‏ Judges 13

Samsonnıń tuwılıwı

1Izrail xalqı Jaratqan Iyeniń názerinde jawız bolǵan islerdi jáne isley basladı. Jaratqan Iye de olardı qırıq jılǵa filistlerdiń qolına tapsırdı.

2Sora qalasınan, Dan urıwınan bolǵan Manoax atlı bir adam bar edi. Onıń hayalı násilsiz bolıp, hesh perzenti joq edi. 3Jaratqan Iyeniń perishtesi hayalǵa kórinip, oǵan bılay dedi:

– Sen násilsiz bolıp, perzent kórmegen bolsań da, endi hámiledar bolıp, bir ul tuwasań. 4Endigiden bılay abaylı bol, sen sharap ta, basqa ótkir ishimlik te ishpe hám hesh bir haram nárse jeme. 5Sebebi sen hámiledar bolıp, bir ul tuwasań. Onıń basına páki tiymesin. Óytkeni bala ana qursaǵınan baslap-aq, Qudayǵa baǵıshlanǵan boladı hám ol Izrail xalqın filistlerdiń qolınan qutqara baslaydı.

6Hayal kúyewine bılay dedi:

– Qasıma Qudaydıń bir adamı keldi. Ol Qudaydıń perishtesi sıyaqlı júdá aybatlı edi. Men onnan qay jerden kelgenin soramadım, ol da maǵan atın aytpadı. 7Biraq ol maǵan: «Sen hámiledar bolıp, bir ul tuwasań. Endigiden bılay, sharap ta, basqa ótkir ishimlik te ishpe hám hesh bir haram nárse jeme. Sebebi bala ana qursaǵınan baslap, óletuǵın kúnine deyin, Qudayǵa baǵıshlanǵan boladı», – dedi.

8Sonda Manoax Jaratqan Iyege duwa etip: «O Iyem, Sen jibergen sol Qudaydıń adamı jáne keliwin hám tuwılatuǵın bala ushın ne islewimiz kerekligin bizlerge úyretiwin jalbarınıp sorayman», – dedi.

9Quday Manoaxtıń duwasın esitti. Hayal atızda otırǵan waqıtta, Qudaydıń perishtesi oǵan jáne keldi. Biraq Manoax hayalınıń janında joq edi. 10Hayal kúyewine xabar beriw ushın asıǵıs túrde juwırıp ketti hám kúyewine:

– Ana birde qasıma kelgen adam maǵan jáne kórindi! – dedi.

11Manoax turıp, hayalınıń izine erdi hám sol adamnıń janına kelip, onnan:

– Hayalım menen sóylesken siz be? – dep soradı.

Sol adam oǵan:

– Awa, men, – dedi.

12Manoax onnan:

– Siziń aytqanlarıńız orınlanǵanda, bala qalay jasawı hám ne islewi kerek? – dep soradı.

13Jaratqan Iyeniń perishtesi Manoaxqa bılay dedi:

– Hayalıń aytqanlarımnıń hámmesin orınlasın. 14Ol júzimnen islengen hesh bir nárseni jemesin, sharap ta, basqa ótkir ishimlik te ishpesin hám hesh bir haram nárse jemesin. Buyırǵanlarımnıń hámmesin orınlasın.

15Sonda Manoax Jaratqan Iyeniń perishtesine:

– Toqtap turıń. Siz ushın bir ılaq soymaqshımız, – dedi.

16Jaratqan Iyeniń perishtesi oǵan:

– Meni irikkeniń menen tayarlaǵan awqatıńdı jemeymen. Eger jandırılatuǵın qurbanlıq bermekshi bolsań, onı Jaratqan Iyege ber, – dedi. Al Manoax onıń Jaratqan Iyeniń perishtesi ekenligin bilmegen edi.

17Manoax Jaratqan Iyeniń perishtesine:

– Aytqanlarıńız orınlanǵanda, sizge alǵıs aytıwımız ushın, atıńızdıń kim ekenin aytıń, – dedi.

18Jaratqan Iyeniń perishtesi Manoaxqa:

– Atımdı ne ushın sorap atırsań? Meniń atım qupıya at, – dedi.

19Manoax bir ılaq penen ǵálle sadaqasın alıp, bir tastıń ústinde Jaratqan Iyege qurbanlıq berdi. Sol waqıtta Manoaxtıń hám onıń hayalınıń kóz aldında tań qalarlıq waqıya júz berdi: 20qurbanlıq orınnan jalın kóterilgende, Jaratqan Iyeniń perishtesi jalın menen birge aspanǵa kóterilip ketti. Bunı kórgen Manoax hám onıń hayalı et betinen jerge jıǵıldı. 21Sonnan keyin, Jaratqan Iyeniń perishtesi Manoaxqa hám onıń hayalına qaytıp kórinbedi. Sonda Manoax onıń Jaratqan Iyeniń perishtesi ekenin túsindi. 22Manoax hayalına:

– Bizler sózsiz ólemiz, óytkeni Qudaydı kórdik, – dedi.

23Hayalı oǵan:

– Eger Jaratqan Iye bizlerdi óltiriwdi qálegende, onda jandırılatuǵın qurbanlıǵımızdı hám ǵálle sadaqamızdı qabıl etpegen bolar edi. Ol búgin bulardıń barlıǵın bizlerge kórsetip te, aytıp ta otırmas edi, – dep juwap berdi.

24Solay etip, hayal ul tuwıp, onıń atın Samson dep qoydı. Bala ósip úlkeydi hám Jaratqan Iye onı jarılqadı. 25Sora menen Eshtaol arasındaǵı Maxane-Danda bolǵan Samsondı Jaratqan Iyeniń Ruwxı basqara basladı.