‏ Joshua 19

Shimon urıwına berilgen jerler

1Ekinshi shek Shimonǵa, tiyre sanına qaray, Shimon urıwına tústi. Olardıń úlesi Yahuda urıwınıń úlesine tiygen jerlerdiń ishinde edi. 2Olarǵa mına qalalar berildi: Beer-Sheba yaǵnıy Sheba, Molada, 3Xasar-Shual, Bala, Esem, 4Eltolad, Betul, Xorma, 5Siklag, Beyt-Markabot, Xasar-Susa, 6Beyt-Lebaot, Sharuxen. Hámmesi bolıp, awılları menen birlikte on úsh qala. 7Ayın, Rimmon, Eter hám Ashan. Bular awılları menen birlikte tórt qala.

8Baalat-Beer, yaǵnıy Negebtegi Ramaǵa qaray sozılǵan bul qalalardıń átirapındaǵı barlıq awıllar da Shimon urıwına tiyisli edi. Tiyre sanına qaray, Shimon urıwına tiygen úles usı edi. 9Shimon urıwına berilgen úles Yahuda urıwınıń úlesinen alınǵan edi. Óytkeni Yahuda urıwınıń úlesi kereginen artıq edi. Solay etip, Shimon urıwınıń úlesi Yahuda urıwına tiyisli jerdiń ishinde edi.

Zebulon urıwına berilgen jerler

10Tiyre sanına qaray, úshinshi shek Zebulon urıwına tústi. Olardıń jerleri Saridke shekem sozılatuǵın edi. 11Shegara sol jerden batısqa qaray, Maralaǵa deyin barıp, Dabbeshetke jetetuǵın hám Ioqneam qarsısındaǵı sayǵa deyin sozılatuǵın edi. 12Sońınan Saridtan kúnshıǵısqa, Kislot-Tabordıń shegarasına barıp, ol jerden Daberatqa taqalatuǵın hám Yafiaǵa shıǵatuǵın edi. 13Shıǵıs shegarası Yafiadan Gat-Xefer hám Et-Qasinge ótip, Rimmonǵa deyin sozılatuǵın, keyin Neaǵa burılatuǵın edi. 14Al arqa shegarası bul jerden Xannatonǵa burılıp, Iftax-El oypatlıǵına kelip toqtaytuǵın edi. 15Bul shegara Qattat, Nahalal, Shimron, Idala hám Beytlehemdi óz ishine aladı. Hámmesi bolıp, olar awılları menen birlikte on eki qala edi. 16Tiyre sanına qaray, Zebulon urıwına usı qalalar awılları menen birlikte úles etip berildi.

Issaxar urıwına berilgen jerler

17Tórtinshi shek Issaxarǵa, tiyre sanına qaray, Issaxar urıwına tústi. 18Olardıń jer shegarasınıń ishine kirgen qalalar: Izreel, Kesullot, Shunem, 19Xafarayım, Shion, Anaxarat, 20Rabbit, Kishyon, Ebes, 21Remet, En-Gannim, En-Xadda hám Beyt-Passes. 22Olardıń shegarası Tabor, Shaxasima hám Beyt-Shemesh arqalı sozılıp, Iordan dáryasına kelip toqtaytuǵın edi. Hámmesi bolıp, olar awılları menen birlikte on altı qala edi. 23Tiyre sanına qaray, Issaxar urıwına usı qalalar awılları menen birlikte úles etip berildi.

