Jos 7 | KaaIBT22L | STEP | Degen menen, izraillılar baǵıshlanǵan nárselerge qıyanet isledi. Yahuda urıwınan bolǵan Zeraxtıń shawlıǵı, Zabdiydiń aqlıǵı, Karmiydiń ulı Axan baǵıshlanǵan nárselerdiń ayırımların alǵanlıqtan, Jaratqan Iyeniń izraillılarǵa qáhári keldi.

‏ Joshua 7

Axannıń gúnası

1 Degen menen, izraillılar baǵıshlanǵan nárselerge qıyanet isledi. Yahuda urıwınan bolǵan Zeraxtıń shawlıǵı, Zabdiydiń aqlıǵı, Karmiydiń ulı Axan baǵıshlanǵan nárselerdiń ayırımların alǵanlıqtan, Jaratqan Iyeniń izraillılarǵa qáhári keldi.

2 Eshua Erixodan Beyt-Eldiń shıǵısında, Beyt-Awenge jaqın jerde jaylasqan Ay qalasına adamlardı jiberip atırıp, olarǵa:

– Barıp, eldi kózden ótkizińler, – dedi.

Adamlar barıp, Ay qalasın kózden ótkizdi. 3 Keyin olar Eshuanıń qasına qaytıp kelip, oǵan:

– Pútkil xalıqtıń ol jerge barıp, áwere bolıwınıń hájeti joq. Sanı jaǵınan az bolǵan Ay qalasınıń xalqın jeńiwge eki-úsh mıń adam jetkilikli, – dedi.

4 Solay etip, úsh mıńǵa jaqın izraillılar qalaǵa qaray júris qıldı. Biraq olar Ay xalqınan qasha basladı. 5 Ay xalqı izraillılardı qala dárwazasınan Shebarimge deyin quwıp, olardı tóbeshikten túserlikte qırıp basladı hám olardıń shama menen otız altı adamın óltirdi. Bunnan qorqqanınan izraillılardıń ruwxları túsip, júrekleri suwladı.

6 Sonda Eshua kiyimlerin jırtıp, Izraildıń aqsaqalları menen birlikte baslarına topıraq shashtı hám Jaratqan Iyeniń sandıǵınıń aldında et betinen jerge jıǵılıp, keshke deyin sol awhalda jattı. 7 Sońınan Eshua bılay dedi:

– O, Quday Iye, Sen bizlerdi amorlarǵa táslim etip, joq qılıw ushın Iordan dáryasınan ótkizgen be ediń? Qánekey, dáryanıń arǵı tárepinde qalsaq edi! 8 O, Iyemiz, Izrail xalqı dushpanlarınan qashqannan soń, men ne ayta alaman? 9 Qananlılar hám usı jerde jasaytuǵın basqa xalıqlar bunı esitkende, átirapımızdı qorshap alıp, atımızdı jer júzinen joq qıladı. Sonda Sen Ózińniń ullı atıńdı saqlap qalıw ushın ne isleyjaqsań?

