Judg 15 | KaaIBT22L | STEP | Bir neshe kúnnen keyin, biyday oraǵınıń waqtında Samson bir ılaq alıp, hayalın kóriwge bardı hám ol: – Hayalımnıń bólmesine kirmekshimen, – dedi. Biraq hayaldıń ákesi Samsonnıń kiriwine ruxsat bermedi

‏ Judges 15

Samsonnıń ósh alıwı

1 Bir neshe kúnnen keyin, biyday oraǵınıń waqtında Samson bir ılaq alıp, hayalın kóriwge bardı hám ol:

– Hayalımnıń bólmesine kirmekshimen, – dedi.

Biraq hayaldıń ákesi Samsonnıń kiriwine ruxsat bermedi 2 hám oǵan:

– Seni qızımdı taslap ketti dep oylap, onı seniń kúyew joralarıńnıń birine uzatıp jiberdim. Kishkene qızım onnan góre sulıwıraq emes pe? Onıń ornına sol qızımdı ala ǵoy, – dedi.

3 Sonda Samson:

– Endi filistlerge jamanlıq qılsam da, haqım bar, – dedi.

4 Sońınan Samson dalańlıqqa shıǵıp, úsh júz túlki usladı. Ol hár eki túlkiniń quyrıqların bir-birine baylap, quyrıqlarınıń arasına bir shomnan baylap shıqtı. 5 Samson shomlardı jaǵıp, túlkilerdi filistlerdiń eginleriniń arasına jiberdi. Solay etip, filistlerdiń gúdileri, orılmaǵan biydayları, júzim hám záytún baǵları janıp ketti.

6 Filistler: «Bunı kim isledi?» – dep sorastırǵanda, olarǵa: «Bunı timnalınıń kúyew balası Samson isledi. Óytkeni qáyin atası onıń hayalın kúyew joralarınıń birine uzatıp jiberipti», – degen xabar jetti. Filistler bardı da, hayaldı hám onıń ákesin jaǵıp jiberdi.

7 Sonda Samson olarǵa:

– Usılay islegenińiz ushın, sizlerden ósh almay qoymayman! – dedi. 8 Samson olarǵa ayawsız túrde hújim jasap, olardıń kóbisin óltirdi. Sońınan ol Etam jartasına barıp, sol jerdegi bir úńgirdi panaladı.

9 Filistler de Yahudaǵa barıp, sol jerge orda qurdı da, Lexiyge shabıwıl jasadı. 10 Sonda yahudalılar olarǵa:

– Ne ushın bizler menen urısıwǵa keldińler? – dep soradı.

Filistler olarǵa:

– Bizlerge qılǵanın ózine islew ushın, Samsondı tutıp alıwǵa keldik, – dep juwap berdi.

11 Yahudalılardan úsh mıń adam Etam jartasındaǵı úńgirge barıp, Samsonǵa:

– Filistlerdiń bizlerge húkimdarlıq qılatuǵının bilmeyseń be? Sen ne ushın bizlerge bulay islediń? – dedi.

Samson olarǵa:

– Olar maǵan ne islegen bolsa, men de olarǵa sonı isledim, – dep juwap berdi.

12 Olar Samsonǵa:

– Bizler seni baylap, filistlerdiń qolına tapsırıw ushın keldik, – dedi.

Samson olarǵa:

– Meni óltirmeytuǵınıńızdı aytıp, ant ishińler, – dedi.

13 Olar Samsonǵa:

– Boladı, bizler seni tek baylap, olardıń qolına tapsıramız. Sóz beremiz, seni óltirmeymiz, – dedi.

Sonnan keyin, olar Samsondı eki taza arqan menen baylap, úńgirden shıǵardı. 14 Samson Lexiyge jaqınlasqanda, filistler onı qıshqırısıp kútip aldı. Sonda Jaratqan Iyeniń Ruwxı Samsondı biylep aldı hám onıń qollarına baylanǵan arqanlar janǵan saban sıyaqlı úzilip tústi. 15 Samson jańa ólgen bir eshektiń jaq súyegin tawıp, onı qolına aldı da, onıń menen mıń adamdı óltirdi. 16 Sońınan ol bılay dedi:

«Bir eshektiń jaq súyegi menen,
Olardı úyindilerge aylandırdım,
Bir eshektiń jaq súyegi menen,
Mıń adamdı óltirdim».

17 Samson bulardı aytıp bolǵannan soń, jaq súyekti ılaqtırıp tasladı. Sol jer Ramat-Lexiy ^{▼▼ Ramat-Lexiy – «jaq súyegi tóbeshigi» degendi bildiredi.} dep ataldı.

18 Biraq Samson qattı shóllegenlikten, Jaratqan Iyeni shaqırıp:

«Sen Óz qulıńa ullı bir jeńis berdiń. Biraq endi men shólden ólip, súnnetsizlerdiń qolına túsemen be?» – dedi. 19 Sonda Jaratqan Iye Lexiydegi shuqırlıqtı jardı hám onnan suw shıqtı. Samson suw iship, hállenip aldı. Sonlıqtan suw shıqqan jerge En-Haqqore ^{▼▼ En-Haqqore – «Shaqırǵannıń bulaǵı» degendi bildiredi.} degen at berildi. Bulaq búgin de Lexiyde tur.

20 Samson filistlerdiń húkimdarlıq dáwirinde izraillılarǵa jigirma jıl biylik qıldı.