‏ Joshua 15

Yahuda urıwına berilgen jerler

1Tiyre sanına qaray, Yahuda urıwınıń shegine túsken jerler qublada bolıp, Edom shegarasına, eń qublada Zin shóline deyin sozılatuǵın edi. 2Olardıń qubla shegarası Óli teńizdiń qubla tárepindegi qoltıqtan baslanıp, 3Aqrabbim biyikliginiń qublasına, ol jerden Zinge, Qadesh-Barniyanıń qublasınan Xesronǵa, Xesronnan Addarǵa ótip, ol jerden Qarqaǵa burılatuǵın edi. 4Sońınan Asmonnan ótetuǵın edi hám Mısır shegarasındaǵı saydı boylap, Jer Orta teńizine taqalatuǵın edi. Bul Yahuda urıwınıń qubla shegarası edi. 5Shıǵıs shegarası Óli teńiz boylap Iordan dáryasınıń quyar qoltıǵına qaray sozılǵan edi. Al arqa shegarası Iordan dáryasınıń Óli teńizge quyatuǵın qoltıǵınan baslanatuǵın edi. 6Ol keyin Beyt-Xoglaǵa qaray sozılıp, Beyt-Arabanıń arqa tárepinen ótetuǵın edi hám Rubenniń ulı Bohannıń tası turǵan jerge deyin baratuǵın edi. 7Sońınan shegara Axor oypatlıǵınan Debirge deyin barıp, oypatlıqtıń qublasındaǵı Adummim biyikligi qarsısındaǵı Gilgalǵa burılatuǵın, bul jerden En-Shemesh suwlarına deyin sozılıp, Rogel bulaǵına barıp taqalatuǵın edi. 8Keyin Ebus qalasınıń, yaǵnıy Erusalimniń qubla tárepi boylap Ben-Hinnom oypatlıǵınan ótetuǵın edi. Bul jerden Refaim oypatlıǵınıń arqa tárepinde bolǵan Hinnom oypatlıǵınıń batısındaǵı tawdıń tóbesine kóterilip, 9ol jerden Neftoax suw bulaǵına burılıp, Efron tawındaǵı qalalarǵa sozılatuǵın hám Baalaǵa, yaǵnıy Kiryat-Yarimge qaray burılatuǵın edi. 10Al Baaladan batısqa, Seir tawına qaray Yarim tawı boylap, yaǵnıy Kesalon tawınıń arqa tárepi boylap sozılıp, Beyt-Shemeshke qaray baratuǵın hám Timna arqalı ótetuǵın edi. 11Sońınan Ekronnıń arqa tárepindegi janbawırǵa sozılıp, Shikkaronǵa qaray burılatuǵın, Baala tawına jetkennen keyin, Yabneelge baratuǵın hám Jer Orta teńizine barıp taqalatuǵın edi.

12Al batıs shegarası Jer Orta teńiziniń jaǵaları edi. Yahuda urıwınıń tiyreleri usı shegaralar menen qorshalǵan edi.

Kalebtiń Xebron hám Debir qalaların basıp alıwı

13Eshua Jaratqan Iyeniń ózine buyırǵanınday, Yahuda bólegindegi Kiryat-Arbanı, yaǵnıy Xebron qalasın Efunne ulı Kalebke úles etip berdi. Arba – anaq xalqınıń túp babası edi. 14Kaleb anaqlardıń Sheshay, Aximan hám Talmay degen tiyrelerin ol jerden quwıp jiberdi. 15Ol sol jerden eski atı Kiryat-Sefer bolǵan Debir qalasınıń xalqına qarsı júris qıldı. 16Sonda Kaleb:

– Kiryat-Sefer xalqın jeńip, ol jerdi qolǵa kirgizgen adamǵa qızım Axsanı hayallıqqa beremen, – dedi.

17Qalanı Kalebtiń inisi, Kenazdıń ulı Otniel qolǵa kirgizdi. Sonlıqtan Kaleb qızı Axsanı oǵan hayallıqqa berdi. 18Qız Otnieldiń janına barǵanda, ol kúyewin úgitlep:

– Ákemnen bir atız sora, – dedi.