10 Jaratqan Iye Eshuaǵa bılay dedi:

– Ornıńnan tur! Nege bulay et betińnen jerge jıǵılıp jatırsań? 11 Izraillılar gúna islep, Meniń olarǵa orınlań dep buyırǵan kelisimimdi buzdı. Olar baǵıshlanǵan nárselerdiń bir bólegin urladı hám aldap, óz zatlarınıń arasına jasırdı. 12 Sol sebepli, endigiden bılay izraillılar dushpanlarına qarsı tura almaydı, olar artqa qaytıp, dushpanlarınıń aldına túsip qashadı. Sebebi olar joq qılınıw jazasına tartılǵan. Sizler ózlerińizdegi baǵıshlanǵan nárselerdi joq etpeseńiz, Men bunnan bılay sizler menen birge bolmayman. 13 Bar, sen xalıqtı pákle hám olarǵa bılay de: «Erteńgi kún ushın ózlerińizdi pákleńler. Óytkeni Izraildıń Qudayı Jaratqan Iye: „Háy, Izrail, sizlerdiń arańızda baǵıshlanǵan nárseler bar. Sol nárselerdi joq etpegenińizshe, dushpanlarıńızǵa qarsı tura almaysızlar“, – deydi. 14 Tań atqanda, sizler urıw-urıw bolıp dizilip, gezek penen aldıǵa shıǵasızlar. Jaratqan Iyeniń kórsetken urıwı tiyre-tiyre bolıp aldıǵa shıǵadı. Soń Jaratqan Iye kórsetken tiyre xojalıqları menen birme-bir aldıǵa shıǵadı. Keyin Jaratqan Iye kórsetken xojalıqtıń er adamları aldıǵa shıǵadı. 15 Baǵıshlanǵan nárselerdi aldı dep kórsetilgen adam ózine tiyisli hár bir nárse menen birge jaǵıp jiberiledi. Sebebi ol adam Jaratqan Iyeniń kelisimin buzıp, Izrailda jerkenishli gúna isledi».

16 Tań azannan turǵan Eshua Izrail xalqın urıw boyınsha aldıǵa shıǵardı. Sonda olardıń ishinen Yahuda urıwı kórsetildi. 17 Yahuda tiyreleri aldıǵa shıǵarılǵanda, Zerax tiyresi kórsetildi. Zerax tiyresi xojalıqları menen aldıǵa shıǵarılǵanda, Zabdiy xojalıǵı kórsetildi. 18 Zabdiy xojalıǵınıń er adamları aldıǵa shıǵarılǵanda, Yahuda urıwınan Zeraxtıń shawlıǵı, Zabdiydiń aqlıǵı, Karmiydiń ulı Axan kórsetildi.

19 Sonda Eshua Axanǵa:

– Ulım! Izraildıń Qudayı Jaratqan Iyeniń húrmetin ornına qoy hám Onıń ullılıǵın tán alıp, haqıyqatın ayt, ne islediń? Mennen jasırma, – dedi.

20 Axan Eshuaǵa bılay dedi:

– Durıs, men Izraildıń Qudayı Jaratqan Iyege qarsı gúna isledim. Men mına isti qılǵan edim: 21 oljalardıń ishinde Shınardan ákelingen sulıw bir shapan, eki júz shekel ^{▼▼ Eki júz shekel – bir shekel shama menen 11 gr.} gúmis, eliw shekel awırlıǵında bir altın quymanı kórgenimde háwesim kelip, olardı aldım. Gúmisti eń astına salıp, olardıń hámmesin shatırımnıń ishine, jerge jasırdım.

22 Eshua jibergen adamlar dárhal shatırǵa qaray juwırıp ketti. Olar sol jerge kómilgen zatlardı taptı. Gúmis eń astına kómilgen eken. 23 Olar bul nárselerdiń hámmesin shatırdan aldı da, Eshuaǵa hám Izrail xalqına ákelip berip, Jaratqan Iyeniń aldına qoydı.

24 Eshua hám pútkil Izrail xalqı Zerax ulı Axandı, gúmisti, altın quymanı, shapandı, Axannıń ul-qızların, iri hám mayda malların, esheklerin, onıń shatırın hám shatırınıń ishindegi barlıq zatların Axor oypatlıǵına apardı.

25 Eshua Axanǵa:

– Sen nege bizlerdi bul bálege jolıqtırdıń? Jaratqan Iye búgin ózińdi bálege jolıqtıradı, – dedi.

Sońınan pútkil Izrail xalqı Axan menen onıń xojalıǵındaǵılardı tas boran qılıp óltirdi hám olardı otqa jaǵıp jiberdi. 26 Keyin olar Axannıń ústine úlken tas úyindisin úydi. Bul úyindi búgin de bar. Solay etip, usı waqıyadan soń, Jaratqan Iyeniń lawlaǵan ǵázebi basıldı. Sol jerdiń búgingi kúnge deyin Axor ^{▼▼ Axor – «bále» degendi bildiredi.} oypatlıǵı dep atalıwınıń mánisi usı.