Jos 2 | KaaIBT22L | STEP | Nun ulı Eshua Shittimnen jasırın túrde eki jansızdı jiberip atırıp, olarǵa: – Barıp, Qanan jerin, ásirese Erixonı kózden ótkizińler, – dedi. Solay etip, jansızlar jolǵa shıǵıp, Raxab degen buzıq hayaldıń úyine keldi hám sol jerde qonıp qaldı.

‏ Joshua 2

Raxab hám jansızlar

1 Nun ulı Eshua Shittimnen jasırın túrde eki jansızdı jiberip atırıp, olarǵa:

– Barıp, Qanan jerin, ásirese Erixonı kózden ótkizińler, – dedi. Solay etip, jansızlar jolǵa shıǵıp, Raxab degen buzıq hayaldıń úyine keldi hám sol jerde qonıp qaldı.

2 Sonda Erixo patshasına: «Elimizdi kózden ótkiziw ushın, usı túni Izrail xalqınan adamlar keldi», – degen xabar jetti. 3 Sonlıqtan Erixo patshası Raxabqa: «Seniń úyińe kelgen sol adamlardı shıǵarıp ber. Sebebi olar elimizdi kózden ótkiziw ushın kelgen», – degen xabar jolladı. 4 Al eki adamdı jasırıp qoyǵan Raxab:

– Sol adamlardıń maǵan kelgeni ıras. Biraq men olardıń qay jerli ekenin bilmegen edim. 5 Gewgim túspesten burın, qala dárwazası jabılayın dep atırǵanda, olar shıǵıp ketti. Olardıń qay jaqqa ketkenin bilmeymen. Izlerinen dárhal ketseńiz, jetip alasızlar, – dedi. 6 Negizinde hayal sol adamlardı tamnıń tóbesine shıǵarıp, ol jerge jayıp qoyılǵan zıǵır bawlarınıń astına jasırǵan edi. 7 Al patshanıń adamları bolsa, jansızlardı Iordan dáryasın kesip ótetuǵın jerge qaray quwıp ketti. Olar qaladan shıǵıwdan-aq, qala dárwazası jabıldı.

8 Tamnıń tóbesindegi adamlar uyqıǵa jatpasınan aldın, hayal olardıń janına bardı da, 9 olarǵa bılay dedi:

– Jaratqan Iyeniń bul eldi sizlerge bergenin bilemen. Bizlerdi sizler sebepli qorqınısh biyledi. Elde jasaytuǵın hár bir adamnıń ruwxı túsip júr. 10 Óytkeni sizler Mısırdan shıqqanıńızda, Jaratqan Iyeniń Qızıl teńizdi aldıńızda qalay qurǵatıp taslaǵanın ^{▼▼ Shıǵ 14:10-31.}, Iordan dáryasınıń arǵı jaǵındaǵı amorlardıń eki patshası Sixon menen Ogqa sizler neler islegenińizdi, olardı qalayınsha pútkilley qırıp taslaǵanıńızdı ^{▼▼ San 21:21-35; Nzm 2:24–3:11.} esitken edik. 11 Bulardı esitkenimizde, ruwxımız túsip ketti. Sizlerden qorqqanımızdan, hesh kimde hal-dárman qalmadı. Sebebi sizlerdiń Qudayıńız Jaratqan Iye – joqarıdaǵı aspanda da, tómendegi jer júzinde de Quday. 12 – 13 Sizlerge jaqsılıq etkenim sıyaqlı, sizler de meniń úy-ishime jaqsılıq etetuǵınıńızǵa Jaratqan Iye haqı ant ishińler. Ata-anamdı, aǵa-inilerimdi, apa-sińlilerimdi hám olardıń úy-ishlerin ólimnen saqlap, hámmemizdi aman qaldıratuǵınıńızdı bildiretuǵın isenimli bir belgi berińler.

14 Adamlar oǵan:

– Eger bul isimizdi áshkara qılmasańız, bizler sizler ushın janımızdı beriwge tayarmız. Jaratqan Iye bul jerdi bizlerge bergeninde, saǵan jaqsılıq islep, sadıqlıq kórsetemiz, – dedi.

15 Úyi qala diywalında jaylasqanlıqtan, Raxab adamlardı arqan menen áynekten tómenge túsirdi de, 16 olarǵa:

– Izińizden quwıp ketken adamlar sizlerge dus kelip qalmawı ushın, tawǵa shıǵıńlar. Olar izlerine qaytıp ketkenge deyin, úsh kún sol jerde jasırınıp turıńlar. Sońınan jolıńızdı dawam etersizler, – dedi. 17 Sol adamlar Raxabqa bılay dedi:

– Bizler ishtirgen antıńda turıwımız ushın mına nárseni islewiń shárt: 18 Usı elge kirgenimizde, mına qırmızı arqandı bizlerdi túsirip jibergen áynegińe baylap qoy. Sońınan ata-anańdı, tuwısqanlarıńdı hám ákeńniń pútkil xojalıǵın janıńa, óz úyińe jıyna. 19 Seniń úyińniń qapısınan sırtqa shıqqan adam óz bası ushın ózi juwap beredi. Bunday adam ushın bizler juwapker emespiz. Biraq eger seniń menen birge úyińde bolǵan bir adam jábir kórse, onıń ólimine bizler juwapker bolamız. 20 Degen menen, islerimizdi áshkara qılsań, onda bizler sen ishtirgen anttan azat bolamız.

21 Hayal olarǵa:

– Aytqanıńızday bolsın, – dedi hám olardı jolǵa shıǵarıp salǵannan soń, qırmızı arqandı áynekke baylap qoydı.

22 Adamlar ol jerden ketip, tawǵa shıqtı hám izlerinen quwǵanlar qaytıp ketkenshe, sol jerde úsh kún qaldı. Olardıń izinen quwǵanlar barlıq jerden olardı izlese de, taba almadı. 23 Eki adam izine qaytıw ushın tawdan tústi de, dáryanı kesip ótip, Nun ulı Eshuanıń janına bardı hám baslarınan ótken hámme nárseni aytıp berdi. 24 Olar Eshuaǵa:

– Jaratqan Iye haqıyqattan da usı jerdiń barlıǵın bizlerdiń qolımızǵa tapsırıptı. Ol jerde jasaytuǵın hár bir adam bizlerden qorqıp, ruwxı túsip júr eken, – dedi.