Jos 14 | KaaIBT22L | STEP | Izraillılardıń Qananda múlik etip alǵan jerlerine kelsek, bul jerler ruwxaniy Elazar, Nun ulı Eshua hám Izrail urıwlarınıń tiyre basshıları tárepinen izraillılarǵa bólip berildi.

‏ Joshua 14

Iordannıń batısındaǵı jerlerdiń bólistiriliwi

1 Izraillılardıń Qananda múlik etip alǵan jerlerine kelsek, bul jerler ruwxaniy Elazar, Nun ulı Eshua hám Izrail urıwlarınıń tiyre basshıları tárepinen izraillılarǵa bólip berildi. 2 Jaratqan Iyeniń Muwsa arqalı buyırǵanınday, úlesler toǵız urıw menen bir urıwdıń yarımına shek taslaw jolı menen bólistirildi. 3 Sebebi Muwsa qalǵan eki urıw menen bir urıwdıń yarımınıń úleslerin Iordan dáryasınıń shıǵıs tárepinde bergen edi. Biraq olar menen birge lebiylilerge múlikten úles berilmegen edi. 4 Yusuptiń ullarınan Menashshe hám Efrayım degen eki urıw kelip shıqtı. Sonlıqtan lebiylilerge jerden úles berilmey, tek jasaw ushın qalalar hám mal-múlikleri ushın sol qalalar átirapındaǵı jaylawlar ǵana berildi. 5 Solay etip, izraillılar Jaratqan Iyeniń Muwsaǵa buyırǵanı boyınsha is tutıp, jerlerdi bólisip aldı.

Xebronnıń Kalebke beriliwi

6 Bir kúni Yahuda urıwınan bolǵan adamlar Gilgalda bolıp atırǵan Eshuaǵa keldi. Sonda Keniz tiyresinen bolǵan Efunne ulı Kaleb Eshuaǵa bılay dedi:

– Jaratqan Iyeniń Qadesh-Barniyada Qudaydıń adamı bolǵan Muwsaǵa sen hám men tuwralı nelerdi aytqanınan ózińniń xabarıń bar. 7 Jaratqan Iyeniń qulı Muwsa eldi kózden ótkizip keliw ushın meni Qadesh-Barniyadan jibergeninde, men qırıq jasta edim. Men kórgenlerimdi haq kewlim menen jetkizip keldim. 8 Degen menen, meniń menen birge barǵan tuwısqanlarım xalıqtıń júregine qorqınısh saldı. Biraq men Qudayım Jaratqan Iyege tolıq boysındım. 9 Sonlıqtan Muwsa sol kúni: «Sen Qudayım Jaratqan Iyege tolıq boysınǵanıń ushın, ayaǵıń tiygen jerler saǵan hám seniń urpaqlarıńa máńgige múlik etip beriledi», – dep ant ishken edi. 10 Sol waqıtta izraillılar shólde júrgen edi. Jaratqan Iyeniń Muwsaǵa bul sózlerdi aytqanına qırıq bes jıl boldı. Minekey, Jaratqan Iye Óz sóziniń ústinen shıǵıp, maǵan ómir berdi. Házir men seksen bes jastaman. 11 Muwsa meni jibergen kúnde qanday kúshli bolǵan bolsam, búgin de sondayman. Sol waqıttaǵıday, urısqa shıǵıwǵa ele de kúshim jetedi. 12 Endi Jaratqan Iyeniń sol kúni aytqanınday, bul tawlı eldi maǵan ber. Ol jerde anaq xalqınıń jasaytuǵının, olardıń úlken hám bekkem etip qorǵalǵan qalalarınıń barlıǵın sol kúni óziń de esitken ediń. Múmkin, Jaratqan Iye maǵan járdem eter hám men Onıń aytqanınday, olardı sol jerden quwıp shıǵararman.

13 Sonda Eshua Efunne ulı Kalebke aq pátiyasın berdi hám Xebrondı oǵan múlik qılıp berdi. 14 Solay etip, Xebron Keniz tiyresinen bolǵan Efunne ulı Kalebtiń múlki boldı hám búgingi kúnge deyin bul jer oǵan tiyisli. Óytkeni ol Izraildıń Qudayı Jaratqan Iyege tolıq boysınǵan edi. 15 Xebronnıń eski atı Kiryat-Arba bolıp, Arba anaqlardıń eń ullı adamı edi.

Solay etip, urıs toqtap, el tınıshlıqqa eristi.