Jos 21 | KaaIBT22L | STEP | Lebiy urıwınıń tiyre basshıları ruwxaniy Elazar, Nun ulı Eshua hám Izrail urıwlarınıń tiyre basshılarına bardı.

‏ Joshua 21

Lebiylilerge berilgen qalalar

1 Lebiy urıwınıń tiyre basshıları ruwxaniy Elazar, Nun ulı Eshua hám Izrail urıwlarınıń tiyre basshılarına bardı. 2 Olar Qanan jerindegi Shiloda edi. Sonda lebiyliler olarǵa:

– Jaratqan Iye Muwsa arqalı bizlerge jasaw ushın qalalar, mallarımız ushın qala átirapındaǵı jaylawlar beriliwin buyırǵan edi, – dedi.

3 Solay etip, izraillılar Jaratqan Iyeniń buyrıǵına qulaq asıp, lebiylilerge óz úleslerinen mına qalalardı hám olardıń átirapındaǵı jaylaw jerlerdi berdi:

4 Birinshi shek Qohat tiyrelerine tústi. Lebiyli bolǵan ruwxaniy Xaronnıń urpaqlarına shek boyınsha Yahuda, Shimon hám Benyamin urıwlarınan on úsh qala berildi. 5 Al Qohattıń basqa urpaqlarına shek boyınsha Efrayım, Dan hám Menashshe urıwınıń yarımına tiyisli bolǵan tiyrelerden alınǵan on qala berildi.

6 Gershon urpaqlarına shek boyınsha Issaxar, Asher, Naftaliy urıwlarına tiyisli bolǵan tiyrelerden hám Bashandaǵı Menashshe urıwınıń yarımınan alınǵan on úsh qala berildi.

7 Tiyre sanına qaray, Merariy urpaqlarına Ruben, Gad hám Zebulon urıwlarınan alınǵan on eki qala berildi.

8 Solay etip, Jaratqan Iyeniń Muwsa arqalı buyırǵanınday, izraillılar shek taslap, usı qalalardı jaylawları menen birlikte lebiylilerge berdi.

9 Yahuda hám Shimon urıwlarınan alınǵan hám tómende atları atalatuǵın qalalar 10 lebiyli Qohat tiyrelerinen bolǵan Xaronnıń urpaqlarına berildi. Sebebi birinshi shek olarǵa túsken edi. 11 Olarǵa Yahudanıń tawlı úlkesindegi Anaqtıń urpaqlarınıń túp babası bolǵan Arbanıń atı menen atalǵan Kiryat-Arba, yaǵnıy Xebron hám onıń átirapındaǵı jaylawlar berildi. 12 Al qalanıń atızları menen awılları bolsa, Efunne ulı Kalebke múlik etip berilgen edi.

13 Ruwxaniy Xaronnıń urpaqlarına abaysızda adam óltirgenler panalaytuǵın Xebron qalasın, Libnanı, 14 Yattir, Eshtemoa, 15 Xolon, Debir, 16 Ayın, Yutta hám Beyt-Shemesh qalaları menen olardıń jaylawları, yaǵnıy Yahuda hám Shimon urıwlarınan barlıǵı bolıp toǵız qala berildi. 17 Al Benyamin urıwınan Gibon, Geba, 18 Anatot hám Almon degen tórt qala jaylawları menen birlikte berildi.

19 Solay etip, Xaron urpaǵınan shıqqan ruwxaniylerge jaylawları menen birlikte berilgen qalalardıń sanı barlıǵı bolıp on úshke jetti.

20 Lebiy urıwınıń Qohat tiyreleriniń qalǵan adamlarına Efrayım urıwınan mına qalalar úles etip berildi: 21 Efrayımnıń tawlı úlkesindegi abaysızda adam óltirgenler panalaytuǵın Shexem qalası hám Gezer, 22 Kibsayım, Beyt-Xoron degen tórt qala jaylawları menen birlikte berildi. 23 Al Dan urıwınan Elteke, Gibbeton, 24 Ayyalon hám Gat-Rimmon degen tórt qala jaylawları menen birlikte berildi. 25 Menashshe urıwınıń yarımınan jaylawları menen birlikte Taanax hám Gat-Rimmon degen eki qala berildi. 26 Solay etip, Qohattıń qalǵan urpaqlarına jaylawları menen birlikte barlıǵı bolıp on qala berildi.

27 Lebiy urıwınan bolǵan Gershonnıń urpaqlarına Menashshe urıwınıń yarımına tiyisli bolǵan eki qala: Bashandaǵı abaysızda adam óltirgenler panalaytuǵın Golan qalası hám Beeshtera qalası jaylawları menen birlikte berildi. 28 Issaxar urıwınan bolsa, jaylawları menen birlikte Kishyon, Daberat, 29 Yarmut hám En-Gannim degen tórt qala berildi. 30 Asher urıwınan jaylawları menen birlikte Mishal, Abdon, 31 Xelqat hám Rexob degen tórt qala berildi. 32 Naftaliy urıwınan úsh qala jaylawları menen birlikte berildi: olar Xammot-Dor, Qartan hám abaysızda adam óltirgenler panalaytuǵın Galiladaǵı Kedesh qalası. 33 Tiyre sanına qaray, Gershonnıń urpaqlarına jaylawları menen birlikte barlıǵı bolıp on úsh qala berildi.

34 Qalǵan lebiylilerge, yaǵnıy Merariydiń urpaqlarınıń tiyrelerine Zebulon urıwınan alınǵan Ioqneam, Qarta, 35 Dimna hám Nahalal degen tórt qala jaylawları menen birlikte berildi. 36 Ruben urıwınan alınǵan Beser, Yahasa, 37 Kedemot hám Mefaat degen tórt qala jaylawları menen birlikte berildi. 38 Gad urıwınan Giladtaǵı panalaytuǵın Ramot qalası hám Maxanayım, 39 Xeshbon hám Yazer qalaları barlıǵı bolıp tórt qala jaylawları menen birlikte berildi. 40 Tiyre sanına qaray, lebiylilerdiń qalǵan tiyrelerine, yaǵnıy Merariydiń urpaqlarına úles etip berilgen qalalardıń sanı barlıǵı bolıp on eki edi.

41 Izraillılardıń jerlerinen lebiylilerge jaylawları menen birlikte barlıǵı bolıp qırıq segiz qala berildi. 42 Bul qalalardıń hámmesiniń átirapında jaylawları bar edi. Jaylawsız qala joq edi.

Izraillılardıń jerdi tolıq iyelep alıwı

43 Solay etip, Jaratqan Iye ata-babalarına beriwge ant ishken barlıq jerlerdi izraillılarǵa berdi. Izraillılar sol jerlerdi iyelep, mákan bastı. 44 Jaratqan Iye ata-babalarına ant ishkenindey, olardı hár tárepleme tınıshlıqqa eristirdi. Hesh bir dushpanı olarǵa qarsı tura almadı. Jaratqan Iye dushpanlarınıń hámmesin olarǵa táslim etti. 45 Jaratqan Iyeniń Izrail xalqına bergen hesh bir iygilikli sózi orınlanbay qalmadı, hámmesi iske astı.