‏ Joshua 22

Shıǵıstaǵı urıwlardıń qaytıwı

1Bunnan soń, Eshua Ruben hám Gad urıwları menen Menashshe urıwınıń yarımın jıynadı da, 2olarǵa bılay dedi:

– Sizler Jaratqan Iyeniń qulı Muwsanıń ózlerińizge buyırǵan hár bir nársesin isledińler. Meniń hámme buyrıqlarıma da boysındıńlar. 3Sonshama waqıt dawamında, búginge deyin tuwısqanlarıńızdı jalǵız taslap ketpedińler. Qudayıńız Jaratqan Iyeniń sizlerge bergen buyrıǵın orınladıńlar. 4Minekey, Qudayıńız Jaratqan Iye tuwısqanlarıńızǵa wáde qılǵanınday, olardı tınıshlıqqa eristirdi. Endi Jaratqan Iyeniń qulı Muwsanıń Iordan dáryasınıń arǵı jaǵasında sizlerge múlik qılıp bergen jerlerdegi úylerińizge qaytıńlar. 5Biraq Jaratqan Iyeniń qulı Muwsanıń sizlerge bergen buyrıqların hám Nızamın muqıyatlı túrde orınlańlar. Qudayıńız Jaratqan Iyeni súyińler, Onıń jolı menen júrip, buyrıqların orınlańlar. Oǵan sadıq bolıńlar, Oǵan shın júregińiz hám jan-tánińiz benen xızmet etińler.

6Sońınan Eshua olarǵa aq pátiyasın berip, jolǵa atlandırdı. Solay etip, olar úylerine qaytıp ketti.

7Muwsa Menashshe urıwınıń yarımına Bashanda jer bergen edi. Eshua bolsa, Menashshe urıwınıń qalǵan yarımına Iordan dáryasınıń batısınan, basqa tuwısqanları arasınan jer berdi.

Eshua olardı úylerine qaytarıp atırıp, olarǵa aq pátiyasın berip:

8– Úylerińizge úlken baylıq penen, júdá kóp mal, gúmis, altın, mıs, temir hám júdá kóp kiyim-kenshek penen qaytıp baratırsızlar. Dushpanlarıńızdan olja qılıp alǵan nárselerińizdi tuwısqanlarıńız benen bólisińler, – dedi.

9Solay etip, Ruben hám Gad urıwları menen Menashshe urıwınıń yarımı Qanan jerindegi Shilodan, izraillılardıń janınan ketti. Olar Jaratqan Iyeniń buyrıǵı boyınsha, Muwsa arqalı ózleri múlik etip alǵan Gilad jerine qaytıw ushın jolǵa shıqtı.

10Ruben hám Gad urıwları menen Menashshe urıwınıń yarımı Iordan dáryasına jaqın ornalasqan Qanan jerindegi aymaqqa kelgende, dáryanıń jaǵasında kórinisi úlken bolǵan qurbanlıq orın qurdı. 11Izrail xalqına: «Ruben hám Gad urıwları menen Menashshe urıwınıń yarımı Qanan eliniń shegarasında, Iordan dáryasınıń jaǵasında, izraillılarǵa tiyisli jerde bir qurbanlıq orın qurdı», – degen xabar jetti. 12Izrail xalqı bul xabardı esitkende, olarǵa qarsı urısıw ushın pútkil jámiyet Shiloǵa jıynaldı.

13Sonda izraillılar ruwxaniy Elazardıń ulı Pinexastı Gilad jerine, Ruben hám Gad urıwları menen Menashshe urıwınıń yarımına jiberdi. 14Onıń menen birge Izrail urıwlarınan on kósem ketti. Bul kósemlerdiń hár biri Izrail tiyreleriniń ishindegi óz qáwimlerine basshı edi. 15Olar Gilad jerine, Ruben hám Gad urıwları menen Menashshe urıwınıń yarımına kelip bılay dedi:

16– Jaratqan Iyeniń pútkil jámiyeti bılay deydi: «Sizler nege Izraildıń Qudayına qıyanet ettińler? Nege búgin sizler ózlerińiz ushın qurbanlıq orın qurıp, Jaratqan Iyeden waz keshtińler hám Oǵan qarsı bas kóterdińler? 17Bizlerge Peor tawındaǵı gúnamız ▼

▼ San 25:1-9.

az ba edi? Jaratqan Iyeniń jámiyeti sol gúna sebepli bálege jolıqqan edi. Bizler usı kúnge deyin ózlerimizdi bul gúnadan tazalay almadıq. 18Sizler búgin Jaratqan Iyeden waz keshtińiz! Eger sizler búgin Jaratqan Iyege qarsı qozǵalań kóterseńiz, Ol da erteń pútkil Izrail jámiyetine ǵázeplenedi. 19Eger sizlerge tiyisli jerler hadal bolmasa, Jaratqan Iyeniń shatırı turǵan Oǵan tiyisli jerge kelip, aramızdaǵı jerden úles alıńlar. Ózlerińizge Qudayımız Jaratqan Iyeniń qurbanlıq ornınan basqa bir qurbanlıq orın qurıp, Jaratqan Iyege hám bizlerge qarsı qozǵalań kótermeńler. 20Zerax ulı Axan baǵıshlanǵan oljadan alıp, qıyanet etkende, pútkil Izrail jámiyeti ǵázepke ushıramadı ma? Axannıń gúnası ushın tek onıń ózi ǵana ólimge duwshar bolmadı-ǵo!»

