‏ Joshua 4

Estelik taslardıń ornatılıwı

1Pútkil xalıq Iordan dáryasınan ótip bolǵannan soń, Jaratqan Iye Eshuaǵa bılay dedi:

2– Xalıq ishinen on eki adamdı, yaǵnıy hár urıwdan bir adamnan saylap alıń da, 3olarǵa bılay dep buyırıńlar: «Bul jerden, Iordan dáryasınıń ortasınan, anıq ruwxaniylerdiń ayaqları turǵan jerden on eki tas alıńlar. Bul taslardı ózlerińiz benen birge alıp, túneytuǵın jerińizge aparıp qoyıńlar».

4Solay etip, Eshua Izraildıń hár bir urıwınan ózi saylap alǵan on eki adamdı shaqırıp alıp, 5olarǵa bılay dep buyırdı:

– Dáryanıń ortasına, Qudayıńız Jaratqan Iyeniń sandıǵınıń aldı betine barıp, Izrail xalqınıń urıw sanına qaray hár birińiz iynińizge bir tastan kóterip alıńlar. 6Olar sizler ushın belgi boladı. Balalarıńız keleshekte: «Bul taslar neni ańlatadı?» – dep soraǵanda, 7olarǵa: «Iordan dáryasınıń suwları Jaratqan Iyeniń Kelisim sandıǵınıń aldında aqpay qaldı. Kelisim sandıǵı dáryadan ótip atırǵanda, aǵıp turǵan suwlar toqtap qaldı. Bul taslar Izrail xalqı ushın sol waqıyadan máńgige estelik boladı», – deysizler.

8Izraillılar Eshuanıń buyrıǵın orınladı. Jaratqan Iyeniń Eshuaǵa aytqanınday, Izrail urıwlarınıń sanına qaray Iordan dáryasınıń ortasınan alınǵan on eki tastı olar ózleri túnegen jerge alıp kelip, sol jerge qoydı. 9Eshua Iordan dáryasınıń ortasına, Kelisim sandıǵın kótergen ruwxaniyler turǵan jerge basqa on eki tas ornattı. Bul taslar búgin de sol jerde tur.

10Solay etip, Jaratqan Iyeniń xalıqqa jetkiziw ushın Eshuaǵa buyırǵan hár bir nársesi orınlanıwǵa deyin, sandıqtı kótergen ruwxaniyler Iordan dáryasınıń ortasında turdı. Hár bir nárse Muwsanıń Eshuaǵa buyırǵanınday etip islendi. Xalıq dáryadan asıǵıslıq penen ótti. 11Pútkil xalıq dáryadan ótkennen keyin, Jaratqan Iyeniń sandıǵın kótergen ruwxaniyler de xalıqtıń kóz aldında dáryadan ótti. 12Ruben hám Gad urıwları menen Menashshe urıwınıń yarımı Muwsanıń ózlerine buyırǵanı sıyaqlı qural asınıp, Izrail xalqınıń aldında dáryadan kesip ótti. 13Usı tárizde qırıq mıńǵa shamalas qurallı adamlar urısıw ushın Jaratqan Iyeniń aldında Erixo tegisligine ótti.

14Jaratqan Iye sol kúni Eshuanı pútkil Izrail xalqınıń kóz aldında mártebeli qıldı. Muwsaǵa ómiri boyı qanday húrmet kórsetilgen bolsa, Eshuaǵa da sonday húrmet kórsetile basladı.

15Jaratqan Iye Eshuaǵa:

16– Kelisim sandıǵın kótergen ruwxaniylerge Iordan dáryasınan shıǵıwdı buyır, – dedi.

17Eshua ruwxaniylerge:

– Iordan dáryasınan shıǵıńlar, – dep buyırdı. 18Jaratqan Iyeniń Kelisim sandıǵın kótergen ruwxaniyler Iordan dáryasınıń ortasınan shıǵıp, jaǵaǵa ayaq basıwdan-aq, dáryanıń suwları burınǵıday jiyeklerinen tasıp aǵa basladı.

19Xalıq birinshi aydıń onınshı kúni Iordan dáryasınan ótip, Gilgalǵa, Erixonıń shıǵıs shegarasına ornalastı. 20Eshua Iordannan alınǵan on eki tastı Gilgalǵa ornattı. 21Sońınan ol Izrail xalqına bılay dedi:

– Keleshekte sizlerdiń urpaqlarıńız óz ákelerinen: «Bul taslar neni ańlatadı?» – dep sorasa, 22olarǵa Izrail xalqınıń Iordan dáryasınıń qurǵap qalǵan ultanı arqalı ótkenin aytıń. 23Qudayıńız Jaratqan Iye Qızıl teńizdi bizler ótip bolaman degenshe, qalay qurǵatıp taslaǵan bolsa, Iordan dáryasın da sizler ótip bolaman degenshe, solay qurǵatıp taslaǵanın túsindiriń. 24Ol bulardı jer júzindegi barlıq xalıqlar Jaratqan Iyeniń qanshelli qúdiretli ekenin biliwi ushın hám sizler de bárqulla Qudayıńız Jaratqan Iyeden qorqıwıńız ushın isledi.