Jos 23 | KaaIBT22L | STEP | Jaratqan Iye Izraildı átirapındaǵı barlıq dushpanlarınan qutqarıp tınıshlıqqa eristirgennen soń, kóp jıllar ótti. Eshua bolsa qartayıp, biraz jasqa barıp qalǵan edi.

‏ Joshua 23

Eshuanıń xoshlasıw sózleri

1 Jaratqan Iye Izraildı átirapındaǵı barlıq dushpanlarınan qutqarıp tınıshlıqqa eristirgennen soń, kóp jıllar ótti. Eshua bolsa qartayıp, biraz jasqa barıp qalǵan edi. 2 Sonda ol pútkil Izrail xalqın, olardıń aqsaqalların, tiyre basshıların, qazıların hám qadaǵalawshıların shaqırıp alıp, olarǵa bılay dedi:

– Men qartayıp, biraz jasqa barıp qaldım. 3 Qudayıńız Jaratqan Iyeniń sizler ushın bul barlıq xalıqlarǵa neler islegenin kórdińler. Óytkeni Qudayıńız Jaratqan Iyeniń Ózi sizler ushın urıstı. 4 Minekey, men Iordan dáryasınan baslap, kún batar táreptegi Jer Orta teńizine deyin jasaǵan barlıq xalıqlardı joq etip, olardıń jerlerin de, ele joq qılınbaǵan xalıqlardıń jerlerin de sizlerdiń urıwlarıńızǵa bólip berdim. 5 Qudayıńız Jaratqan Iye bul xalıqlardı quwıp shıǵarıp, aldıńızdan shegindiredi hám Ózi sizlerge wáde etkenindey, sizler olardıń jerlerin iyeleysizler. 6 Sonlıqtan sizler Muwsanıń Nızam kitabında jazılǵan hár bir nárseni orınlaw ushın júdá kúshli bolıńlar. Jazılǵanlardan ya ońǵa, ya solǵa awıp ketpeńler. 7 Arańızda qalǵan xalıqlar menen hesh qanday qarım-qatnas jasamańlar. Olardıń qudaylarınıń atların tilge almańlar hám olardıń atları menen ant ishpeńler. Sol qudaylarǵa xızmet etpeńler hám tabınbańlar. 8 Búgingi kúnge deyin islep kelgenińizdey, Qudayıńız Jaratqan Iyege sadıq qalıńlar. 9 Sebebi Jaratqan Iye ullı hám kúshli xalıqlardı sizlerdiń aldıńızdan quwıp shıǵardı. Búgingi kúnge deyin hesh kim sizlerge qarsı tura almadı. 10 Sizlerdiń arańızdaǵı birewińiz mıń adamdı quwıp shıǵaradı. Óytkeni Qudayıńız Jaratqan Iyeniń wáde etkenindey, Onıń Ózi sizler ushın urısadı. 11 Sonlıqtan Qudayıńız Jaratqan Iyeni súyiwde júdá muqıyatlı bolıńlar. 12 Al eger sizler Onnan júz burıp, arańızdaǵı qalǵan sol xalıqlar menen aralassańız, olar menen qız alısıp, qız berisetuǵın bolsańız, qarım-qatnas jasasańız, 13 onda bilip qoyıńlar: Qudayıńız Jaratqan Iye sol xalıqlardı endi aldıńızdan quwıp shıǵarmaydı. Onıń sizlerge bergen usı jaqsı jerinen joq bolınǵanıńızsha, bul xalıqlar sizler ushın duzaq, qaqpan, arqańızǵa qamshı hám kózlerińizge tiken boladı.

14 Minekey, meniń de bul dúnyadan ótetuǵın waqtım keldi. Qudayıńız Jaratqan Iyeniń sizlerge bergen wádeleriniń hesh biri bosqa shıqpaǵanın shın júregińiz hám jan-tánińiz benen bilesizler. Olardıń hámmesi orınlandı, hesh biri orınlanbay qalmadı. 15 Qudayıńız Jaratqan Iye sizlerge bergen wádeleriniń hámmesin qalay orınlaǵan bolsa, Ol Ózi bergen usı jaqsı jerden sizlerdi joq etpegenshe, aytqan barlıq jamanlıqların da solay basıńızǵa saladı. 16 Eger Qudayıńız Jaratqan Iyeniń sizlerge orınlań dep buyırǵan kelisimin buzsańız hám barıp, basqa qudaylarǵa xızmet etip, olarǵa tabınsańız, Jaratqan Iyeniń sizlerge ǵázebi tutanadı. Sonda sizler Ol bergen bul jaqsı jerden tez arada qırılıp ketesizler.