‏ Judges 11

Iftax

1Giladlı Iftax degen bir márt jawınger bar edi. Ol bir buzıq hayaldıń ulı bolıp, ákesiniń atı Gilad edi. 2Giladtıń óz hayalı da oǵan ullar tuwıp berdi. Olar úlkeygende Iftaxtı quwıp, oǵan:

– Ákemizdiń úyinen miyras almaysań. Óytkeni sen basqa bir hayaldıń ulısań, – dedi. 3Iftax tuwısqanlarınan qashıp, Tob jurtına jaylasıp aldı hám dógeregine jıynalǵan ońbaǵan adamlar onıń menen birge basqınshılıq ete basladı.

4Bir qansha waqıt ótkennen keyin, ammon xalqı izraillılarǵa urıs ashtı. 5Urıs waqtında, Gilad aqsaqalları Iftaxtı alıp keliw ushın Tob jurtına ketti. 6Olar Iftaxqa:

– Júr, bizlerdiń sárkárdamız bol, ammonlar menen urısayıq, – dedi.

7Iftax olarǵa:

– Meni jek kórip, ákemniń úyinen quwǵan sizler emes pe? Basıńızǵa is túskende, ne ushın maǵan keldińiz? – dep juwap berdi.

8Gilad aqsaqalları oǵan:

– Endi saǵan bas iyip keliwimizdiń sebebi, sen bizler menen birge barıp, ammonlar menen urıs. Sonda sen bizlerge, yaǵnıy Gilad xalqına basshı bolasań, – dedi.

9Iftax olardan:

– Ammonlar menen urısıwǵa meni alıp barsańız hám Jaratqan Iye olardı maǵan táslim qılsa, onda men sizlerdiń basshıńız bolaman, – dedi.

10Gilad aqsaqalları oǵan:

– Jaratqan Iye bizlerge gúwa bolsın, anıq aytqanıńday boladı, – dedi.

11Solay etip, Iftax Gilad aqsaqalları menen birge ketti. Xalıq onı ózlerine basshı hám sárkárda etip qoydı. Iftax aytqan barlıq sózlerin Mispada, Jaratqan Iyeniń aldında tákirarladı.

12Sonnan keyin, Iftax ammon xalqınıń patshasına elshiler jiberip: «Jerimizge urıs ashıwǵa kelgendey, bizlerdiń aramızda qanday kelispewshilik bolǵan edi?» – dedi.

13Ammon patshası Iftaxtıń elshilerine mına juwaptı aytıp jiberdi: «Izraillılar Mısırdan shıqqannan keyin, Arnon dáryasınan baslap Yabboq hám Iordan dáryalarına deyingi jerlerimdi alıp qoydı. Endi bul jerlerdi maǵan urıssız qaytarıp ber».

14Iftax ammon xalqınıń patshasına jáne elshiler jiberip, 15bılay dedi: «Iftax bılay dep atır: Izrail Moab jerlerin de, ammon xalqınıń jerlerin de almadı. 16Sebebi Izrail Mısırdan shıqqan waqıtta shól arqalı júrip, Qızıl teńizge, keyin Qadeshke keldi. 17Sońınan Izrail Edom patshasına elshiler jiberip, jerleri arqalı ótiwge ruxsat soradı. Biraq Edom patshası qulaq aspadı. Izrail Moab patshasına da elshiler jiberdi, biraq ol da ruxsat bermedi. Sonlıqtan Izrail Qadeshte qaldı.

18Keyin Izrail shól jerler menen júrip, Edom menen Moab jerleriniń átirapınan ótti. Olar Moab jeriniń shıǵıs tárepine kelip, Arnonnıń arǵı tárepine ornalastı. Biraq Moab shegarasınıń ishine kirmedi. Óytkeni Arnon moablılardıń shegarası edi.

19Sońınan Izrail Xeshbonda húkimdarlıq etip atırǵan amorlardıń patshası Sixonǵa elshiler jiberip: „Jerimizge barıw ushın seniń eliń arqalı ótiwimizge ruxsat ber“, – dedi. 20Biraq Sixon Izraildıń jerinen kesip ótiwine isenbedi. Sonlıqtan ol barlıq áskerlerin jıynap, Yahasada orda qurdı hám Izrailǵa urıs ashtı.

