Jos 3 | KaaIBT22L | STEP | Eshua tań azannan turdı da, pútkil Izrail xalqı menen birlikte Shittimnen jolǵa shıǵıp, Iordan dáryasına keldi. Olar dáryanı kesip ótpey, sol jerde túnedi.

‏ Joshua 3

Izraillılardıń Iordan dáryasınan ótiwi

1 Eshua tań azannan turdı da, pútkil Izrail xalqı menen birlikte Shittimnen jolǵa shıǵıp, Iordan dáryasına keldi. Olar dáryanı kesip ótpey, sol jerde túnedi. 2 Úshinshi kúnniń sońında ordanı bastan-ayaq aylanıp shıqqan qadaǵalawshılar 3 xalıqqa bılay dep buyırdı:

– Lebiyli ruwxaniyler Qudayıńız Jaratqan Iyeniń Kelisim sandıǵın kóterip baratırǵanın kórgenińizde, sizler de ornıńızdan qozǵalıp, sandıqtıń izine erińler. 4 Solay etip, sizler qaysı tárepke baratuǵınıńızdı bilip alasızlar. Sebebi sizler aldın bul joldan hesh qashan júrip kórmegensizler. Biraq Kelisim sandıǵına jaqınlaspańlar. Sandıq penen sizlerdiń arańızda eki mıń shıǵanaq qashıqlıq bolsın.

5 Eshua xalıqqa:

– Ózlerińizdi pákleńler. Óytkeni Jaratqan Iye erteń arańızda ájayıp isler isleydi, – dedi.

6 Al ruwxaniylerge:

– Kelisim sandıǵın kóterip, xalıqtıń aldında júrińler, – dedi. Solay etip, ruwxaniyler sandıqtı kóterip, xalıqtıń aldında júrip ketti.

7 Sol arada Jaratqan Iye Eshuaǵa bılay dedi:

– Men Muwsa menen birge bolǵanım sıyaqlı, seniń menen de birge ekenimdi olar túsiniwi ushın, búginnen baslap seni pútkil Izrail xalqınıń kóz aldında mártebeli qılaman. 8 Sen Kelisim sandıǵın kótergen ruwxaniylerge: «Iordan dáryasınıń jaǵasına barǵanıńızda, suwǵa ayaq basıp, toqtap turıńlar», – dep buyrıq ber.

9 Eshua Izrail xalqına:

– Jaqınıraq kelip, Qudayıńız Jaratqan Iyeniń sózlerin tıńlańlar, – dep bolıp, sózin bılay dawam etti:

10 – Tiri Qudaydıń arańızda ekenin, Onıń qanan, xet, xiw, periz, girgash, amor hám ebus xalıqların aldıńızdan sózsiz quwıp jiberetuǵının mınadan bilip alasızlar: 11 mine, pútkil jer júzi Iyesiniń Kelisim sandıǵı sizlerden aldın Iordan dáryasınan ótedi. 12 Endi ózlerińizge hár bir urıwdan bir adamnan, yaǵnıy Izrail urıwlarınan on eki adamdı saylap alıńlar. 13 Pútkil jer júziniń Iyesi bolǵan Jaratqan Iyeniń sandıǵın kótergen ruwxaniyler Iordan dáryasına ayaq basqanda, joqarıdan aqqan suwlar toqtap, bir jerge toplanadı.

14 Xalıq Iordan dáryasınan ótiw ushın túnegen jerinen jolǵa shıqtı. Kelisim sandıǵın kótergen ruwxaniyler aldında júrip baratır edi. 15 Iordan dáryası jıyın-terim waqtında tasıp, kánarınan shıǵıp ketetuǵın edi. Sonda sandıqtı kótergen ruwxaniyler dáryanıń jaǵasına barıp, suwǵa ayaqların tiygiziwden-aq, 16 joqarıdan aqqan suwlar toqtap, júdá uzaqlarda, Saretanǵa jaqın bolǵan Adam qalasında toplanıp, joqarılay basladı. Al Iordan tegisligindegi teńizge, yaǵnıy Óli teńizge aqqan dáryanıń qalǵan suwları bolsa, pútkilley toqtap qaldı. Xalıq dáryanı Erixonıń qarsı aldınan kesip ótti. 17 Pútkil xalıq dáryadan ótip bolǵansha, Jaratqan Iyeniń Kelisim sandıǵın kótergen ruwxaniyler dáryanıń qurǵap qalǵan ultanınıń ortasında qozǵalmay turdı. Solay etip, pútkil Izrail xalqı dáryanıń qurǵap qalǵan ultanı arqalı ótti.