‏ Joshua 20

Panalaytuǵın qalalar

1Bunnan soń, Jaratqan Iye Eshuaǵa bılay dedi:

2– Muwsa arqalı sizlerge buyırǵanımday, izraillılarǵa ayt, olar ózleri panalaytuǵın qalalardı tańlasın. 3Eger birew abaysızda adam óltirip qoysa, ol sol jerge qashıp barsın. Sizlerdiń ólgen adamnıń ósh alıwshı ámeńgerinen qashıp panalaytuǵın bir jerińiz bolıwı kerek.

4Bul qalalardıń birine qashqan adam qala dárwazasınıń qasında turıp, óziniń awhalın qalanıń aqsaqallarına bildirsin. Aqsaqallar onı qalasına qabıl etip, oǵan jasaytuǵın orın bersin. 5Adam óltirgen adamnıń izinen ósh alıwshı ámeńgeri quwıp kelse, qalanıń basshıları onı ósh alıwshı adamǵa tapsırıp jibermesin. Sebebi ol abaysızda adam óltirdi hám onda óltirgen adamına degen aldın ala hesh qanday qaslıq bolmaǵan. 6Adam óltirgen adam qaladaǵı jámiyetshilik aldında húkim etilmegenshe hám sol waqıtta xızmet etken bas ruwxaniy ólgenge deyin, sol qalada qalıwı kerek. Sońınan ol ózi qashıp shıqqan qalasına, óz úyine qaytsın.

7Solay etip, olar Naftaliydiń tawlı úlkesindegi, yaǵnıy Galiladaǵı Kedeshti, Efrayımnıń tawlı úlkesinde bolǵan Shexemdi hám Yahudanıń tawlı úlkesindegi Kiryat-Arbanı, yaǵnıy Xebrondı tańladı. 8Jáne de, Iordan dáryasınıń arǵı jaǵındaǵı, Erixonıń shıǵısındaǵı mına qalalardı tańladı: olar Ruben urıwına tiyisli tegisliktegi shólde jaylasqan Beser qalası, Gad urıwınıń jerleri ishindegi Giladtaǵı Ramot, Menashshe urıwınıń jerleri ishindegi Bashandaǵı Golan edi. 9Bul qalalar izraillılar hám olar arasında jasaytuǵın kelgindi adamlar ushın ajıratıldı. Eger olardıń birewi abaysızda adam óltirip qoysa, ósh alıwshı ámeńgerdiń qolınan ólim kórmew ushın, sol qalalarǵa qashıp baradı. Ol jámiyetshiliktiń aldında húkim etilmegenshe, sol jerde qáwip-qátersiz boladı.
Copyright information for KaaIBT22L