Jos 17 | KaaIBT22L | STEP | Yusuptiń tuńǵısh ulı Menashsheniń urpaqlarına, Menashshe urıwına berilgen úles jerler mınalar edi: Giladtıń ákesi Maxir Menashsheniń tuńǵısh ulı edi. Maxir jawınger adam bolǵanlıqtan, Gilad hám Bashan jeri onıki boldı.

‏ Joshua 17

Menashshe urıwına berilgen jerler

1 Yusuptiń tuńǵısh ulı Menashsheniń urpaqlarına, Menashshe urıwına berilgen úles jerler mınalar edi: Giladtıń ákesi Maxir Menashsheniń tuńǵısh ulı edi. Maxir jawınger adam bolǵanlıqtan, Gilad hám Bashan jeri onıki boldı. 2 Menashsheniń basqa ulları Abiezer, Xelek, Asriel, Shexem, Xefer hám Shemidanıń ullarına da tiyre sanına qaray úles berildi. Bular tiyre kósemleri bolıp, Yusuptiń ulı Menashsheniń er balaları edi.

3 Menashsheniń quwlıǵı, Maxirdiń shawlıǵı, Giladtıń aqlıǵı, Xeferdiń ulı bolǵan Selofexadtıń ul balası bolmadı. Onıń tek Maxla, Noa, Xogla, Milka hám Tirsa degen qızları boldı. 4 Sol qızlar ruwxaniy Elazarǵa, Nun ulı Eshuaǵa hám basshılarǵa kelip, olarǵa:

– Er tuwısqanlarımız qatarı bizlerge de úles beriliwin Jaratqan Iye Muwsaǵa buyırǵan edi, – dedi. Sonda Eshua Jaratqan Iyeniń buyrıǵı boyınsha olarǵa da er tuwısqanları qatarı jerden úles berdi. 5 Solay etip, Menashshe urıwına Iordan dáryasınıń shıǵısındaǵı Gilad hám Bashan jerinen basqa, jáne on jer úles etip berildi. 6 Óytkeni Menashsheniń qız urpaqları da er urpaqları qatarı jerden úles alǵan edi. Al Gilad jeri bolsa, Menashsheniń basqa ullarına berildi.

7 Menashshe urıwınıń jeri Asherden Shexemniń shıǵısındaǵı Mixmetatqa sozılatuǵın edi hám shegarası ol jerden qublaǵa burılıp, En-Tappuax xalqınıń jerlerine deyin baratuǵın edi. 8 Tappuax qalasınıń átirapındaǵı jerler Menashshe urıwına, al onıń shegarasındaǵı Tappuax qalasınıń ózi Efrayım urıwına tiyisli edi. 9 Sońınan shegara Qana sayına túsip, saydıń qublasındaǵı Menashshe urıwına tiyisli qalalar arasındaǵı Efrayım urıwına tiyisli qalalarǵa deyin baratuǵın edi. Menashshe urıwınıń jer shegarası saydıń arqa tárepi boyınsha sozılıp, Jer Orta teńizine barıp toqtaytuǵın edi. 10 Qubladaǵı jerler Efrayım urıwıniki, al arqadaǵı jerler Menashshe urıwıniki bolıp, batısta Jer Orta teńizi, arqada Asher, shıǵısta Issaxar urıwınıń jerleri menen shegaralasatuǵın edi.

11 Issaxar hám Asher urıwlarına tiyisli jerlerdegi Beyt-Shean hám onıń awılları, Ibleam hám onıń awılları, Dor, yaǵnıy Nafat-Dor xalqı hám onıń awılları, En-Dor xalqı hám onıń awılları, Taanax xalqı hám onıń awılları, Megiddo xalqı hám onıń awılları Menashshe urıwına tiyisli edi. 12 Degen menen, Menashsheniń urpaqları bul qalalardı qolǵa kirgize almadı. Sebebi qananlılar sol jerlerde qalıwǵa qarar etken edi. 13 Izraillılar kúshke tolǵanda, qananlılardı erksiz xızmetshige aylandırdı, biraq olardı tolıq quwıp shıǵarmadı.

Efrayım hám Menashshe urıwlarınıń úlkenirek jer sorawı

14 Bir kúni Yusuptiń urpaqları Eshuaǵa kelip:

– Ne ushın bizlerge tek bir márte shek taslap, bir úles jer berdiń? Jaratqan Iye bizlerdi jarılqaǵanlıqtan, bizler júdá kóppiz, – dedi.

15 Eshua olarǵa:

– Sizler sonshelli kóp bolsańız hám sizlerge Efrayımnıń tawlı úlkesi tarlıq etip atırǵan bolsa, perizler hám refalardıń jerlerindegi toǵaylardı shawıp, ózlerińizge jer ashıp alıńlar, – dep juwap berdi.

16 Yusuptiń urpaqları Eshuaǵa:

– Awa, tawlı jerler bizlerge jetpeydi. Biraq Beyt-Shean menen onıń awıllarında hám Izreel oypatlıǵında jasaytuǵınlardıń, yaǵnıy sol jerde jasaytuǵın barlıq qananlılardıń temir arbaları bar-ǵo, – dedi.

17 Eshua Yusuptiń ulları Efrayım menen Menashsheniń urpaqlarına bılay dedi:

– Sizler kóp sanlı hám kúshlisiz. Sizler tek bir úles penen qalmaysızlar. 18 Tawlı jerler hám ondaǵı toǵaylıqlar da sizlerdiki boladı. Sizler tereklerdi shawıp, tazalasańlar, ol jerler tolıǵı menen sizlerdiki boladı. Qananlılar kúshli bolsa da, olardıń temir arbaları bolsa da, sizler olardı quwıp shıǵarasızlar.