Judg 1 | KaaIBT22L | STEP | Eshuanıń óliminen keyin, Izrail xalqı Jaratqan Iyeden: «Qananlılar menen urısıwǵa bizlerden birinshi bolıp kim baradı?»

‏ Judges 1

Izraillılardıń aman qalǵan qananlılar menen urısıwı

1 Eshuanıń óliminen keyin, Izrail xalqı Jaratqan Iyeden: «Qananlılar menen urısıwǵa bizlerden birinshi bolıp kim baradı?» – dep soradı.

2 Jaratqan Iye olarǵa: «Yahuda urıwı baradı, Qanan úlkesin oǵan táslim qılaman», – dep juwap berdi.

3 Yahuda urıwı tuwısqanları Shimon urıwına: «Qananlılar menen urısıw ushın, bizlerdiń payımızǵa tiygen jerge bizler menen birge barıń. Sońınan bizler de sizlerdiń payıńızǵa tiygen jerge sizler menen birge baramız», – dedi. Solay etip, Shimon urıwı Yahuda urıwı menen birge ketti.

4 Yahuda urıwı urısqa shıqtı hám Jaratqan Iye qananlılar menen perizlerdi olarǵa táslim qıldı. Yahuda urıwı Bezekte olardan on mıń adamdı óltirdi. 5 Sol jerde olar Adoniy-Bezek penen ushırasıp, onıń menen urıstı hám qananlılar menen perizlerdi jeńiliske ushırattı. 6 Adoniy-Bezek qashıp ketti, biraq olar onı quwıp jetip, uslap aldı da, qol hám ayaqlarınıń bas barmaqların kesip tasladı. 7 Sonda Adoniy-Bezek: «Qol hám ayaqlarınıń bas barmaqları kesilgen jetpis patsha meniń dasturxanımnan túsken usaqlardı terip jegen edi. Endi bolsa, meniń olarǵa islegenlerimdi Quday aldıma keltirdi», – dedi.

Olar Adoniy-Bezekti Erusalimge alıp keldi hám ol sol jerde óldi.

8 Yahuda urıwı Erusalimge hújim jasap, qalanı basıp aldı hám xalqın qılıshtan ótkerip, qalaǵa ot berdi. 9 Sonnan keyin, olar tawlı úlkede, Negebte hám batıstaǵı taw eteklerinde jasaytuǵın qananlılar menen urısıw ushın jolǵa tústi. 10 Eski atı Kiryat-Arba bolǵan Xebronda jasaytuǵın qananlılarǵa qarsı atlanıs jasap, Sheshay, Aximan hám Talmay degen tiyrelerdi jeńip shıqtı. 11 Ol jerden olar eski atı Kiryat-Sefer bolǵan Debir qalasınıń xalqına da qarsı urıs ashtı. 12 Sonda Kaleb:

– Kiryat-Sefer xalqın jeńip, ol jerdi qolǵa kirgizgen adamǵa qızım Axsanı hayallıqqa beremen, – dedi.

13 Qalanı Kalebtiń inisi, Kenazdıń ulı Otniel qolǵa kirgizdi. Sonlıqtan Kaleb qızı Axsanı oǵan hayallıqqa berdi. 14 Qız Otnieldiń janına barǵanda, ol kúyewin úgitlep:

– Ákemnen bir atız sora, – dedi.

Kaleb eshekten túsip atırǵan qızınan:

– Qanday tilegiń bar? – dep soradı.

15 Qız ákesine:

– Maǵan bir enshi berseń. Meni Negeb shóline uzatqan ekenseń, endi maǵan suw bulaqların ber, – dedi. Solay etip, Kaleb qızına joqarǵı hám tómengi suw bulaqların berdi.

16 Muwsanıń qáyin atasınıń urpaqları bolǵan kenler Yahuda urıwı menen birge Palma qalasınan ^{▼▼ Palma qalası – bul 3:13 ayat sıyaqlı Erixo qalası yamasa basqa jer bolıwı múmkin.} shıǵıp, Aradtıń qublasındaǵı Yahuda shólinde jasawǵa ketti hám sol jerdegi xalıqlar arasına ornalastı.