Kaleb eshekten túsip atırǵan qızınan:

– Qanday tilegiń bar? – dep soradı.

19Qız ákesine:

– Maǵan bir enshi berseń. Meni Negeb shóline uzatqan ekenseń, endi maǵan suw bulaqların ber, – dedi. Solay etip, Kaleb qızına joqarǵı hám tómengi suw bulaqların berdi.

Yahuda urıwına tiyisli qalalar

20Tiyre sanına qaray, Yahuda urıwı mına jerlerdi úles qılıp aldı:

21Yahuda urıwınıń eń qublada, Edom jeriniń shegarasındaǵı qalaları tómendegiler edi: Qabseel, Eder, Yagur, 22Kina, Dimona hám Adada, 23Kedesh, Xasor, Itnan, 24Zif, Telem, Bealot, 25Xasor-Xadatta, Keriyot-Xesron, yaǵnıy Xasor, 26Amam, Shema, Molada, 27Xasar-Gadda, Xeshmon, Beyt-Pelet, 28Xasar-Shual, Beer-Sheba, Biziotiya, 29Baala, Iyyim, Esem, 30Eltolad, Kesil, Xorma, 31Siklag, Madmanna, Sansanna, 32Lebaot, Shilxim, Ayın hám Rimmon. Hámmesi bolıp, awılları menen birlikte jigirma toǵız qala.

33Batıstaǵı taw eteklerinde: Eshtaol, Sora, Ashna, 34Zanoax, En-Gannim, Tappuax, Enam, 35Yarmut, Adullam, Soxo, Azeqa, 36Shaarayım, Aditayım, Gedera yamasa Gederotayım. Hámmesi bolıp, awılları menen birlikte on tórt qala.

37Senan, Xadasha, Migdal-Gad, 38Dilan, Mispe, Ioqteel, 39Laxish, Bosqat, Eglon, 40Kabbon, Laxmas, Kitlish, 41Gederot, Beyt-Dagon, Naama hám Makkeda. Hámmesi bolıp, awılları menen birlikte on altı qala. 42Libna, Eter, Ashan, 43Iftax, Ashna, Nesib, 44Keila, Axzib hám Maresha. Hámmesi bolıp, awılları menen birlikte toǵız qala.

45Qalaları hám awılları menen birlikte Ekron, 46Ekronnan Jer Orta teńizine shekemgi Ashdodtıń dógeregindegi barlıq awıllar.

47Ashdod penen onıń qalaları hám awılları. Mısır shegarasındaǵı sayǵa hám Jer Orta teńizine deyin sozılǵan Gaza menen onıń qalaları hám awılları.

48Tawlı úlkede Shamir, Yattir hám Soxo, 49Danna, Kiryat-Sanna, yaǵnıy Debir. 50Anab, Eshtemoa hám Anim, 51Goshen, Xolon hám Gilo. Hámmesi bolıp, awılları menen birlikte on bir qala.

52Arab, Duma hám Eshan, 53Yanum, Beyt-Tappuax hám Afeka. 54Xumta, Kiryat-Arba, yaǵnıy Xebron hám Sior. Hámmesi bolıp, awılları menen birlikte toǵız qala.

55Maon, Karmel, Zif hám Yutta. 56Izreel, Ioqdeam hám Zanoax. 57Kain, Giba hám Timna. Hámmesi bolıp, awılları menen birlikte on qala.

58Xalxul, Beyt-Sur hám Gedor. 59Maarat, Beyt-Anot hám Elteqon. Hámmesi bolıp, awılları menen birlikte altı qala.

60Kiryat-Baal, yaǵnıy Kiryat-Yarim hám Rabba. Hámmesi bolıp, awılları menen birlikte eki qala.

61Shólde Beyt-Araba, Middin hám Sexaxa. 62Nibshan, Duz qalası hám En-Gediy. Hámmesi bolıp, awılları menen birlikte altı qala.

63Yahuda urıwı Erusalimde jasaǵan ebuslılardı quwıp shıǵara almadı. Ebuslılar búgin de Yahuda urıwı menen birge Erusalimde jasamaqta.