Jos 18 | KaaIBT22L | STEP | Eldi qolǵa kirgizgennen soń, pútkil Izrail jámiyeti Shiloda bir jerge toplandı. Olar sol jerde Ushırasıw shatırın qurdı.

‏ Joshua 18

Qalǵan jerlerdiń bólistiriliwi

1 Eldi qolǵa kirgizgennen soń, pútkil Izrail jámiyeti Shiloda bir jerge toplandı. Olar sol jerde Ushırasıw shatırın qurdı. 2 Degen menen, olardıń arasında jerden elege deyin óz úlesin almaǵan jeti urıw bar edi.

3 Sonda Eshua izraillılarǵa bılay dedi:

– Ata-babalarıńızdıń Qudayı Jaratqan Iyeniń sizlerge bergen jerlerin qolǵa kirgiziwdi qashanǵa shekem keshiktiresizler? 4 Hár urıwdan úsh adamnan saylap alıńlar. Men olardı eldi kózden ótkizip keliw ushın jiberejaqpan. Olar úles etip alatuǵın jerleriniń shegaraların belgileydi hám olardı súwretlep jazıp, maǵan qaytıp keledi. 5 Olar bul jerlerdi jeti bólekke bólsin. Yahuda urıwı qubla bólektegi, Yusuptiń urpaqları arqa bólektegi óz jerlerinde qalsın. 6 Jerdi jeti bólekke bólip, súwretlep jazǵanıńızdan keyin, maǵan alıp kelińler. Men bul jerde, Qudayımız Jaratqan Iyeniń aldında sizler ushın shek taslayman. 7 Lebiylilerge kelsek, olardıń sizlerdiń arańızda úlesi joq. Olardıń úlesi – Jaratqan Iye ushın ruwxaniylik xızmetin atqarıwdan ibarat. Al Gad hám Ruben urıwı menen Menashshe urıwınıń yarımı Iordan dáryasınıń shıǵıs tárepinde ózleriniń úles jerlerin alǵan edi. Sol jerlerdi olarǵa Jaratqan Iyeniń qulı Muwsa bergen edi.

8 Eshua jerdi súwretlep jazıp keliw ushın jolǵa shıqpaqshı bolǵan adamlarǵa:

– Barıp, jerlerdi aylanıp shıǵıp, súwretlep jazıń da, sońınan janıma qaytıp kelińler. Keyin men bul jerde, Shiloda, Jaratqan Iyeniń aldında sizler ushın shek taslayman, – dep buyırdı.

9 Solay etip, adamlar jolǵa atlanıp, eldi aylanıp shıqtı. Olar eldi qalama-qala jeti bólekke bólgen halda kitapqa súwretlep jazdı da, Shiloǵa, ordada bolǵan Eshuaǵa qaytıp keldi. 10 Eshua Shiloda, Jaratqan Iyeniń aldında olar ushın shek taslap, jerlerdi Izrail urıwları arasında bólistirdi.

Benyamin urıwına berilgen jerler

11 Tiyre sanına qaray, Benyamin urıwı ushın shek taslandı. Olardıń shegine túsken jerler Yahuda urıwı menen Yusuptiń urpaqlarınıń jerleri arasında edi. 12 Olardıń jeriniń shegarası arqada Iordan dáryasınan baslanıp, Erixonıń arqa tárepine kóteriletuǵın, batısta tawlı úlkege qaray sozılıp, Beyt-Awenniń átirapındaǵı elsiz dalada toqtaytuǵın edi. 13 Shegara ol jerden Luzdıń janbawırına, yaǵnıy Beyt-Eldiń qubla tárepine ótip, Beyt-Xoronnıń qublasındaǵı tawdıń qasındaǵı tómengi Atrot-Addarǵa túsedi. 14 Ol jerden shegara burılıp, Beyt-Xoronnıń qarsısında bolǵan tawdıń batıs tárepi menen qublaǵa qaray sozıladı hám Yahuda urıwına tiyisli bolǵan Kiryat-Baal, yaǵnıy Kiryat-Yarim qalasında toqtaydı. Bul batıs shegarası edi.

15 Al qubla shegarası Kiryat-Yarimniń shetinen baslanıp, Neftoax suw bulaǵına deyin sozılatuǵın edi. 16 Shegara bul jerden Refaim oypatlıǵınıń arqa tárepindegi Ben-Hinnom oypatlıǵına qaraǵan tawdıń eteklerine barıp, Hinnom oypatlıǵı arqalı ótetuǵın hám Ebustıń ^{▼▼ Ebus – Erusalimniń eski atı.} qubla tárepine, ol jerden Rogel bulaǵına túsetuǵın edi. 17 Arqaǵa burılǵan shegara En-Shemesh hám Adummim biyikliginiń qarsısındaǵı Gelilotqa barıp, Rubenniń ulı Bohannıń tasına túsetuǵın edi. 18 Sońınan Iordan tegisliginiń janındaǵı qırdıń arqa tárepinen ótip, tegislikke túsetuǵın edi. 19 Ol jerden Beyt-Xoglanıń arqa eteklerine ótip, Óli teńizdiń arqa qoltıǵında, Iordan dáryasınıń qubla quyar qoltıǵında toqtaytuǵın edi. Bul qubla shegarası edi. 20 Shıǵıs shegarası Iordan dáryası edi. Tiyre sanına qaray, Benyamin urıwınıń úlesine tiygen jerlerdiń shegaraları usılar edi.

21 Tiyre sanına qaray, Benyamin urıwınıń úlesine tiygen qalalar mınalar edi: Erixo, Beyt-Xogla, Emek-Kesis, 22 Beyt-Araba, Semarayım, Beyt-El, 23 Awwim, Para, Ofra, 24 Kefar-Ammoniy, Ofniy, Geba. Hámmesi bolıp, awılları menen birlikte on eki qala. 25 Gibon, Rama, Beerot, 26 Mispe, Kefira, Mosa, 27 Rekem, Irpeel, Tarala, 28 Sela, Elef, Ebus, yaǵnıy Erusalim, Gibat hám Kiryat. Hámmesi bolıp, awılları menen birlikte on tórt qala. Tiyre sanına qaray, Benyamin urıwınıń úlesi usı edi.