵasındaǵı Aroerden hám oypatlıqtıń ortasındaǵı qaladan baslanıp, pútkil Medeba tegisligi, 17 Xeshbon hám tegisliktegi oǵan tiyisli mına qalalardıń hámmesi: Dibon, Bamot-Baal, Beyt-Baal-Meon, 18 Yahasa, Kedemot, Mefaat, 19 Kiryatayım hám Sibma, oypatlıqtaǵı tóbeshikte qurılǵan Seret-Shaxar, 20 Beyt-Peor, Pisga tawınıń janbawırları, Beyt-Eshimot, 21 tegisliktegi barlıq qalalar hám Xeshbonda húkimdarlıq etken amor patshası Sixonnıń pútkil eli. Muwsa Sixondı hám oǵan tiyisli jerlerde jasaytuǵın Midyan kósemleri bolǵan Ewiy, Rekem, Sur, Xur hám Rebanı jeńiliske ushıratqan edi. 22 Izraillılar óltirilgenlerge qosıp, Beor ulı palker Bilamdı da qılıshtan ótkizdi. 23 Ruben urıwınıń jeri Iordan dáryasına shegaralas edi. Tiyre sanına qaray, olarǵa múlik etip berilgen awıl hám qalalar usılar edi.

Gad urıwına berilgen jerler

24 Tiyre sanına qaray, Muwsa Gad urıwına mına jerlerdi berdi: 25 Yazer jeri, pútkil Gilad qalaları, Rabba jaqınındaǵı Aroerge deyin sozılǵan ammonlarǵa tiyisli bolǵan jerlerdiń yarımı, 26 Xeshbonnan Ramat-Mispe hám Betonimge, Maxanayımnan Lo-Debarǵa deyingi jerler, 27 Iordan oypatlıǵındaǵı Beyt-Haram, Beyt-Nimra, Sukkot, Safon, Xeshbon patshası Sixonnıń jerlerinen awısqan bólegi, Kinneret kóliniń qubla tárepine deyin sozılǵan Iordan dáryasınıń shıǵıs tárepi. 28 Tiyre sanına qaray, Gad urıwına múlik etip berilgen qala hám awıllar usılar edi.

Menashshe urıwınıń yarımına berilgen shıǵıstaǵı jerler

29 Tiyre sanına qaray, Muwsa Menashshe urıwınıń yarımına mına jerlerdi berdi: 30 olar Maxanayımnan baslanıp, Bashan patshası Ogtıń eli bolǵan pútkil Bashandı hám Bashanda Yairge tiyisli bolǵan alpıs qalanıń hámmesin óz ishine aldı. 31 Jáne de, Giladtıń yarımın, Bashan patshası Ogtıń paytaxt qalaları bolǵan Ashtarot hám Edreydi óz ishine aldı. Bul jerler Menashsheniń ulı Maxirdiń urpaqlarınıń yarımına tiyre sanına qaray berilgen edi.

32 Muwsanıń Erixonıń shıǵısında, Iordan dáryasınıń arǵı jaǵasındaǵı oypatlıqtıń Moabqa tiyisli bóleginde bólip bergen jerleri usılar edi. 33 Biraq Lebiy urıwına jerden úles berilmedi. Jaratqan Iyeniń aytqanınday, olardıń úlesi Izraildıń Qudayı Jaratqan Iyeniń Ózi boladı.