21Izraildıń Qudayı Jaratqan Iye Sixondı hám onıń pútkil xalqın izraillılarǵa táslim qıldı. Izraillılar amorlardı jeńip, olar jasaǵan jerlerdiń hámmesin qolǵa kirgizdi. 22Olar Arnonnan Yabboq dáryasına, shólden Iordan dáryasına deyin sozılǵan pútkil Amor jerlerin iyelep aldı.

23Endi Izraildıń Qudayı Jaratqan Iye amorlardı Óz xalqı bolǵan Izraildıń aldınan quwǵannan keyin, olardı qaytarıp alıwǵa seniń qanday haqıń bar? 24Qudayıń bolǵan Kemosh saǵan bir jer berse, ol jerge iyelik etpes pe ediń? Bizler de Qudayımız Jaratqan Iyeniń ózlerimizge bergen jerlerine iyelik etemiz. 25Sen Moab patshası Sippor ulı Balaqtan ústemseń be? Ol qashan izraillılar menen tartısıp, qashan olar menen urısıwǵa shıqtı? 26Izraillılar úsh júz jıldan berli Xeshbon menen Aroerde hám olardıń átirapındaǵı awıllarda, jáne de, Arnon jaǵasındaǵı barlıq qalalarda jasap kiyatır. Usı waqıtqa deyin bul jerlerdi ne ushın almadıńlar? 27Men seniń aldıńda ayıplı emespen. Biraq sen maǵan qarsı urısqa shıǵıp, nahaqlıq qılıp atırsań. Jaratqan Iye – Qazı, Onıń Ózi búgin izraillılarǵa hám ammonlarǵa qazılıq etsin».

28Biraq Iftaxtıń aytıp jibergen bul sózlerine Ammon patshası qulaq salmadı.

29Sonda Jaratqan Iyeniń Ruwxı Iftaxtıń ústine tústi. Iftax Gilad hám Menashsheden, sońınan Giladtaǵı Mispadan ótip, ammonlarǵa qaray ketti. 30Ol Jaratqan Iyeniń aldında wáde berip bılay dedi: «Eger ammonlardı maǵan táslim qılsań, 31olardı jeńip, saw-salamat qaytqanımda, meni kútip alıw ushın úyimniń esiginen birinshi bolıp kim shıqsa, onı Jaratqan Iyege baǵıshlap, jandırılatuǵın qurbanlıq etip beremen».

32Sonnan keyin, Iftax ammonlar menen urısıwǵa ketti. Jaratqan Iye olardı Iftaxqa táslim qıldı. 33Iftax Aroerden Minnitke shekemgi jigirma qalanı hám Abel-Keramimge shekemgi qalalardı wayran etip, ammonlardı úlken jeńiliske ushırattı. Solay etip, ammonlar izraillılarǵa baǵınıshlı boldı.

34Iftax Mispaǵa, óz úyine qaytqanda, onıń qızı dáp shertip, oyınǵa túsip, onı kútip alıwǵa shıqtı. Bul qız onıń jalǵız perzenti bolıp, onnan basqa ya ulı, ya qızı joq edi. 35Iftax qızın kórgende, kiyimlerin jırtıp:

– Wah, qızım, júregimdi qan etip, meni baxtıqara qıldıń-ǵo! Óytkeni men Jaratqan Iyege bergen wádemdi buza almayman, – dedi.

36Qız ákesine:

– Aǵa, sen Jaratqan Iyege ant ishtiń. Jaratqan Iye dushpanlarıń bolǵan ammonlardan seniń ushın ósh alǵan eken, endi sen de awzıńnan ne shıqqan bolsa, maǵan sonı isle, – dedi. 37Sońınan qız ákesine jáne:

– Bir tilegim bar: maǵan eki ay máwlet ber, doslarım menen tawǵa shıǵıp, maǵan turmısqa shıǵıw nesip etpegenine jılayın, – dedi.

38Ákesi qızına:

– Yaqshı, bara ǵoy, – dep eki ayǵa ruxsat berdi. Qız dosları menen birge tawǵa shıǵıp, turmısqa shıǵıw nesip etpegenine jıladı. 39Eki aydan soń, qız ákesiniń janına qayttı. Ákesi bergen wádesin orınladı. Qızǵa erkektiń qolı tiymegen edi.

Sonnan keyin, Izrailda mınaday bir dástúr payda boldı: 40Izrail xalqınıń qızları hár jılı tawǵa shıǵıp, giladlı Iftaxtıń qızı ushın tórt kún aza tutatuǵın boldı.