‏ Joshua 9

Gibonlılardıń hiylesi

1Iordan dáryasınıń batıs tárepinde, tawlı úlkede, batıstaǵı taw eteklerinde hám Lebanonǵa deyin sozılǵan Jer Orta teńizi jaǵasında jasaytuǵın barlıq patshalar: xet, amor, qanan, periz, xiw hám ebus patshaları bolıp ótken waqıyalardı esitkende, 2Eshuaǵa hám Izrail xalqına qarsı urısıw ushın hámmesi bir jerge jıynaldı.

3Al xiw xalqınan bolǵan Gibon qalasınıń turǵınları bolsa, Eshuanıń Erixo hám Ay qalalarına islegen islerin esitkende, 4hiyle qollanbaqshı boldı. Olar ózlerin elshi qılıp kórsetip, esheklerine eski qaltalar, góne, jırtıq hám jamaw-jamaw sharap meslerin júkledi. 5Ayaqlarına eski hám jamalǵan ayaq kiyimler, ústilerine góne-kóksi kiyimler kiydi. Olardıń dorbalarındaǵı nanlar kewip, qatıp qalǵan edi. 6Solay etip, sol adamlar Gilgaldaǵı ordaǵa, Eshuanıń janına keldi. Olar Eshuaǵa hám Izrail xalqına:

– Bizler bir uzaq elden keldik. Bizler menen kelisim dúziwińizdi qáler edik, – dedi.

7Biraq izraillılar gibonlılarǵa:

– Sizler menen nege kelisim dúziwimiz kerek eken? Múmkin, sizler bizlerge jaqın jerde jasaytuǵın shıǵarsız, – dedi. 8Olar Eshuaǵa:

– Bizler seniń qullarıńbız, – dedi.

Eshua olardan:

– Sizler kimsiz? Qayaqtan kiyatırsız? – dep soradı.

9Olar Eshuaǵa bılay dedi:

– Qullarıń bolǵan bizler bir uzaq elden keldik. Sebebi seniń Qudayıń Jaratqan Iyeniń dańqı tuwralı esitken edik. Bizler Quday haqqında hámme nárseden: Onıń Mısırda islegen hár bir isinen, 10Iordan dáryasınıń arǵı jaǵındaǵı amorlardıń eki patshasına, yaǵnıy Xeshbon patshası Sixonǵa hám Ashtarotta húkimdarlıq etken Bashan patshası Ogqa neler islegeninen de xabarımız bar. 11Sonlıqtan aqsaqallarımız hám elimizdiń barlıq xalqı bizlerge bılay degen edi: «Janıńızǵa azıq-awqat alıp, olardı qarsı alıw ushın shıǵıńlar hám olarǵa: „Bizler sizlerdiń qullarıńızbız. Bizler menen kelisim dúziwińizdi qáleymiz“, – deńler». 12Bizler sizlerge keliw ushın jolǵa shıqqan kúnimizde, azıq ushın úyimizden alǵan bul nanlarımız ıssı edi. Endi qarańlar, olar kewip, qatıp qalǵan. 13Sharap toltırılǵan mına mesler de taza edi. Mine, olardıń qalay jırtılıp qalǵanına qarańlar. Kóp jol basıp ótkenimiz sebepli, kiyim-kenshegimiz hám ayaq kiyimimiz de tozıp qaldı.

14Izraillılar Jaratqan Iye menen keńespesten, gibonlılardıń azıqlarınan alıp, tatıp kórdi. 15Eshua olardı aman qaldıratuǵınına sóz berip, olar menen paraxatshılıq kelisimin dúzdi. Jámiyet basshıları da kelisimge sadıq qalatuǵınına ant ishti. 16Degen menen, kelisim dúzilgeninen keyin úsh kún ótkende, olar gibonlılardıń jaqın jerde, ózleriniń arasında jasaytuǵının bildi. 17Óytkeni izraillılar jolǵa shıǵıp, úsh kúnnen keyin olardıń Gibon, Kefira, Beerot hám Kiryat-Yarim degen qalalarına kelgen edi. 18Biraq izraillılar olarǵa shabıwıl jasamadı. Sebebi jámiyet basshıları Izraildıń Qudayı Jaratqan Iyeniń atı menen ant ishken edi. Sonlıqtan xalıq jámiyet basshılarına narazı bolıp, tońqılday basladı. 19Basshılar xalıqqa:

– Bizler olarǵa Izraildıń Qudayı Jaratqan Iye haqı ant ishtik. Sonlıqtan olarǵa qol tiygize almaymız. 20Ant ishkenimiz sebepli, olardı aman qaldıramız, bolmasa Qudaydıń ǵázebine ushıraymız, – dedi. 21Sońınan xalıqqa usınıs etip:

– Olardı aman qaldırayıq, – dedi.

Solay etip, basshılar bergen sózinde turdı hám gibonlılar pútkil jámiyet ushın otın shawıp, suw tasıytuǵın boldı.

22Keyin Eshua gibonlılardı shaqırıp alıp, olarǵa bılay dedi:

– Jaqın jerde jasay turıp, nege júdá uzaq jerden keldik dep, bizlerdi aldadıńız? 23Sol sebepten sizler ǵarǵısqa ushıraysızlar. Endi máńgige qul bolıp qalasızlar. Sizler Qudayımnıń Úyi ushın otın shawıp, suw tasıysızlar.

24Gibonlılar Eshuaǵa bılay dep juwap berdi:

– Mırzamız, seniń Qudayıń Jaratqan Iye Óz qulı Muwsaǵa pútkil eldi sizlerge beretuǵının hám elde jasaytuǵınlardıń hámmesin joq qılıwdı buyırǵanın esitken edik. Bizler sizlerden qattı qorqtıq hám janımızdan ayırılıwdan qáweterlenip, usılay isledik. 25Endi bizler seniń qolıńdamız. Sen neni maqul hám durıs dep tapsań, sonı isle.

26Solay etip, Eshua olardı izraillılardıń qolınan qutqardı hám olardı óltirtpedi. 27Sol kúni Eshua olardı jámiyet ushın hám Jaratqan Iye belgilegen jerde qurılatuǵın Onıń qurbanlıq ornı ushın otın shawıp, suw tasıytuǵın xızmetke qoydı. Olar búgin de sol jumıstı atqaradı.