‏ Joshua 6

1Sonda Jaratqan Iye Eshuaǵa bılay dedi:

– Men Erixo qalasın, onıń patshasın hám jawıngerlerin saǵan táslim qılaman. 2Sen pútkil áskerleriń menen birge altı kún dawamında qala dógeregin kúnine bir mártebe aylanıp shıǵıwıń kerek. 3Kárnay kótergen jeti ruwxaniy sandıqtıń aldında júrsin. Jetinshi kúni qalanıń dógeregin jeti mártebe aylanıńlar hám sonda ruwxaniyler kárnayların shertsin. 4Ruwxaniylerdiń kárnaylardı uzaq sozıp shertkenin esitkenińizde, pútkil xalıq bálent dawıs penen baqırsın. Sonda qalanıń diywalları qulap túsedi hám hár bir adam turǵan jerinen tuwrı qalaǵa kiredi.

5Nun ulı Eshua ruwxaniylerdi shaqırıp alıp, olarǵa:

– Kelisim sandıǵın kóterińler. Jeti ruwxaniy qollarına kárnaylardı alıp, Jaratqan Iyeniń sandıǵınıń aldında júrsin, – dedi. 6Sońınan xalıqqa:

– Alǵa júrińler, qalanıń dógeregin aylanıwdı baslańlar. Qurallı adamlar Jaratqan Iyeniń sandıǵınıń aldında júrsin, – dedi.

7Eshua bul sózlerdi xalıqqa aytıp bolǵannan soń, kárnaylardı kótergen jeti ruwxaniy kárnaylardı shertip, Jaratqan Iyeniń aldında alǵa júre basladı. Olardıń izinen Jaratqan Iyeniń Kelisim sandıǵı alıp júrildi. 8Qurallanǵan adamlar kárnay shertken ruwxaniylerdiń aldında, al artta kiyatırǵanlar sandıqtıń izinen júrip kiyatır edi. Sol waqıtta kárnaylar da úzliksiz shertilip turdı. 9Sonda Eshua xalıqqa:

– Baqırmańlar, seslerińizdi shıǵarmańlar. Men: «Baqırıńlar», – demegenimshe, awzıńızdan birde bir sóz shıqpasın. Buyrıǵımdı esitken waqtıńızda, baqırıńlar, – dep buyırdı.

10Solay etip, olar Jaratqan Iyeniń sandıǵın kóterip, qala átirapın bir mártebe aylandı. Keyin ordaǵa kelip, sol jerde túnedi.

11Erteńine azanda Eshua erte turdı hám ruwxaniyler Jaratqan Iyeniń sandıǵın kóterdi. 12Kárnaylardı kótergen jeti ruwxaniy Jaratqan Iyeniń sandıǵınıń aldında kárnaylardı shertip júrdi. Qurallanǵan adamlar olardıń aldında, al artta kiyatırǵanlar sandıqtıń izinde júrdi. Sol waqıtta kárnaylar úzliksiz shertilip turdı. 13Solay etip, olar ekinshi kúni de qala átirapın bir mártebe aylanıp, ordaǵa qaytıp keldi. Olar bul isti altı kún tákirarladı.

14Jetinshi kúni olar erte, jańa tań atqanda turıp, qala átirapın anıq sol tárizde jeti mártebe aylanıp shıqtı. Olar tek sol kúni ǵana qala átirapın jeti mártebe aylanıp shıqtı. 15Ruwxaniyler jetinshi aylanbada kárnayların shertkende, Eshua xalıqqa bılay dedi:

– Baqırıńlar! Jaratqan Iye qalanı sizlerge berdi! 16Qala hám onıń ishindegi hár bir nárse Jaratqan Iyege baǵıshlanıp, joq qılınsın. Tek bizler jibergen jansızlardı jasırıp qalǵan buzıq hayal Raxab hám onıń úyindegiler ǵana aman qaladı. 17Abaylańlar, baǵıshlanǵan nárselerge qol tiygizbeńler. Sol nárselerdi baǵıshlap bolıp, keyin olardan alsańız, sizler Izraildıń ordasın qırǵınǵa ushıratıp, bálege duwshar qılasız. 18Pútkil gúmis, altın, mıs hám temir nárseler Jaratqan Iyege baǵıshlanǵan bolıp, olar Jaratqan Iyeniń qaznasına túsedi.

19Solay etip, ruwxaniyler kárnayların shertti. Xalıq bul dawıstı esitiwden, qattı baqırıstı hám diywallar qulap tústi. Hár bir adam turǵan jerinen tuwrı qalaǵa kirdi hám onı qolǵa kirgizdi. 20Olar erkek hám hayallardı, jas hám ǵarrılardı, iri hám mayda mallardı, esheklerdi, qaladaǵı hámme tiri jandı qılıshtan ótkizip, qırıp tasladı.

21Eshua usı jerge jansız bolıp kelgen eki adamǵa:

– Sol buzıq hayaldıń úyine barıńlar. Ant ishkenińizdey, hayaldı hám onıń pútkil jaqınların sırtqa alıp shıǵıńlar, – dedi.

22Úyge kirgen jas jansızlar Raxabtı, onıń ata-anasın, aǵa-inilerin, aǵayinlerin hám onıń úyindegi hámme adamlardı alıp shıǵıp, Izraildıń ordasınıń janına ákeldi. 23Sońınan olar qalanı ishindegileri menen birlikte jaǵıp jiberdi. Tek gúmis, altın, mıs hám temir nárselerdi Jaratqan Iyeniń Úyiniń qaznasına saldı. 24Eshua buzıq hayal Raxabtı, onıń ákesiniń úy-ishin hám jaqınların tiri qaldırdı. Eshuanıń Erixonı kózden ótkizip keliw ushın jibergen jansızların jasırıp qalǵan Raxab búgin de izraillılardıń arasında jasamaqta.

25Bunnan soń, Eshua bılay dep ǵarǵıs járiyaladı:

– Bul qalanı, yaǵnıy Erixo qalasın qaytadan tiklewge háreket etken adam Jaratqan Iyeniń ǵarǵısına ushırasın. Sol adam qalanıń tiykarın óziniń tuńǵısh ulınıń ústine saladı, al qala dárwazasın genje ulınıń ústine quradı.

26Jaratqan Iye Eshua menen birge edi hám Eshuanıń dańqı eldiń hámme jerine jayıldı.