21Sonda Ruben hám Gad urıwları menen Menashshe urıwınıń yarımı Izraildıń tiyre basshılarına bılay dep juwap berdi:

22– Jaratqan Iye – qudaylar Qudayı! Jaratqan Iye – qudaylar Qudayı! Ol bulardıń barlıǵın biledi hám Izrail da bilip qoysın: eger bizler islegen isimizdi Jaratqan Iyege qarsı qozǵalań kóteriw yamasa Oǵan qıyanet islew maqsetinde islegen bolsaq, onda búgin Jaratqan Iye bizlerdi ayamasın! 23Eger bizler qurbanlıq orındı Jaratqan Iyeden waz keshiw ushın, jandırılatuǵın qurbanlıqlardı, ǵálle sadaqaların yamasa tatıwlıq qurbanlıqların beriw ushın qurǵan bolsaq, Jaratqan Iyeniń Ózi bizlerdi jazalasın. 24Bizler bul isti mınadan táshiwishlengenimiz sebepli islegen edik: keleshekte sizlerdiń urpaqlarıńız bizlerdiń urpaqlarımızǵa: «Izraildıń Qudayı Jaratqan Iye menen sizlerdiń qanday baylanısıńız bar? 25Háy, Ruben hám Gad urpaqları! Jaratqan Iye sizler menen bizlerdiń aramızǵa Iordan dáryasın shegara qılıp qoyǵan. Sizlerdiń Jaratqan Iyege hesh qanday qatnasıńız joq», – dep bizlerdiń urpaqlarımızdıń Jaratqan Iyeden qorqıp jasawına tosqınlıq jasawı múmkin. 26Sonlıqtan bizler ózlerimiz ushın qurbanlıq orın qurıwdı sheshtik. Bunı jandırılatuǵın qurbanlıq hám basqa qurbanlıqlar ushın emes, 27al tek sizler menen bizlerdiń aramızda hám keleshek áwladlar arasında gúwalıq bolıwı ushın isledik. Solay etip, bizler de Jaratqan Iyeniń aldında jandırılatuǵın qurbanlıqlarımız, tatıwlıq qurbanlıqlarımız hám basqa qurbanlıqlarımız benen Oǵan sıyınajaqpız. Sonda sizlerdiń urpaqlarıńız keleshekte bizlerdiń urpaqlarımızǵa: «Jaratqan Iyege hesh qanday qatnasıńız joq», – dep ayta almaydı. 28Solay etip, bizler bılay oyladıq: keleshekte bizlerge yamasa bolajaq urpaqlarımızǵa usılay dese, bizler: «Ata-babalarımızdıń Jaratqan Iyege arnap qurǵan qurbanlıq orınnıń nusqasına qarańlar. Bul orın jandırılatuǵın yamasa basqa qurbanlıqlar ushın emes, al bizler menen sizlerdiń arańızda gúwalıq bolıw ushın qurılǵan», – deymiz. 29Bizler Jaratqan Iyege qarsı qozǵalań kóteriwden, búgin Onnan waz keshiwden, jandırılatuǵın qurbanlıqlar, ǵálle sadaqaları yamasa basqa qurbanlıqlar beriw ushın Qudayımız Jaratqan Iyeniń shatırınıń aldında turǵan qurbanlıq orınnan basqa birewin qurıwdan awlaqpız.

30Ruwxaniy Pinexas hám onıń menen birge bolǵan jámiyet basshıları, yaǵnıy Izraildıń tiyre basshıları Ruben hám Gad urıwları menen Menashshe urıwınıń yarımınıń aytqan sózlerin esitkende kewilleri toldı. 31Sonlıqtan ruwxaniy Elazardıń ulı Pinexas Ruben hám Gad urıwları menen Menashshe urıwınıń yarımına:

– Endi Jaratqan Iyeniń aramızda ekenin bilemiz. Sebebi sizler Oǵan qıyanet etpedińiz hám izraillılardı Onıń jazasınan qutqardıńız, – dedi.

32Ruwxaniy Elazardıń ulı Pinexas hám basshılar Ruben hám Gad urıwları jasaytuǵın Gilad jerinen Qanan jerine, izraillılarǵa qaytıp kelip, ne bolǵanın aytıp berdi. 33Izraillılar bul xabarǵa kewli tolıp, Qudayǵa alǵıslar ayttı. Olar Ruben hám Gad urıwlarına qarsı urıs ashıw hám olardıń jasaytuǵın jerlerin wayran etiw haqqında qaytıp awız ashpadı. 34Ruben hám Gad urıwları: «Bul qurbanlıq orın – bizlerdiń aramızda Jaratqan Iyeniń Quday ekenine gúwa» dep, orındı «Gúwa» dep atadı.