Asher urıwına berilgen jerler

24Tiyre sanına qaray, besinshi shek Asher urıwına tústi. 25Olardıń jer shegarasınıń ishine kirgen qalalar: Xelqat, Xaliy, Beten, Axshaf, 26Allammelex, Amad hám Mishal bolıp, batısta Karmel hám Shixor-Libnatqa deyin sozılatuǵın edi. 27Bul jerden shıǵısqa, Beyt-Dagonǵa qaytıp, Zebulon shegarası hám Iftax-El oypatlıǵı boyınsha sozılatuǵın, al arqada Beyt-Emek hám Neielge jalǵasatuǵın edi. Keyin Kabuldıń arqa tárepinen 28Ebron, Rexob, Xammon hám Qanaǵa ótip, ullı Sidonǵa jetetuǵın edi. 29Usı jerden Ramaǵa qaytıp, qorǵanlı Tir qalasına qaray sozılatuǵın, keyin Xosaǵa burılıp, Axzib aymaǵında, Jer Orta teńizinde tamamlanatuǵın edi. 30Jáne de, Umma, Afek hám Rexob. Hámmesi bolıp, awılları menen birlikte jigirma eki qala. 31Tiyre sanına qaray, Asher urıwına usı qalalar awılları menen birlikte úles etip berildi.

Naftaliy urıwına berilgen jerler

32Altınshı shek Naftaliyge, tiyre sanına qaray, Naftaliy urıwına tústi. 33Olardıń shegarası Xelef hám Saanannimdegi terebinf aǵashınan baslanıp, Adamiy-Nekeb hám Yabneel arqalı Laqqumǵa qaray sozılatuǵın hám Iordan dáryasında tamamlanatuǵın edi. 34Shegara jáne Xeleften baslanıp, batısqa qaray Aznot-Tabordan ótetuǵın hám Xuqoqqa jalǵasatuǵın edi. Qublada Zebulon jerlerine, batısta Asher jerlerine, al shıǵısta Iordan dáryasına barıp tireletuǵın edi.

35Olardıń qorǵanlı qalaları mınalar edi: Siddim, Ser, Xammat, Raqqat, Kinneret, 36Adama, Rama, Xasor, 37Kedesh, Edrey, En-Xasor, 38Iron, Migdal-El, Xorem, Beyt-Anat, Beyt-Shemesh. Hámmesi bolıp, awılları menen birlikte on toǵız qala. 39Tiyre sanına qaray, Naftaliy urıwına usı qalalar awılları menen birlikte úles etip berildi.

Dan urıwına berilgen jerler

40Tiyre sanına qaray, jetinshi shek Dan urıwına tústi. 41Olardıń úlesine tiygen jerler mına qalalardı óz ishine aladı: Sora, Eshtaol, Ir-Shemesh, 42Shaalabbin, Ayyalon, Itla, 43Elon, Timna, Ekron, 44Elteke, Gibbeton, Baalat, 45Ehud, Bene-Beraq, Gat-Rimmon, 46Me-Yarqon hám Yafonıń qarsısındaǵı jerler menen birlikte Raqqon. 47Jerlerinen ayırılıp qalǵanlıqtan, Dan urıwı Leshemge hújim jasadı. Olar qalanı alıp, pútkil xalqın qılıshtan ótkizdi de, sol jerge ornalasıp aldı. Jáne de, babası Dannıń húrmetine sol jerdi Dan dep atadı. 48Tiyre sanına qaray, Dan urıwına usı qalalar awılları menen birlikte úles etip berildi.

Eshuaǵa tiygen úles

49Jerlerdi shegaralap bólistirip bolǵannan soń, izraillılar óz jerleri ishinen Nun ulı Eshuaǵa úles berdi. 50Jaratqan Iyeniń buyrıǵı boyınsha, olar Eshuaǵa ózi soraǵan qalanı, Efrayımnıń tawlı úlkesindegi Timnat-Seraxtı berdi. Eshua qalanı qaytadan salıp, sol jerge ornalastı.

51Ruwxaniy Elazar, Nun ulı Eshua hám Izrail urıwlarındaǵı tiyre basshılarınıń Shiloda, Jaratqan Iyeniń aldında, Ushırasıw shatırınıń kirer awzınıń aldında shek taslap bólistirgen úles jerleri usılar edi. Solay etip, olar eldi bólistiriw isin tamamladı.