17 Sonnan keyin, Yahuda urıwı tuwısqanları Shimon urıwı menen birge barıp, Sefat qalasında jasap atırǵan qananlılardı qıyrattı hám olardıń qalasın tolıǵı menen joq etti. Solay etip, ol jer Xorma ^{▼▼ Xorma – «pútkilley joq etiw» yamasa «baǵıshlanǵan» degendi bildiredi.} dep ataldı. 18 Yahuda urıwı Gazanı, Ashkelondı, Ekrondı hám olarǵa tiyisli jerlerdi de basıp aldı.

19 Jaratqan Iye Yahuda urıwı menen birge bolǵanlıqtan, olar tawlı úlkeni qolǵa kirgizdi. Al oypatlıqta jasap atırǵan xalıqtıń temirden islengen sawash arbaları bolǵanlıqtan, olardı quwa almadı. 20 Olar Muwsanıń aytıp ketkenindey, Xebrondı Kalebke berdi. Kaleb ol jerden anaqlardıń úsh tiyresin quwıp shıǵardı. 21 Biraq Benyamin urıwı Erusalimde jasap atırǵan ebuslılardı quwmadı. Ebuslılar búgingi kúnge deyin Benyamin urıwı menen birge jasap kiyatır.

Efrayım hám Menashshe urıwlarınıń Beyt-Eldi basıp alıwı

22 Yusuptiń urpaǵı Beyt-Elge hújim jasadı. Jaratqan Iye olar menen birge edi. 23 Yusuptiń urpaǵı burınǵı atı Luz bolǵan Beyt-El qalasına jansızlardı jibergende, 24 olar qaladan shıǵıp kiyatırǵan bir adamdı kórdi. Sonda olar:

– Qalaǵa kirer joldı kórsetseń, saǵan jaqsılıq isleymiz, – dedi. 25 Solay etip, sol adam olarǵa qalaǵa kiretuǵın joldı kórsetti. Olar qala xalqın qılıshtan ótkergende, oǵan hám onıń aǵayin-tuwǵanlarına tiymedi. 26 Sol adam xetlerdiń jerine kóship bardı hám sol jerge qala qurıp, onıń atın Luz dep atadı. Bul qala házirge deyin usı at penen ataladı.

Izraillılardıń qanan hám amor xalıqların tolıq quwıp shıǵarmawı

27 Menashshe urıwı Beyt-Shean, Taanax, Dor, Ibleam, Megiddo hám bulardıń átirapındaǵı awıllarda jasaytuǵın xalıqtı quwa almadı. Sebebi qananlılar bekkem qorǵanıp, sol jerde jasawın dawam etti. 28 Izraillılar kúshke tolısqan waqtında, qananlılardı erksiz xızmetshige aylandırdı, biraq olardı quwıp jibermedi.

29 Efrayım urıwı da Gezerde jasaytuǵın qananlılardı ol jerden quwıp jibermedi hám qananlılar Gezerde olardıń arasında jasadı.

30 Zebulon urıwı da Kitron hám Nahalal qalalarındaǵı xalıqlardı quwmadı. Zebulon urıwınıń arasında qalǵan bul qananlılar olar ushın erksiz xızmetshige aylandı.

31 Asher urıwına kelsek, olar da Akko, Sidon, Axlab, Axzib, Xelba, Afek hám Rexob turǵınların quwmadı. 32 Olar sol jerlerdegi qananlılardı quwıp shıǵarmay, olar menen birge jasadı.

33 Naftaliy urıwı da Beyt-Shemesh hám Beyt-Anat xalqın quwmay, sol jerdiń xalqı bolǵan qananlılar menen birge jasadı hám qananlılar olar ushın erksiz xızmetshige aylandı.

34 Amorlar Dan urıwına oypatlıqqa túsiwge jol qoymay, olardı tawlı úlkelerde uslap turdı. 35 Amorlar Har-Xereste, Ayyalonda hám Shaalbimde bekkem qorǵanıp, sol jerde qaldı. Biraq Yusuptiń urpaqları kúshke tolısqanda, amorlar olar ushın erksiz xızmetshige aylandı.

36 Amorlardıń shegarası Aqrabbim biyikliginen baslap Selaǵa, onnan da armanıraqqa deyin sozılǵan edi.