Judg 12 | KaaIBT22L | STEP | Efrayım urıwı jıynalıp, Safonǵa qaray keship ótti. Olar Iftaxqa: – Ammonlar menen urısıwǵa ketkenińde, bizlerdi ne ushın shaqırmadıń? Sonlıqtan bizler seni de, úyińdi de jaǵıp jiberemiz,

‏ Judges 12

Iftax hám Efrayım arasındaǵı urıs

1 Efrayım urıwı jıynalıp, Safonǵa qaray keship ótti. Olar Iftaxqa:

– Ammonlar menen urısıwǵa ketkenińde, bizlerdi ne ushın shaqırmadıń? Sonlıqtan bizler seni de, úyińdi de jaǵıp jiberemiz, – dedi.

2 Iftax olarǵa:

– Xalqım hám men ammonlar menen qattı jánjelleskenimizde, men sizlerdi shaqırǵan edim. Biraq sizler kelip, meni olardıń qolınan qutqarmadıńlar. 3 Meni qutqarmaytuǵınıńızǵa kózim jetkende, janımdı qáwip astına qoyıp, ammonlarǵa qarsı hújim jasadım. Keyin Jaratqan Iye olardı maǵan táslim qıldı. Ne ushın búgin meniń menen urısıwǵa keldińler? – dedi.

4 Efrayım urıwınan bolǵanlar giladlılarǵa: «Háy, Efrayım hám Menashshe urpaqları arasında jasaytuǵın giladlılar! Sizler Efrayımnıń qashqınlarısız», – degen edi. Sonda Iftax pútkil Gilad xalqın jıynap, Efrayım urıwına qarsı sawashqa tústi hám olardı qıyrattı. 5 Iordan dáryasındaǵı Efrayım urıwınıń jerine qaray ótetuǵın ótkellerdi qolǵa alǵan giladlılar ótpekshi bolıp kelgen qashqınnan: «Efrayım urıwınanbısań?» dep soraǵanda, ol: «Yaq» dese, 6 sonda olarǵa: «Shibbolet dep ayt», – deytuǵın edi. Biraq olar: «Sibbolet» deytuǵın edi. Óytkeni olar «shibbolet» sózin durıs ayta almaytuǵın edi ^{▼▼ «Shibbolet» sózin durıs ayta almaytuǵın edi – Olardıń sóylew tillerinde dialekt ózgeshe edi.}. Sol sebepli olardı uslap, Iordan dáryasınıń ótkellerinde óltiretuǵın edi. Sol waqıtta efrayımlılardan qırıq eki mıń adam óltirildi. 7 Giladlı Iftax Izrailda altı jıl biylik qıldı. Sonnan keyin ol ólip, Giladtıń bir qalasında jerlendi.

Ibsan, Elon hám Abdon

8 Keyin ala Izrail xalqına beytlehemli Ibsan biylik etti. 9 Ibsannıń otız ulı hám otız qızı boldı. Ol qızların basqa tiyrelerge uzatıp, ulların da basqa urıwlardan úylendirdi. Ibsan Izrailda jeti jıl biylik etti. 10 Sońınan ol ólip, Beytlehemde jerlendi.

11 Ibsannan keyin, Izrailda Zebulon urıwınan bolǵan Elon on jıl biylik etti. 12 Ol ólip, Zebulon jerindegi Ayyalonda jerlendi.

13 Elonnan keyin, Izrailda Piratonnan bolǵan Hillel ulı Abdon biylik etti. 14 Abdonnıń jetpis eshekke minip júretuǵın qırıq ulı hám otız aqlıǵı boldı. Abdon Izrailda segiz jıl biylik etti. 15 Piratonlı Hilleldiń ulı Abdon ólip, Efrayım jerindegi, burın amaleklerge tiyisli bolǵan tawlı úlkedegi Piratonǵa jerlendi.