Jos 5 | KaaIBT22L | STEP | Jaratqan Iyeniń Iordan dáryasınıń suwların izraillılardıń aldında, olar ótip bolaman degenshe, qalay qurǵatıp taslaǵanın Iordannıń batıs tárepindegi amor patshaları hám Jer Orta teńizi jaǵasındaǵı qanan patshaları esitkende, ruwxları tústi. Izraillılardan qorqqanınan, hesh kimde hal-dárman qalmadı.

‏ Joshua 5

1 Jaratqan Iyeniń Iordan dáryasınıń suwların izraillılardıń aldında, olar ótip bolaman degenshe, qalay qurǵatıp taslaǵanın Iordannıń batıs tárepindegi amor patshaları hám Jer Orta teńizi jaǵasındaǵı qanan patshaları esitkende, ruwxları tústi. Izraillılardan qorqqanınan, hesh kimde hal-dárman qalmadı.

Gilgaldaǵı súnnet etiliw

2 Sol waqıtta Jaratqan Iye Eshuaǵa:

– Tastan pıshaqlar islep, izraillılardı burınǵıday súnnet et, – dedi.

3 Solay etip, Eshua tastan pıshaqlar islep, izraillılardı Aralot ^{▼▼ Aralot – «súnnetlew» degendi bildiredi.} tóbeshiginde súnnet etti.

4 Bunı islegeniniń sebebi mınaw edi: Mısırdan shıqqanlardıń hámmesi, urısqa jaramlı bolǵan barlıq er adamlar Mısırdan shıqqannan soń, shólde júrgende ólip ketken edi. 5 Mısırdan shıqqan barlıq er adamlar súnnet etilgen edi. Biraq Mısırdan shıqqannan keyin shólde júrgen waqıtta tuwılǵan er adamlardıń hesh biri súnnet etilmegen edi. 6 Mısırdan shıqqanda urısqa jaramlı bolǵanlardıń hámmesi ólip bolǵansha, izraillılar shólde qırıq jıl gezip júrdi. Sebebi olar Jaratqan Iyeniń sózin tıńlamaǵan edi. Jaratqan Iye olarǵa: «Men ata-babalarıńızǵa wáde etip, sizlerge beremen degen sút hám pal aǵıp turǵan jerdi sizler kórmeysizler», – dep ant ishken edi. 7 Jaratqan Iye olardıń ornına balalarına ómir berdi. Súnnet etilmegen bul balalardı Eshua súnnet etti. Óytkeni olar jolda súnnet etilmegen edi. 8 Barlıq er adamlar súnnet etilgennen soń, táwir bolǵansha, ordadaǵı óz orınlarında qaldı.

9 Sonda Jaratqan Iye Eshuaǵa:

– Mısırda sizlerde bolǵan masqarashılıqtı búgin alıp tasladım, – dedi. Sonlıqtan sol jer búgin de Gilgal ^{▼▼ Gilgal – «alıp taslaw», «domalatıp taslaw» degendi bildiredi.} dep ataladı.

10 Gilgalda Erixo tegisligine orda qurǵan Izrail xalqı aydıń on tórtinshi kúni keshte Qutqarılıw bayramın bayramladı. 11 Bir kún dawam etken bayramnan soń, olar eldiń zúráátinen ashıtqısız nan hám quwırmash jedi. 12 Olar sol eldiń zúráátinen jey basladı hám erteńine mannanıń ^{▼▼ Shıǵ 16:31.} jawıwı pútkilley toqtadı. Izraillılar sol jılı Qanan eliniń zúrááti menen azıqlandı.

Erixo qalasınıń qulawı

13 Eshua Erixo qalasına jaqın jerde bolǵanda, basın kóterip qarap, aldında qılısh uslap turǵan bir adamdı kórdi. Eshua oǵan jaqınlasıp:

– Sen bizler táreptiń adamımısań yamasa dushpan táreptiń be? – dep soradı.

14 Sol adam oǵan:

– Hesh táreptiń de emes. Men Jaratqan Iyeniń áskerleriniń sárkárdasıman. Mine, men keldim, – dedi.

Sol waqıtta Eshua et betinen jerge jıǵılıp, oǵan tabındı da:

– Mırzam, qulıńızǵa aytatuǵın qanday sózińiz bar? – dep soradı.

15 Jaratqan Iyeniń áskerleriniń sárkárdası Eshuaǵa:

– Ayaq kiyimińdi shesh. Óytkeni sen turǵan jer – muxaddes, – dedi. Eshua aytılǵandı orınladı.

16 Izraillılar sebepli, Erixo qalasınıń dárwazaları tas qılıp jabılǵan edi. Ol arqalı hesh kim kirmedi de, shıqpadı da.