Judg 10 | KaaIBT22L | STEP | Abimelextiń óliminen keyin, Izraildı qutqarıw ushın Issaxar urıwınan Dodonıń aqlıǵı, Puanıń ulı bolǵan Tola atlı bir adam shıqtı. Tola Efrayımnıń tawlı úlkesindegi Shamirde jasaytuǵın edi.

‏ Judges 10

Tola

1 Abimelextiń óliminen keyin, Izraildı qutqarıw ushın Issaxar urıwınan Dodonıń aqlıǵı, Puanıń ulı bolǵan Tola atlı bir adam shıqtı. Tola Efrayımnıń tawlı úlkesindegi Shamirde jasaytuǵın edi. 2 Ol Izrailǵa jigirma úsh jıl biylik etkennen soń, qaytıs boldı hám Shamirde jerlendi.

Yair

3 Sonnan keyin, Giladtan Yair degen adam shıǵıp, Izrailda jigirma eki jıl biylik etti. 4 Onıń otız ulı boldı. Olar otız eshekke minip, otız qalanı basqardı. Gilad jerindegi bul qalalar búgin de Yairge tiyisli qalalar dep ataladı. 5 Yair ólip, Qamonda jerlendi.

Izraildıń dushpanlarınıń qolına táslim etiliwi

6 Izraillılar Jaratqan Iyeniń názerinde jawız bolǵan islerdi jáne isledi. Olar Baallar hám Ashtartalarǵa, aramlılar, sidonlılar, moablılar, ammonlar hám filistlerdiń butlarına tabınıp ketti. Olar Jaratqan Iyeni taslap ketti, Oǵan sıyınbay qoydı. 7 Solay etip, izraillılarǵa ǵázebi qaynaǵan Jaratqan Iye olardı filistler menen ammonlardıń qolına tapsırdı. 8 Olar Iordan dáryasınıń arǵı tárepinde, Giladtaǵı amorlardıń jerinde jasaytuǵın pútkil izraillılardı sol jıldan baslap on segiz jıl dawamında ezip, olarǵa zulımlıq isledi. 9 Ammon xalqı Yahuda, Benyamin hám Efrayım urıwları menen urısıw ushın Iordan dáryasınan ótti. Sol sebepli Izrail awır awhalda qaldı. 10 Sonda izraillılar Jaratqan Iyege:

– Bizler Saǵan qarsı gúna isledik. Seni, óz Qudayımızdı taslap, Baallarǵa tabınıp kettik, – dep nala shekti.

11 Jaratqan Iye izraillılarǵa bılay dep juwap berdi:

– Sizlerdi mısırlılardan, amorlardan, ammonlardan hám filistlerden qutqarǵan Men emes pe edim? 12 Sidonlılar, amalekler hám maonlılar sizlerge eziwshilik qılǵanda da, sizler Maǵan nala shekken edińiz hám Men sizlerdi olardıń qolınan qutqarǵan edim. 13 Biraq sizler Meni taslap, basqa qudaylarǵa tabınıp kettińiz. Sol sebepli Men de endi sizlerdi qutqarmayman. 14 Barıńlar, tańlaǵan qudaylarıńızǵa nala etińler. Qıyınshılıqqa túskenińizde, sizlerdi olar qutqarsın.

15 Izraillılar Jaratqan Iyege:

– Bizler gúna isledik. Neni maqul dep tapsań, bizlerge sonı isle. Tek búgin bizlerdi qutqar, – dedi.

16 Sońınan olar ózlerindegi jat qudaylardıń músinlerin ılaqtırıp taslap, Jaratqan Iyege sıyındı. Jaratqan Iye de izraillılardıń jábir shegiwine artıq shıdamadı.

17 Ammonlar urısıw ushın jıynalıp, Giladta orda qurǵanda, izraillılar da jıynalıp, Mispada ordasın qurdı. 18 Gilad áskerleriniń basshıları bir-birine: «Ammonlarǵa qarsı birinshi bolıp urıstı baslaǵan adam pútkil Gilad xalqınıń basshısı boladı», – dedi.